ប្រែ​សម្រួលៈ​វាសនា​/​វែល​លីង​តុន​៖ រដ្ឋធានី​នូ​គូ អា​ឡូ​ហ្វា រង​ការខូចខាត​ធំដុំ​ដោយ​ការផ្ទុះ​ភ្នំភ្លើង​ខ្លាំង​មួយ ដែល​បាន​បង្ក​រលក​ស៊ូ​ណា​មី តែ​មិន​មាន​សេចក្តីរាយការណ៍​អំពី​ការស្លាប់​ឬ​រងរបួស​មនុស្សបង្កឡើង​​ពី​ការផ្ទុះ​នេះ​ទេ​។​

​ចា​ស៊ីន​ដា អា​ដឺ​ន នាយករដ្ឋមន្ត្រី​នូវែ​លសេ​ឡង់ បាន​និយាយ​កាលពី​ថ្ងៃអាទិត្យ​ទី​១៦​មករា​នេះ​ថា «​ស៊ូ​ណា​មី បង្ក​ផលប៉ះពាល់​ខ្លាំង​​លើ​ឆ្នេរ​នៅ​ប៉ែក​ខាង​ជើ​ង​ទីក្រុង​នូ​គូ អា​ឡូ​ហ្វា ដោយ​ទូក​និង​ដុំថ្ម​​ធំៗ​ត្រូវ​បាន​ទឹក​វ៉ៃ​ឡើងគោក​»​។​

​លោកស្រី​ក៏​បាន​សន្យា​ផ្តល់​ការគាំទ្រ​សំរាប់​តុង​ហ្កា និង​បាន​សុំ​ផ្តល់​ជំនួយ​ដំបូង​ចំនួន​៥​សែន​ដុល្លារ​ដល់​ប្រទេស​ដែន​កោះ​ប៉ាស៊ីហ្វិក​នេះ​។​

​សូមបញ្ជាក់​ថា បណ្តា​ប្រទេស​ក្នុង​មហាសមុទ្រ​ប៉ាស៊ីហ្វិក បាន​ព្យាយាម​ទាក់ទង​ជាមួយ​តុង​ហ្កា​នៅ​ថ្ងៃអាទិត្យ​ក្រោយ​ស៊ូ​ណា​មី​កាត់ផ្តាច់​ការទាក់ទង​តាម​ទូ​ស័ព្ទ​និង​អ៊ីនធឺណិត​នៅ​ប្រទេស​ក្នុង​មហាសមុទ្រ​​មួយ​នេះ​។​

​ភ្នំភ្លើង​ក្រោម​សមុទ្រ​នៅ​ឯនាយ​ឆ្នេរ​តុង​ហ្កា​បាន​ផ្ទុះ​កាលពី​ថ្ងៃ​សៅរ៍ បង្ក​អោយ​មាន​ការព្រមាន​អំពី​រលក​ស៊ូ​ណា​មី​និង​ការបញ្ជា​ជម្លៀស​មនុស្ស​នៅ​តាម​ឆ្នេរ​តុង​ហ្កា ព្រមទាំង​បណ្តាកោះ​ប៉ាស៊ីហ្វិក​ខាងត្បូង​ជាច្រើន​ កន្លែង​ដែល​រូបភាព​ក្នុង​បណ្តាញ​សង្គម​បង្ហាញ​រលក​វាយ​ចូល​ផ្ទះ​នៅ​តាម​ឆ្នេរ​។​

​នៅ​ជប៉ុន មនុស្ស​រាប់ម៉ឺននាក់​ត្រូវ​បាន​ណែនាំ​អោយ​ភៀសខ្លួន​កាលពី​ថ្ងៃអាទិត្យ នៅពេល​រលក​សមុទ្រ​កំពស់​ជាង​១​ម៉ែត្រ វាយ​តំបន់ឆ្នេរ​។​មនុស្ស​ប្រមាណ​២៣០.០០០​នាក់​ត្រូវបាន​ប្រាប់​អោយ​ភៀស​​ខ្លួន​នៅ​ទូទាំង​៨​ខេត្ត​ដោយសារតែ​ហានិភ័យ​ពី​ស៊ូ​ណា​មី​។​

​រូបភាព​ផ្កាយរណប​បង្ហាញ​ការផ្ទុះ​ភ្នំភ្លើង​ក្រោម​ទឹកសមុទ្រ​នៅ​ឯនាយ​ឆ្នេរ​តុង​ហ្កា​កាលពី​ថ្ងៃ​១៥​មករា

​ភ្នំ ហ៊ុន​ហ្កា​-​តុង​ហ្កា​-​ហ៊ុន​ហ្កា​-​ហា អា​ប៉ាយ បាន​ផ្ទុះ​ជារឿយៗ​នៅ​ប៉ុន្មាន​ទសវត្សរ៍​មក​នេះ តែ​ការផ្ទុះ​កាលពី​ថ្ងៃ​សៅរ៍​ខ្លាំង​រហូត​ឮ​ដល់​កោះហ្វី​ជី​និង​ប្រទេស​នូវែ​លសេ​ឡង់​។​រូបភាព​ផ្កាយរណប​ចាប់​បាន​ការផ្ទុះ​កាល​​ពី​ថ្ងៃ​សៅរ៍ ដោយ​វា​បាន​បញ្ជូន​ផ្សែង​កំពស់​១៩​គីឡូម៉ែត្រ​លើ​ទឹកសមុទ្រ​។​

​ផ្ទៃមេឃ​លើ​តុង​ហ្កា​បាន​ប្រែជា​ខ្មៅ​ដោយសារ​ផេះ​ភ្នំភ្លើង​។​

​ការផ្ទុះ​នេះ​នាំអោយ​មាន​ការ​ព្រមាន​អំពី​ស៊ូ​ណា​មី​នៅ​ទូទាំង​តំបន់​ប៉ាស៊ីហ្វិក ដោយ​សហរដ្ឋ​អាម៉េរិក​និង​ជប៉ុន​អំពាវនាវ​អោយ​ប្រជាជន​នៅតាម​ឆ្នេរ​ប៉ាស៊ីហ្វិក​របស់គេនៅ​អោយ​ឆ្ងាយ​ពី​ឆ្នេរ​។​អូស្ត្រាលី​និងនូវែ​លសេ​ឡង់ក៏បាន​​ចេញ​ការព្រមាន​ស្រដៀង​គ្នា សំរាប់​អ្នក​រស់នៅ​តាម​ឆ្នេរ៕

​ឆ្នេរ​នៅ​ឈី​លី​ត្រូវ​ជម្លៀស​មនុស្ស​ចេញ​អស់​ដោយសារ​ខ្លាច​មាន​ស៊ីណា​មី​វាយប្រហារ​