​ប្រែ​សម្រួលៈ​វាសនា​/​អ៊ី​ស្លា​ម៉ា​បាត​(​ស៊ីន​ហួរ​)៖ នៅពេល​ប៉ា​គី​ស្ថាន​ជួប​ការធ្លាក់​ព្រិល​ទឹកកក​និង​ការ​ធ្លាក់ភ្លៀង​ខ្លាំង​ជា​លើកដំបូង​ប្រចាំឆ្នាំ​ថ្មី ប្រទេស​នេះ​បាន​រាយការណ៍​អ្នកស្លាប់​៤១​នាក់ នៅពេល​រាប់​រយ​​នាក់​ទៀត​ត្រូវបាន​ជម្លៀស​។​

​មន្ត្រី​ម្នាក់​មក​ពី​អាជ្ញាធរ​គ្រប់គ្រង​គ្រោះមហន្តរាយ​ជាតិ បាន​ប្រាប់​ទីភ្នាក់ងារ​សារព័ត៌មាន​ស៊ីន​ហួរ​នៅ​ថ្ងៃអាទិត្យ​នេះ​ថា មនុស្ស​ជាង​៤០​នាក់​បាន​ស្លាប់​និង​រាប់សិប​នាក់​រងរបួស​នៅក្នុង​គ្រោះថ្នាក់​ផ្សេងៗ​គ្នា ​ទាក់ទង​នឹង​ការ​ធ្លាក់ភ្លៀង​និង​អាកាសធាតុ​ត្រជាក់​ខ្លាំង​ចាប់តាំងពី​ថ្ងៃ​សុក្រ​មក​។​

​រូបភាព​បញ្ចេញ​ដោយ​ផ្នែក​សេវា​ទំនាក់ទំនង​សាធារណៈ បានបង្ហាញ​ទាហាន​ប៉ា​គី​ស្ថាន​ធ្វើ​ការសង្គ្រោះ​នៅ​ទីប្រជុំជន មួរ​រី ខាងជើង​ប៉ា​គី​ស្ថាន កាលពី​ថ្ងៃ​៨​មករា​នៅ​ពេល​រថយន្ត​ទេសចរ​ប្រមាណ​១​ពាន់​​ជាប់​ក្នុង​ព្រិល​ទឹកកក​នាំ​អោយ​អ្នកដំណើរ​ត្រជាក់​និង​អត់​អាហារ​ដល់​ស្លាប់​ជាង​ម្ភៃ​នាក់​

​ក្នុង​ហេតុការណ៍​អាក្រក់​មួយ មនុស្ស​២២​នាក់ រួម​មាន​កូនក្មេង​៩​នាក់ បានក​ក​ស្លាប់​នៅក្នុង​រថយន្ត​របស់​គេ​ដែល​ស្ទះ​ជាប់​លើ​ដងផ្លូវ​ដែល​ធ្លាក់​ព្រិល​ខ្លាំង​នៅ​តំបន៉​ទីប្រជុំជន​មួ​រ​រី នៅពេល​មនុស្ស​រាប់​​ម៉ឺន​នាក់​សំរុក​ទៅកាន់​តំបន់​ទេសចរណ៍​នេះ​ដើម្បី​មើល​ការធ្លាក់​ព្រិល​ខ្លាំង​មិន​ធម្មតា​។​

​រថយន្ត​ទេសចរណ៍​ប្រមាណ​១.០០០​បាន​ជាប់​នៅ​មួរ​រី​នៅពេល​អាជ្ញាធ​របើក​ប្រតិបត្តិការ​សង្គ្រោះ​មនុស្ស​ជាប់​ក្នុង​រថយន្ត ដោយ​ប្រជាជន​មូលដ្ឋាន​ជួយ​ជា​ស្បៀង​និង​ភួយ​ដើម្បី​ទប់ទល់​នឹង​អាកាសធាតុ​ត្រ​​ជាក់​។​

​មនុស្ស​ប្រមាណ​២០​នាក់​ទៀត​ត្រូវបាន​ស្លាប់​នៅ​ផ្នែក​ផ្សេងៗ​ទៀត​នៃ​ប៉ា​គី​ស្ថាន​ដោយសារ​អាកាសធាតុ​អាក្រក់​។​នៅក្នុង​ខេត្ត ឃី​ប៊ឺ ប៉ាក់​ទុន​ក្វា មនុស្ស​៩​នាក់​បាន​ស្លាប់​និង​១០​នាក់​ទៀតរ​បួស​នៅ​ឧបទ្ទវ​​ហេតុ​ពាកើព័ន្ធ​នឹង​ទឹកភ្លៀង​កាលពី​ថ្ងៃ​សុក្រ​និង​ថ្ងៃ​សៅរ៍​។​

​ការ​ធ្លាក់ភ្លៀង​ខ្លាំង​ក៏​បាន​ឆក់យក​ជីវិត​មនុស្ស​១១​នាក់​នៅក្នុង​ខេត្ត​ពុន​ចាប់​និង​ប៉ា​ឡូ​ជី​ស្ថាន​។​

​ការ​ធ្លាក់ភ្លៀង​និង​ព្រិល​ខ្លាំង​ក៏​បង្ក​ការរំខាន​ការធ្វើដំណើរ​នៅ​ពាសពេញ​ប៉ា​គី​ស្ថាន​។​ជើងហោះហើរ​ជាង​២០​ទៅ​និង​មក​ទីក្រុង​ឡាហ័​រ​ត្រូវ​បាន​លុបចោល ឬ​បង្វែរ​គោលដៅ​នៅពេល​រថភ្លើង​ត្រូវ​បាន​ពន្យារ​​ពេល​រាប់​ម៉ោង​៕