​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ បណ្តាញ​ភោជនីយដ្ឋាន​ចិន​មួយ​នៅ​ភាគ​ពាយព្យ​ប្រទេស​អង់គ្លេស​បាន​បង្ខំចិត្ត​ប្រើ​រ៉ូបូ​ត​រត់តុ​បន្ទាប់ពី​ជួប​ការលំបាក​ក្នុងការ​ជួល​បុគ្គលិក​ក្នុងអំឡុងពេល​​ជំងឺ​រាតត្បាត​កូវី​ដ​១៩​។​

​ថៅកែ​ភោជនីយដ្ឋាន The Chinese Buffet បាន​បញ្ចេញ​រ៉ូបូត BellaBot​មួយ​គ្រឿង​នៅ​ក្នុង​រាល់​ភោជនីយដ្ឋាន​ទាំង ៤ ក្នុង​ទីក្រុង​លីវើ​ភូល ទីក្រុង​សេន​ហេ​ឡិន ទីក្រុង​បូល​តុ​ន និង​ទីក្រុង​វី​ហ្គែ​ន ដើម្បី​បម្រើ​អាហារ​ដល់​ភ្ញៀវ​។​

​នៅពេល​ភោជនីយដ្ឋាន​អាហារ​ប៊ូ​ហ្វេ​នេះ​បាន​បើក​ឡើង​វិញ​បន្ទាប់​ពី​ការបិទ​ខ្ទប់​ចុងក្រោយ​បំផុត ម្ចាស់​របស់​វា​បាន​សម្រេចចិត្ត​បម្រើ​អាហារ​ដល់​មនុស្ស​នៅ​តុ ដែល​បញ្ជា​តាមរយៈ​កម្មវិធី​ទូរស័ព្ទ​ជាជាង​ឱ្យ​​ភ្ញៀវ​មក​យក​អាហារ​ដោយ​ខ្លួនឯង​។​

​រឿង​នេះ​បាន​បន្ថែម​សម្ពាធ​ធ្ងន់​ថែម​ទៀត​លើ​បុគ្គលិក​ដែល​កំពុង​មាន​ចំនួន​តិច នេះ​បើ​យោង​តាម​ម្ចាស់​ហាង​គឺ​លោក ប៉ាវ​ឡូ ហ៊ូ និង​លោក ភី​ត​ធឺ វូ ដែល​និយាយថា រ៉ូបូត BellaBots បាន​បង្ហាញ​ពី​ការពេញនិយម​សម្រាប់​អ្នក​ញ៉ាំ​អាហារ​រួចទៅហើយ​។​

​តម្លៃ​សម្រាប់​មនុស្ស​យន្ត​មុខ​រួសរាយ​រាក់ទាក់​នេះ​គឺ ២០.០០០ ដុល្លារ ដែល​ថោក​ជាង​តម្លៃ​នៃ​ការជួល​អ្នករត់​តុ​ស៊ីប្រាក់​ឈ្នួល​អប្បបរមា ៤០ ម៉ោង​ក្នុង​មួយ​សប្តាហ៍​។​

​វីដេអូ​ជាច្រើន​បានបង្ហាញ​រ៉ូបូត Bella ដែល​មាន​មុខ​ជា​សត្វ​ឆ្មា​បើកភ្នែក​ធំៗ កំពុង​ដើរ​ពេញ​ជាន់​ភោជនីយដ្ឋាន បង្ហាញ​អាហារ​ឆ្ងាញ់ៗ​ដល់​អតិថិជន​ដែល​មានចិត្ត​សប្បាយរីករាយ​៕

រ៉ូបូត BellaBot កំពុង​បម្រើ​អាហារ​នៅតាម​ភោជនីយដ្ឋាន The Chinese Buffet នៅ​អង់គ្លេស