​ប្រែ​សម្រួលៈ​វាសនា​/​ប៉េកាំង​៖ រដ្ឋធានី​ចិន​កាលពី​ថ្ងៃ​សៅរ៍ បាន​រាយការណ៍​ករណី​ឆ្លង​វីរុស​អូ​មី​ក្រុង​ក្នុង​មូលដ្ឋាន​ជា​លើកដំបូង ដោយ​វា​កាន់តែ​ដាក់​សម្ពាធ​លើ​អាជ្ញាធរ​ក្នុង​ការទប់ស្កាត់​ការផ្ទុះ​ជំងឺ​រាតត្បាត​​នេះ​នៅ​ពេល​មិន​ដល់​៣​សប្តាហ៍​ផង​មុន​ខ្លួន​ចាប់ផ្តើម​កីឡា​អូ​ឡាំ​ពិ​ច​រដូវរងារ​។​

​ពួក​មន្ត្រី​បាន​បញ្ជាក់​អះអាង​អំពី​ការរកឃើញ​វីរុស​ចម្លង​លឿន​នេះ​នៅក្នុង​សន្និសីទ​កាសែត​មួយ​កាលពី​ថ្ងៃ​សៅរ៍​ទី​១៥​មករា​។​ពួកគេ​បាន​និយាយថា អ្នក​ដែល​បាន​ពាក់ព័ន្ធ​ជាមួយ​អ្នកជំងឺ​ត្រូវបាន​ធ្វើតេស្តិ៍​​រក​វីរុស​និង​អ្នក​នៅ​ទីតាំង​ដែល​អ្នកជំងឺ​បាន​ទៅ​ត្រូវរាយការណ៍ជូន​អាជ្ញាធរ​។​

​ក្នុងពេល​ជាមួយគ្នា អាជ្ញាធរ​បាន​បិទ​ខ្ទប់​អាគារ​ស្នាក់នៅ​និង​កន្លែង​ធ្វើការ​របស់​អ្នក​ឆ្លង​អូ​មី​ក្រុង និង​បាន​ប្រមូល​សំណាក​មកពី​មនុស្ស​២.៤៣០​នាក់​ដើម្បី​ធ្វើតេស្តិ៍​រក​វីរុស​។​

​ករណី​រកឃើញ​អូ​មី​ក្រុង​ក៏​ត្រូវ​បាន​បញ្ជាក់​នៅ​ពេល​មុន​នេះ​កាលពី​ថ្ងៃ​សៅរ៍​នៅ​ក្រុង​សៀង​ហៃ​និង​ហ្ស៊ូ​ហៃ​ក្នុង​ខេត្ត​ក្វាង​ទុង នៅពេល​គណៈកម្មាធិការ​សុខាភិបាល​ជាតិ​បាន​ព្រមាន​អំពី​លទ្ធភាព​ផ្ទុះ​អូ​មី​ក្រុង​​នៅ​ទីកន្លែង​ទាំងនេះ​។​

​ចិន​បាន​រាយការណ៍​រួច​ហើយ​អំពី​ការរកឃើញ​ករណី​ឆ្លង​អូ​មី​ក្រុង​ក្នុង​ស្រុក​នៅ​ទីក្រុង​ទៀន​ជីន ក្នុង​ខេត្ត​ហឺ​ណាន​ភាគ​កណ្តាល និង​ក្នុង​ខេត្ត​លី​អាវ​និញភា​គ​ឦសាន​។​ទោះជា​យ៉ាងណា​ចំនួន​អ្នក​ឆ្លង​អូ​មី​ក្រុង​​សរុប​នៅ​មិន​ទាន់​ច្បាស់​។​

​មន្ត្រី​សុខាភិបាល​ចិន​ម្នាក់​នៅ​គណៈកម្មាធិការ​សុខាភិបាល​ជាតិ​បាន​និយាយថា វិធានការ​ទប់ស្កាត់​វីរុស​របស់​ជាតិ​មាន​ប្រសិទ្ធភាព​ក្នុង​ទប់ស្កាត់​អូ​មី​ក្រុង ។​

​ព្រឹត្តិការណ៍​អូ​ឡាំ​ពិ​ច​រដូវរងារ​នឹង​ចាប់ផ្តើម​នៅ​ថ្ងៃ​០៤​កុម្ភៈ​នៅ​ទីក្រុង​ប៉េកាំង ដោយ​បណ្តា​ទីក្រុង​នៅ​ពាសពេញ​ប្រទេស​ចិន​កំពុង​ប្រុងប្រយ័ត្ន​ខ្លាំង​ពី​ការផ្ទុះ​ជំងឺឆ្លង​នេះ ។​

​ក្នុង​សេចក្តីថ្លែងការណ៍​មួយ​កាលពី​ថ្ងៃ​សៅរ៍ គណៈកម្មាធិការ​សុខាភិបាល​ជាតិ​បាន​រាយការណ៍​ចំនួន​ឆ្លងកូវី​ដ​១៩​ថ្មី​ចំនួន​១៦៥​នាក់ បន្ទាប់​ពី​ឆ្លង​១៤៣​នាក់​កាល​ពី​មួយ​ថ្ងៃមុន​។​

​គិត​ត្រឹម​ថ្ងៃ​១៤​មករា ចិន​មាន​អ្នក​កើតកូ​វីដ​សរុប​ក្នុង​រយៈពេល​ជា​ង​២​ឆ្នាំ​មកនេះ​ចំនួន​១០៤.៧៤៥​នាក់ និង​ចំនួន​អ្នក​ស្លាប់​ដោយ​ជំងឺ​នេះ​នៅ​៤.៦៣៦​នាក់​ដដែល​៕

​ប្រជាជន​រង់ចាំ​ធ្វើតេស្តិ៍​រក​វីរុស​នៅ​ក្រុង​ប៉េកាំង​