​ប្រែ​សម្រួលៈ​វាសនា​/​តូ​ក្យូ​៖ សហរដ្ឋ​អាម៉េរិក​បាន​យល់ព្រម​ដាក់​វិធានការ​ប្រឆាំង​កូវី​ដ​១៩​តឹងរ៉ឹង​ឡើង​នៅតាម​មូលដ្ឋាន​របស់​ខ្លួន​នៅ​ជប៉ុន នេះ​បើ​តាម​ការបញ្ជាក់​ពី​នាយក​រដ្ឋមន្ត្រី​ជប៉ុន​លោក ហ្វ៊ុយ​មី​អូ​​គី​ស៊ី​ដា កាលពី​ថ្ងៃអាទិត្យ​ទី​០៩​មករា ចំ​ពេល​មាន​ការព្រួយបារម្ភ​ថា​ការផ្ទុះ​ជំងឺឆ្លង​នេះ​នៅក្នុង​មូលដ្ឋាន​យោធា​អាម៉េរិក​បង្ក​ការឆ្លង​រាលដាល​នៅក្នុង​សហគមន៍​មូលដ្ឋាន​។​

​លោក​គី​ស៊ី​ដា បាន​និយាយ​ដូច្នេះ​ក្នុង​កម្មវិធី​ពិភាក្សា​មួយ​នៅក្នុង​ទូរទស្សន៍​NHK​។​លោក​បាន​និយាយថា​« យើង​បាន​យល់ព្រម​ជា​មួយ​អាម៉េរិក​ជាគោលការណ៍​ថា ដំណើរ​ចេញ​ក្រៅ​កម្សាន្ត​មិនចាំបាច់​គួរ​​ត្រូវ​គ្រប់គ្រង​និង​ហាមប្រាម​»​។​

​សូមបញ្ជាក់​ថា ជប៉ុន​បាន​ធ្វើការ​រឹតត្បិត​ប្រឆាំង​កូវី​ដ​១៩​ឡើង​វិញ​នៅ​៣​តំបន់​ដែល​ទទួល​ដាក់​ទាហាន​អាម៉េរិក បន្ទាប់​ពី​អភិបាល​តំបន់​ទាំងបី​បាន​ស្នើ​ចាត់វិធានការ​តឹងរ៉ឹង​ឡើង​ក្រោយ​ពី​ឃើញ​កំណើន​​នៃ​ការឆ្លង​វីរុស​អូ​មី​ក្រុង​។​

​លោក​គី​ស៊ី​ដា បាន​និយាយថា ជប៉ុន​បាន​ស្នើសុំ​អោយ​អាម៉េរិក​ដោះស្រាយ​ការព្រួយបារម្ភ​នេះ​នៅ​ជំនួប​មួយ​របស់​រដ្ឋមន្ត្រីការបរទេស​នៃ​ប្រទេស​ទាំង​ពីរ​កាលពី​ថ្ងៃ​សុក្រ​មុន​

​ជប៉ុន​បាន​បញ្ឈប់​ការចូល​របស់​អ្នកដំណើរ​បរទេស​ស្ទើរ​ទាំងអស់​នៅ​ចុង​ខែ​វិច្ឆិកា​ក្រោយពី​អង្គការ​សុខភាព​ពិភពលោក​ចាត់ទុក​អូ​មី​ក្រុង​ជា​វីរុស​គួរអោយ​ព្រួយបារម្ភ​។​

​ក្នុងពេល​ជាមួយគ្នា កងកម្លាំង​អាម៉េរិក​នៅ​កូរ៉េខាងត្បូង​ក៏​បាន​បង្កើន​ការព្រមាន​អំពី​កូវី​ដ​១៩​ក្រោយ​ពី​កង​ទាហាន​របស់​ខ្លួន​ឆ្លង​ច្រើន​បំផុត​ចំនួន​៦៨២​នាក់​ក្នុងពេល​មួយ​សប្តាហ៍​ទោះជា​ពួក​គេ​ជាង​៩០​ភាគរយ​បាន​ចាក់​វ៉ាក់សាំង​ពេញលេញ​។​ឥឡូវ ពួកគេ​ត្រូវ​ហាម​មិន​អោយ​ចេញ​ទៅ​ស៊ីផឹក​នៅ​តាម​ភោជនីយដ្ឋាន​នៅក្រៅ​បន្ទាយ​និង​ចូល​ផ្សារ​ដែល​បិទ​ជិត បារ ក្លឹប សាល​ហាត់ប្រាណ ឧទ្យាន​កម្សាន្ត​​រោងកុន​រោង​មហោស្រព​និង​កន្លែង​ម៉ាស្សា​។​

​មេ​បញ្ជាការ​របស់​គេ​បាន​បន្ថែមថា ការធ្វើដំណើរ​ទៅកាន់​រដ្ឋ​ធា​នៅ​សេ​អ៊ូ​ល​ក៏​ត្រូវ​ហាមឃាត់ លើកលែង​តែ​ភារកិច្ច​ផ្លូវការ ឬ​អ្នក​ត្រូវ​ទៅ​ធ្វើការ​នៅ​ទីនោះ ការទិញ​ស្បៀង​និង​សេវា​សាសនា​។​

​កាល​ពី​ថ្ហៃ​សៅរ៍ កូរ៉េខាងត្បូង​បាន​រាយការណ៍​ចំនួន​ឆ្លង​ប្រចាំថ្ងៃ​ខ្ពស់​បំផុត​មិន​ដែល​មាន គឺ​ប្រមាណ​៧.៨០០​នាក់ បន្ទាប់​ពី​ប្រទេស​នេះ​បន្ធូរបន្ថយ​វិធានការ​គម្លាត​សង្គម​និង​ងាក​មក​អនុវត្ត​គំរោង​«​រស់​​នៅ​ជាមួយកូ​វីដ​១៩»​កាលពី​ខែ​វិច្ឆិកា ៕

​ទាហាន​អាម៉េរិក​នៅ​កូរ៉េខាងត្បូង ឥឡូវ​ត្រូវ​ហាម​មិន​អោយ​ចេញ​ទៅ​ស៊ីផឹក​នៅ​តាម​ភោជនីយដ្ឋាន​នៅក្រៅ​បន្ទាយ ហាម​ចូល​ផ្សារ​ដែល​បិទ​ជិត បារ ក្លឹប សាល​ហាត់ប្រាណ ឧទ្យាន​កម្សាន្ត រោងកុន​រោង​ម​ហោ​​ស្រព​និង​កន្លែង​ម៉ាស្សា រួម​ទាំង​ធ្វើ​ដំណើរ​ទៅ​កាន់​ទីក្រុង​សេ​អ៊ូ​ល​លើកលែងតែ ភារកិច្ច​ផ្លូវការ​