​ដោយៈ ភ្នំ​សន្ទុក / កំពង់ធំៈ នៅ​ព្រឹក​ថ្ងៃអាទិត្យ ទី​៩ ខែមករា ឆ្នាំ​២០២២ កងទ័ព អាវ​ស នៃ​បញ្ជាការដ្ឋាន តំបន់​ប្រតិបត្តិការ​សឹក​រង​កំពង់ធំ ចេញដំណើរ​ទៅកាន់ សមរភូមិ ចាក់​វ៉ាក់សាំង​ប្រឆាំង​មេរោគ​កូ​វីដ​-១៩ ដូ​ស​ទី​៣ នៅ​ខេត្តសៀមរាប ដែលជា ការអនុវត្តន៍ តាម​បទបញ្ជា​របស់ លោក​ឧត្ដមសេនីយ៍ឯក ពៅ ហេង មេបញ្ជាការរង កងទ័ពជើងគោក មេបញ្ជាការ​យោធភូមិភាគ​ទី​៤​។​

​ពិធី​ជូន​ដំណើ​នេះ បាន​ប្រព្រឹត្តទៅ នៅ​ទីបញ្ជាការ តំបន់​ប្រតិបត្តិការ​សឹក​រង​កំពង់ធំ ក្រោម​វត្ដ​មាន​លោក ឧត្ដមសេនីយ៍ទោ សោម ស៊ុន មេបញ្ជាការ តំបន់​ប្រតិបត្តិការ សឹក​រង​កំពង់ធំ​។​

​លោក​ឧ​ត្ត​ម​សេនីយ៍​ទោ សោម ស៊ុន បាន​មានប្រសាសន៍ថាៈ ថ្ងៃនេះ កងទ័ព​អាវ​ស នៃ​បញ្ជាការដ្ឋាន តំបន់​ប្រតិបត្តិការ សឹក​រង​កំពង់ធំ យើង​ត្រូវ​ចេញដំណើរ​ទៅកាន់ សមរភូមិ​ប្រយុទ្ធប្រឆាំង​មេរោគ​កូ​វីដ​-១៩ ដែល​ត្រូវ​ចាក់​វ៉ាក់សាំង ជូន​ប្រជាពលរដ្ឋ នៅ​ស្រុក​ប្រាសាទបាគង ខេត្តសៀមរាប ដូ​ស​ទី​៣ ដែលជា​ដូ​ស​ជំរុញ នៅ​ចំនួន ៣ ឃុំ គឺ​ឃុំ​មានជ័យ ឃុំ​ត្រពាំង​ធំ និង​ឃុំ​កំពង់​ភ្លុក ដើម្បី​ការពារ​ការឆ្លង​រីក​រាលដាល ជំងឺ​កូ​វីដ​-១៩ ដើម្បី​ការពារ​អាយុជីវិត ប្រជាជន​យើង​។​

​ទន្ទឹមនឹងនេះ មេបញ្ជាការ​តំបន់​ប្រតិបត្តិការ​សឹក​រង​កំពង់ធំ ក៍បាន​សំណូមពរ​ដល់​ក្រុម ការងារ​យើង​ទាំងអស់ ត្រូវ​ប្រុងប្រយ័ត្ន​ជានិច្ច ក្នុងការ​ការពារ​ខ្លួន កុំ​ឲ្យ​មានការ​ឆ្លង​ជំងឺ កូ​វីដ​-១៩ ពិសេស​មេរោគ​បំប្លែង​ថ្មី អូ​មី​ក្រុង ចូលក្នុង​ខ្លួន​យើង​ម្នាក់ៗ ដោយ​ត្រូវ​អនុវត្តន៍ ឲ្យ​បាន​ត្រឹមត្រូវ តាម​ការណែនាំ​របស់ ក្រសួងសុខាភិបាល ពិសេស​បំផុត ការអនុវត្តន៍ វិធានការ ៣​ការពារ និង​៣​កុំ របស់​សម្តេច​អគ្គមហាសេនាបតី​តេ​ជោ ហ៊ុន សែន​។​

​លោក​ឧត្ដមសេនីយ៍ទោ​សោម ស៊ុន ក៏បាន​ណែនាំ​ដល់​ក្រុមការងារ និង​ក្រុមគ្រូពេទ្យ ទាំងអស់ ត្រូវ​សហការ​ឲ្យ​បានល្អ ជាមួយ​អាជ្ញាធរ​ដែនដី និង​ប្រជាពលរដ្ឋ ក្នុងការ​បំពេញបេសកកម្ម ក្នុង​សមរភូមិ​ប្រយុទ្ធ ប្រឆាំង​មេរោគ​កូ​វីដ​១៩ ដែល​ថ្នាក់លើ បានប្រគល់ ឲ្យ​ទទួលបាន​ជោគជ័យ និង​សុវត្ថិភាព ជូន​ប្រជាជន ដែល​បាន​អញ្ជើញ​មក ចាក់​វ៉ាក់សាំង​ដូ​ស​ទី​៣ នេះ ឲ្យ​បាន​គ្រប់ៗ​គ្នា​។​

​លោក​ឧត្ដមសេនីយ៍ទោ សោម ស៊ុន បានប្រគល់​បរិក្ខារ​ពេទ្យ សម្រាប់​ការពារ​ទប់ស្កាត់ ការឆ្លង​មេរោគ​កូ​វីដ​-១៩ និង​គ្រឿង​ឧបភោគបរិភោគ ព្រមទាំង​ថវិកា​មួយចំនួន​ផងដែរ សម្រាប់​ឧបត្ថម្ភ ដល់​ការដោះស្រាយ​ជីវភាព ហូបចុក​ប្រចាំថ្ងៃ បន្ថែម​លើ​គោល​របប កំណត់ និង​បាន​ចាត់តាំង​ក្រុមគ្រូពេទ្យ យក​សំណាក​ធ្វើតេស្ដ​រហ័ស រក​អង់​ទី​ហ្សែ​ន កូ​វីដ​-១៩ ជូន​ក្រុមការងារ និង​ក្រុមគ្រូពេទ្យ​ទាំងអស់ ដែល​ត្រូវ​ចេញ​បេសកកម្ម ដោយ​លទ្ធផល​នៃ​ការធ្វើ​តេស្ត​រហ័ស រក​អង់​ទី​ហ្សែ​ន​កូ​វីដ​-១៩ គឺ​អវិជ្ជមាន​ទាំងអស់គ្នា នៅមុន​ពេលចេញ​ដំណើរ​៕/V​