​ប្រែ​សម្រួលៈ​វាសនា​/​មែ​ល​ប៊​ន​៖​ជើងឯក​តេ​ន្នី​ស​សញ្ជាតិ​ស៊ែ​ប លោក ណូ​វ៉ាក់ ឌី​ចូ​កូវិក ប្រឈម​ការ​និរទេស​ខ្លួន​ជា​ថ្មី​បន្ទាប់​ពី​រដ្ឋាភិបាល​អូស្ត្រាលី​នៅ​ថ្ងៃ​សុក្រ​នេះ​ដក​ទិដ្ឋាកា​របស់​លោក​ជា​លើក​ទី​២ ក្នុង​របត់​ថ្មី​​មួយ​នៃ​ដំណើររឿង​ស្តីពី​ថា​តើ​កីឡាករ​តេ​ន្នី​ស​លំដាប់​ពិភពលោក​រូបនេះ​នឹង​ត្រូវ​អនុញ្ញាត​អោយ​ចូល​អូស្ត្រាលី​ដើម្បី​ប្រកួត​ដណ្តើម​ពានរង្វាន់​Australian Open​ដែរឬទេ ទោះ​ជា​លោក​មិន​បាន​ចាក់​​វ៉ាក់សាំង​កូវី​ដ​១៩​។​

​រដ្ឋមន្ត្រី​អន្តោប្រវេសន៍​លោក​អា​ឡិច ហក​គី បាន​និយាយ​កាលពី​ថ្ងៃ​១៤​មករា​ថា លោក​បាន​ប្រើ​ជំរើស​របស់លោក​ដើម្បី​លុបចោល​ទិដ្ឋាកា​របស់​បុរស​ស៊ែ​ប​វ័យ​៣៤​ឆ្នាំ​រូប​នេះ​ដោយ​ឈរ​លើ​ហេតុផល​ផលប្រយោ​​ធន៍​សាធារណៈ គឺ​នៅ​ពេល​តែ​៣​ថ្ងៃមុន​ការប្រកួត​Australian Open​នឹង​ចាប់ផ្តើម ។​

​គេ​រំពឹងថា​មេធាវី​របស់ ឌី​ចូ​កូវិក នឹង​ប្តឹង​ឧទ្ធរណ៍​ទៅ​តុលាការ​សហព័ន្ធ កន្លែង​ដែល​ពួកគេ​បាន​ទទួល​ជោគជ័យ​កាលពី​សប្តាហ៍​មុន បន្ទាប់​ពី​ទិដ្ឋាកា​របស់​លោក​ត្រូវ​លុបចោល​លើក​ដំបូង​ក្រោយ​ទៅដល់​​អាកាសយានដ្ឋាន​ក្រុង​មែ​ល​ប៊​ន​។​

​ការ​និរទេស​ចេញពី​អូស្ត្រាលី នឹង​នាំ​ដល់​បំរាម​ចូល​ប្រទេស​នេះ​៣​ឆ្នាំ ដែល​វា​នឹង​ធ្វើអោយ​ឌី​ចូ​កូវិក មាន​អាយុ​៣៧​ឆ្នាំ​បើសិនជា​គាត់​វិល​មក​ប្រកួត​Australian Open​លើ​ក្រោយ​។​

​លោក​ហក​គី បាន​និយាយថា ការលុបចោល​ទិដ្ឋាការ​នេះ​ឈរលើ​«​ហេតុផល​សុខភាព​និង​សណ្តាប់ធ្នាប់​ល្អ ឈរ​លើ​មូលដ្ឋាន​ដែល​គិត​ដល់​ផលប្រយោជន៍​សាធារណៈ​»​។​

​សេចក្តីថ្លែងការណ៍​របស់​លោក​បាន​បន្ថែមថា រដ្ឋាភិបាល​របស់​នាយ​ក​រដ្ឋមន្ត្រី ស្កុត ម៉ូ​រី​សុន «​ប្តេជ្ញា​ចិត្ត​យ៉ាង​រឹងមាំ​ដើម្បី​ការពារ​ព្រំដែន​អូស្ត្រាលី ជា​ពិសេស​ពាក់ព័ន្ធ​នឹង​កូវី​ដ​១៩»​។​

​ចំណែក​លោក​ម៉ូ​រី​សុន ស្វាគមន៍​ការបណ្តេញ ណូ​វ៉ាក់ ឌី​ចូ​កូវិក​ចេញពី​អូស្ត្រាលី ដោយ​ថា អូស្ត្រាលី សំរេច​បាន​ការ​កំហិត​អោយ​ចំនួន​ស្លាប់​ដោយ​កូ​វីដនៅ​ទាប​បំផុត សេដ្ឋកិច្ច​រឹងមាំ​និង​អត្រា​ចាក់​វ៉ាក់សាំង​​ខ្ពស់​បំផុត​នៅក្នុង​លោក​។​

​សូមបញ្ជាក់​ថា ឌី​ចូ​កូវិក ចំណាយពេល​៤​យប់​នៅ​បន្ទប់​សណ្ឋាគារ​ឃុំ​ខ្លួន​របស់​ផ្នែក​អន្តោប្រវេសន៍ មុន​ចៅក្រម​លុបចោល​ការសំរេច​ចិត្ត​នេះ​កាលពី​ថ្ងៃ​ចន្ទ ដោយ​អនុញ្ញាត​អោយ​លោក​ធ្វើ​ដំណើរ​ដោយ​សេរី​​នៅ​អូស្ត្រាលី​និង​ហាត់​សមនៅ​សួន​មួយ​ក្នុង​ទីក្រុង​មែ​ល​ប៊​ន​៕

​ចាប់តាំងពី​ចេញពី​កន្លែង​ឃុំឃាំង​អន្តោប្រវេសន៍​មក ឌី​ចូ​កូវិក ហាត់​រាល់ថ្ងៃ​និង​ថតរូប​ដាក់​ក្នុង​បណ្តាញ​សង្គម តែ​ឥឡូវ​ប្រឈម​ការបណ្តេញ​ចេញ​