​ដោយៈ មុនី​រ័ត្ន​-​ទេព ក​ង្រី / ភ្នំពេញៈ តុលាការខេត្ត​កំពង់ឆ្នាំង នៅ​ថ្ងៃទី​៩ ខែមករា នេះ បានសម្រេច​ឃុំខ្លួន មនុស្ស​ចំនួន ប្រាំ នាក់ ពាក់ព័ន្ធ​ការ​ញុះញង់ ឲ្យ​ប្រជាពលរដ្ឋ តវ៉ា​ទាមទារ​ដី នៅ​តំបន់ ៣ ស្ថិតនៅ​ស្រុក​កំពង់លែង ខេត្តកំពង់ឆ្នាំង និង​ប្រឆាំង​ទៅនឹង អនុសាសន៍​របស់​សម្តេច​តេ​ជោ ហ៊ុន សែន នាយករដ្ឋមន្ត្រី នៃ​កម្ពុជា​។

​មនុស្ស​ទាំង ប្រាំ​នាក់ ជាប់ចោទ​ពីបទ​ញុះញង់ អោយ​ប្រព្រឹត្ត​បទឧក្រិដ្ឋ ជាអាទិ៍ និង ដឹកជញ្ជូន​អាវុធ​ខុសច្បាប់​។

​សមត្ថកិច្ច បាន​ឃាត់ខ្លួន​មនុស្ស ចំនួន ប្រាំ នាក់ ទៅ​សាលាដំបូង ខេត្តកំពង់ឆ្នាំង កាលពី​ថ្ងៃទី​៨ ខែមករា ឆ្នាំ​២០២២ ។

​មនុស្ស​ទាំង ប្រាំ នាក់ ត្រូវបាន​សមត្ថកិច្ច ខេត្តកំពង់ឆ្នាំង ឃាត់ខ្លួន​កាលពី​ថ្ងៃទី​៦ ខែ មករា ឆ្នាំ​២០២២ នៅ​ចំណុច​ទំនប់​អូរ​ត្រាវ និង​ទំនប់​ខ្នាយ​ទោល ស្ថិតនៅ​ក្នុងភូមិ​គុយ និង​ភូមិ​ប្រាសាទ ឃុំ​ដារ ស្រុក​កំពង់លែង ខេត្តកំពង់ឆ្នាំង​។​

​យោងតាម​របាយការណ៍​របស់ ស្នងការដ្ឋាន​នគរបាល ខេត្តកំពង់ឆ្នាំង បាន​ឲ្យ​ដឹងថា មនុស្ស​ចំនួន ប្រាំ នាក់ ដែល​ឃាត់ខ្លួន រួមមានៈ ១. ឈ្មោះ សាំង ចាន់ថន ហៅ​សាំង សុង ភេទ​ប្រុស អាយុ ៤៦​ឆ្នាំ រស់នៅ​ទីក្រុង​ភ្នំពេញ , ២. ឈ្មោះ អុក ប៉ា​រ៉ា​ឌី ភេទ​ប្រុស អាយុ ៣៣​ឆ្នាំ រស់នៅ​ទីក្រុង​ភ្នំពេញ , ៣. ឈ្មោះ ប្រាក់ សង្ហា ភេទ​ប្រុស អាយុ ២៣ ឆ្នាំ​រស់នៅ​ទីក្រុង​ភ្នំពេញ មាន​តួនាទី ជា​តៃកុង​ឡាន , ៤. ឈ្មោះ គង់ តារា ភេទ​ប្រុស អាយុ ៥៦​ឆ្នាំ រស់នៅ​ភូមិ​ពាម​ទន្លា ឃុំ​ពោធិ៍ ស្រុក​កំពង់លែង ខេត្តកំពង់ឆ្នាំង និង ៥. ឈ្មោះ កែវ ហួរ (​ឃុំខ្លួន​នៅ​ថ្ងៃទី​៨ ខែមករា ឆ្នាំ​២០២២) ។​

​ប្រភព​ដដែល បាន​បន្តថាៈ សមត្ថកិច្ច បាន​ដកហូត​មធ្យោបាយ រួមមាន រថយន្ត មួយគ្រឿង ម៉ាក Lexus Lx450 ពណ៌​ទឹកប្រាក់ ស្លាក​លេខ ភ្នំពេញ 2Q 7993 ទូរស័ព្ទ​ចំនួន ៨ គ្រឿង laptop មួយគ្រឿង អាវុធខ្លី​មួយ​ដើម​ម៉ាក ប៉ា​រ៉ា ផលិត​នៅ ប្រទេស​កូរ៉េ គ្រាប់​ចំនួន ១២ គ្រាប់ ។ ក្រោយ​ការឃាត់ខ្លួន ជនសង្ស័យ​ទាំងនោះ ត្រូវបាន​បញ្ជូនទៅ​ការិយាល័យ​ជំនាញ​ខេត្ត​៕/V​