ដោយ: ម៉េងឆៃ / ភ្នំពេញ:នៅថ្ងៃទី១៤ ខែមករា ឆ្នាំ២០២២ នេះ គឺជាខួបទី៣៧ឆ្នាំ ដែលសម្តេចតេជោ ហ៊ុន សែន បានកាន់តំណែងជានាយករដ្ឋមន្ត្រីនៃកម្ពុជា ( ១៤ មករា ១៩៨៥-១៤ មករា ២០២២)។ សម្តេចតេជោ ហ៊ុន សែន បានក្លាយជានាយករដ្ឋមន្ត្រី ដែលមានវ័យក្មេងជាងគេបំផុត នៅក្នុងពិភពលោក ហើយក៏ជានាយករដ្ឋមន្ត្រី ដែលបានកាន់តំណែងយូរជាងគេបំផុតនៅក្នុងពិភពលោក។
៣៧ឆ្នាំមកនេះ កម្ពុជាបានឆ្លងកាត់មហាឧបសគ្គធំៗ រាប់មិនអស់ ប៉ុន្តែកម្ពុជាមានប្រមុខដឹកនាំដ៏វៃឆ្លាត និងមានបទ ពិសោធន៍បំផុត បានដឹកនាំកសាងអភិវឌ្ឍន៍ប្រទេសជាតិ អោយមានការរីកចម្រើនលើគ្រប់វិស័យ និងមានមុខមាត់លើឆាកអន្តរជាតិ មកទល់សព្វថ្ងៃ។ នៅឆ្នាំ២០២២ នេះ កម្ពុជាក្រោមការដឹកនាំរបស់កម្ពុជា ក្រៅពីប្រយុទ្ធប្រឆាំងនឹងកូវីដ១៩ ហើយត្រូវស្តារសង្គមសេដ្ឋកិច្ចឡើងវិញ ក៏កម្ពុជា ត្រូវបំពេញបេសកកម្មជាប្រវត្តិសាស្ត្រថ្មីទៀត ជាប្រធានអាស៊ាន និងត្រូវដោះស្រាយបញ្ហាមីយ៉ាន់ម៉ា។
សម្តេចតេជោ ហ៊ុន សែន បានចូលរួមបេសកកម្ម ដើម្បីជាតិមាតុភូមិ ចាប់តាំងពីជំនាន់ចូលព្រៃម៉ាកគី តស៊ូតាមការអំពាវនាវរបស់សម្តេចព្រះបរមរតនកោដ្ឋសម្តេចព្រះ នរោត្តម សីហនុ អំឡុងឆ្នាំ១៩៧០ មកម៉្លេះ។ ក្រោយផ្តួលរំលំរបបរដ្ឋប្រហារលន់នល់ សម្តេចតេជោនាយករដ្ឋមន្ត្រី ហ៊ុន សែន នៅឆ្នាំ១៩៧៧ បានយកជីវិតធ្វើដើមទុន ដោយត្រូវព្រាត់ប្រាស់ប្រពន្ធកូន ហើយរត់ភៀសខ្លួន ទៅកាន់ប្រទេសវៀតណាម ដើម្បីទៅបង្កទ័ពជាមួយឥស្សរជនផ្សេងទៀត ចូលមកវាយរំដោះ សង្គ្រោះជីវិតប្រជាជនកម្ពុជា ចេញពីរបបប្រល័យពូជសាសន៍ខ្មែរក្រហម រហូតទទួលបានជ័យជម្នះ នៅថ្ងៃទី៧មករា ឆ្នាំ១៩៧៩។
សម្តេចតេជោ ហ៊ុន សែន បានចូលរួមក្នុងរដ្ឋាភិបាល ចាប់តាំងពីថ្ងៃរំដោះ ៧ មករា ១៩៧៩ ក្នុងតួនាទីជរដ្ឋមន្ត្រី ការបរទេសមុននឹងចូលកាន់តំណែងជានាយករដ្ឋមន្ត្រីកម្ពុជា នាថ្ងៃទី១៤ ខែមករា ឆ្នាំ១៩៨៥។ ក្នុងតួនាទីកំពូលដ៏សំខាន់នេះ សម្តេចតេជោ ហ៊ុន សែន ដៃម្ខាងកសាងអភិវឌ្ឍន៍ប្រទេស និងដៃម្ខាងទៀត ទប់ទល់នឹងការព្យាយាម វិលត្រឡប់មកវិញនូវរបបខ្មែរក្រហម។
រហូតដល់ឆ្នាំ១៩៨៧ សម្តេចតេជោ ហ៊ុន សែន បានសម្រេចជួបចរចាជាមួយសម្តេចព្រះ នរោត្តម សីហនុ និងភាគីជម្លោះរវាងខ្មែរ និងខ្មែរ ដោយប្រើពេលរហូតដល់បួនឆ្នាំ ទម្រាំសម្រេចបានកិច្ចព្រមព្រៀងសន្តិភាព ថ្ងៃ២៣ តុលា ឆ្នាំ១៩៩១។ សម្តេចតេជោបាននាំរបបរាជានិយម មកកម្ពុជាឡើងវិញ ហើយសម្តេច បានដង្ហែសម្តេចព្រះ នរោត្តម សីហនុ យាងនិវត្តត្រឡប់មកកម្ពុជាវិញ នាថ្ងៃទី១៤ ខែវិច្ឆិកា ឆ្នាំ១៩៩១។ នៅឆ្នាំ១៩៩៣ កម្ពុជាក៏មានការបោះឆ្នោត រៀបចំដោយអ៊ុនតាក់។
ប៉ុន្តែទោះជាមានកិច្ចព្រមព្រៀងសន្តិភាព ទីក្រុងប៉ារីស ថ្ងៃ២៣តុលា ឆ្នាំ១៩៩១ តែប្រទេសកម្ពុជាយើង មិនទាន់មានសន្តិភាពនៅឡើយទេ ដោយសារតែភាគីខ្មែរក្រហម នៅបន្តចលនាតស៊ូ តាមជាយដែនកម្ពុជា-ថៃ ហើយខ្មែរក្រហម ក៏មិនចូលរួមការបោះឆ្នោត នាឆ្នាំ១៩៩៣ ឡើយ។ ការផ្ទុះអាវុធ នៅបន្តកើតមាន នៅតំបន់ ដែលខ្មែរក្រហម កាន់កាប់តាមព្រំដែននោះ។ រហូតដល់ថ្ងៃទី២៩ ខែធ្នូ ឆ្នាំ១៩៩៨ ក្រោមនយោបាយឈ្នះឈ្នះរបស់សម្តេចតេជោ ហ៊ុន សែន ទើបឈានទៅបញ្ចប់សង្គ្រាមទាំងស្រុងនៅកម្ពុជា តាមរយៈការចុះចូលរបស់មេដឹកនាំខ្មែរក្រហម ដឹកនាំដោយអៀងសារី ខៀវសំផន និងនួនជា។
ក្នុងតួនាទី ជានាយករដ្ឋមន្ត្រីកម្ពុជា រយៈកាល ៣៧ឆ្នាំមកនេះ សម្តេចតេជោ ហ៊ុន សែន សម្រេចបាននូវសមិទ្ធផលធំៗ ជាច្រើន សម្រាប់ប្រជាជាតិ និងប្រជាជនកម្ពុជា រួមមានជាអាទិ៍៖ ការរំដោះប្រជាជនកម្ពុជា ឱ្យរួចផុតពីរបបវាលពិឃាតកម្ពុជាប្រជាធិបតេយ្យ ខ្មែរក្រហម។ ព្រឹត្តិការណ៍ជ័យជម្នះ ៧មករា ឆ្នាំ១៩៧៩ ត្រូវបានប្រជាជនកម្ពុជា ប្រសិទ្ធនាមថា ជាថ្ងៃកំណើតទី២។ ក្រៅពីនោះ គឺសម្តេចតេជោ ហ៊ុន សែន នេះហើយ ដែលបាននាំមកនូវសន្តិភាពពេញលេញ ជូនប្រជាជាតិកម្ពុជា តាមរយៈនយោបាយឈ្នះ-ឈ្នះ និងរក្សាបាននូវស្ថិរភាពនយោបាយ ឯកភាពជាតិ ព្រមទាំងធ្វើឱ្យមានវឌ្ឍនភាពនៃរបបប្រជាធិបតេយ្យសេរីពហុបក្ស នៅកម្ពុជា តាមរយៈព្រឹត្តិការណ៍កិច្ចព្រមព្រៀងសន្តិភាព ថ្ងៃ២៣តុលា ឆ្នាំ១៩៩១ ការបោះឆ្នោតជាតិ ឆ្នាំ១៩៩៣ រួមទាំងគោលនយោបាយឈ្នះឈ្នះ ថ្ងៃ២៩ធ្នូ ឆ្នាំ១៩៩៨។
ជាមួយគ្នានោះ សម្តេចតេជោ ហ៊ុន សែន ក៏បាននាំមកនូវការអភិវឌ្ឍលើគ្រប់វិស័យ ដែលបាន និងកំពុងមាននៅកម្ពុជា។ សម្តេចតេជោ ក៏នាំមកនូវកិត្យានុភាពជាតិ លើឆាកអន្តរជាតិ ដែលកម្ពុជា កាន់តែមានតួនាទីសំខាន់ឡើងៗ ក្នុងកិច្ចការតំបន់ និងអន្តរជាតិ ពិសេសនៅឆ្នាំ២០២២នេះ កម្ពុជា ក្នុងនាមជាប្រធានអាស៊ាន សម្តេចតេជោ ហ៊ុន សែន បានចាប់ផ្តើមចូលខ្លួន ដោះស្រាយវិបត្តិនៅមីយ៉ាន់ម៉ា តាមរយៈដំណើរទស្សនកិច្ច លើកដំបូង ២ថ្ងៃ នៅណៃពិដោ កាលពីថ្ងៃទី៧-៨ ខែមករា ឆ្នាំ២០២២។
ជារួមសម្តេចតេជោ ហ៊ុន សែន ជាឥស្សរជននយោបាយជាន់ខ្ពស់ ដែលប្រវត្តិសាស្ត្រកម្ពុជា ត្រូវតែកត់ត្រាទុកជា “វីរបុរសជាតិ”។ ក្រោមការដឹកនាំប្រកបដោយចក្ខុវិស័យច្បាស់លាស់របស់សម្តេចតេជោ ហ៊ុន សែន គឺកម្ពុជា បានបញ្ចប់សង្គ្រាមទាំងស្រុង ក្រោមនយោបាយ ឈ្នះ ឈ្នះ ឈានទៅសម្រេចបាននូវការបង្រួបបង្រួមជាតិ នាំមកនូវសន្តិភាពពេញលេញ និងការអភិវឌ្ឍគ្រប់វិស័យ ជូនជាតិមាតុភូមិ។ កម្ពុជា ក៏ស្គាល់ការអភិវឌ្ឍន៍ជាលំដាប់ បើទោះបីជាត្រូវរំខាន ដោយវិបត្តិកូវីដ១៩ រួមទាំងក្រុមប្រឆាំងមួយចំនួនក៏ដោយ៕សរន