ដោយៈ​សុផល​/​ភ្នំពេញៈ​វិទ្យាស្ថាន​បារាំង​នៅ​កម្ពុជា​នឹង​សម្ពោធ​ជា​ផ្លូវការ​ចាប់ពី​ថ្ងៃទី​២០​ខែមករា​ឆ្នាំ​២០២២​នូវ​រដូវ​កាល​វប្បធម៌​ដំបូង​នៃ​កម្មវិធី​ប្រចាំឆ្នាំ​របស់ខ្លួន​៖ វដ្ត​នៃ​ស្ថាបត្យកម្ម និង​ការអភិវឌ្ឍ​ប្រកបដោយ​ចីរភាព​! ក្នុង​រយៈពេល​មួយខែ​នេះ សាធារណជន​ទាំងអស់គ្នា ដែល​រស់​រាជធានី​ភ្នំពេញ​នឹង​អាច​ទស្សនាការ​តាំងពិព័រណ៍​ចំនួន​បី​នៅ​ទីក្រុង​នៅ​ថ្ងៃ​អនាគត​។​ពិព័រណ៍​នេះ​មាន​ឈ្មោះថា​”​ភ្នំពេញ ទីក្រុង​មាន​ជីជាតិ​”​។

​យោងតាម​សេចក្តីប្រកាស​ព័ត៌មាន​របស់​វិទ្យាស្ថាន​បារាំង​នៅ​កម្ពុជា​បានឱ្យដឹងថា នៅ​ពីក្រោយ​គម្រោង​របស់​អ្នករៀបចំ​តំបន់​បៃតង​ឬ​គម្រោង របស់​ស្ថាបត្យករ​គឺ​តែងតែមាន​សំណួរ​អំពី​ការរស់នៅ​របៀប​ថ្មី​ក្នុង​ពិភពលោក​និង​ការ​សម្រប​បែបផែន​នៃ​ការផលិត​ទៅនឹង​របៀប​ថ្មី​នេះ​។ ពិព័រណ៍​ផ្សេងៗ​ដែលមាន​នៅក្នុង​ស៊េរី​ព្រឹត្តិការណ៍​នេះ គឺ​ដើម្បី​ដាក់​គ្រឹះ​គំរូ​លំនៅដ្ឋាន​ថ្មីៗ ដែល​គិតគូរ​ពី​បញ្ហា​បរិស្ថាន សេដ្ឋកិច្ច​និង​ការផ្លាស់ប្តូរ ដែល​កំពុង​លុកលុយ​សង្គម​នាពេល​បច្ចុប្បន្ន​។

​ការពង្រីក​ទីក្រុង​មួយ​ដែល​កំពុង​ផ្លាស់ប្ដូរ ៖ ការដាក់​ឱ្យមាន​កន្លែង​បៃតង​គឺ​ចាំបាច់​ណាស់ ដើម្បីឱ្យ​ទីក្រុង​អភិវឌ្ឍ​ផ្សាភ្ជាប់​នឹង​បរិស្ថាន​ធម្មជាតិ​។ ការសាងសង់​ទីក្រុង​មួយ​ដែល​ទំនើប ៖ គិតពី​ថា​តើ​ដើមឈើ​ត្រូវដាក់​នៅ​កន្លែង​ណា​? ពេលខ្លះ​ក៏​រក្សាទុក ពេលខ្លះ​ក៏​ដាំ​បន្ថែម​ពោលគឺ​​ស្ថាបត្យករ អ្នករៀបចំ​ទីក្រុង និង​អ្នករៀបចំ​តំបន់​បៃតង តែងតែ​គិតគូរ​ពី​ដើមឈើ​។

​ដូច្នេះ​តើ​ធ្វើ​ដូចម្តេច​ដើម្បី​អភិវឌ្ឍន៍​រាជធានី​ភ្នំពេញ​? តើ​គួរ​ថែរក្សា​បេតិកភណ្ឌ​ស្ថាបត្យកម្ម​របស់​ទីក្រុង​ភ្នំពេញ​ទេ​? តើ​កន្លែង​ណា​ដែល​ត្រូវ​រៀប​ឱ្យមាន​សួន​? ដាំ តម្រឹម តម្រង់ នៅ​ហាលវាល នៅ​ខាងក្នុង ដាំ​រង្វើល ដាំ​ចម្រុះ ដាំ​ញឹក កាយ សាងសង់​…​រង់ចាំ ឬ​គ្រាន់តែ​ទុក​ចោល​ឱ្យ​ស្មៅ​ដុះ​។ ការថែរក្សា​កន្លែង​រស់​នៅ និង​បរិស្ថាន​របស់​វា គឺជា​ពាក្យ​គន្លឹះ​នៃ​ការតាំង​ពិ​ព័រ​ណ៌​នា​រដូវ​កាល​នេះ “​ទីក្រុង​មាន​ជីជាតិ​” ដែលជា​ដំណើរ​ពិត​មួយ​ឆ្លងកាត់​បេះដូង​នៃ​រាជធានី​ភ្នំពេញ​។

​នៅ​ព្រឹត្តិការណ៍​សំខាន់ៗ នៃ​រដូវ​កាល​វប្បធម៌​នេះ រួមមាន​ការតាំងពិព័រណ៍​ចំនួន​បី​៖ “​បង្កើត​មន្ត​ស្នេហ៍​ពិភពលោក​ជាថ្មី​៖ ស្ថាបត្យកម្ម ទីក្រុង ការផ្លាស់ប្តូរ​” នៃ​ទីក្រុង​ស្ថាបត្យកម្ម និង​បេតិកភណ្ឌ (la Cité de l’architecture et du patrimoine)(​ក្រុងប៉ារីស​) “AJAP – កម្រង​រូបថត​នៃ​ស្ថាបត្យករ និង​ទេសភាព​ករ​វ័យក្មេង ២០១៨” និង “​ការប្រកួតប្រជែង​ស្ថាបត្យកម្ម ពានរង្វាន់ URBA-IFC៖ ការអភិវឌ្ឍ​ប្រកបដោយ​ចីរភាព​នៃ​ច្រាំងទន្លេ​មេគង្គ​”​។​

​ការតាំងពិព័រណ៍​ទាំងនេះ​ត្រូវបាន​អមដោយ​វដ្ត​នៃ​សន្និសីទ​វេទិកា​តុមូល កា​រប​ញ្ជាំ​ង​ខ្សែរ​ភាពយន្ត និង​វដ្ត​ស្ថាបត្យកម្ម ក៏ដូចជា​ដំណើរ​ទស្សនា​ពិព័រណ៍​អមដោយ​អ្នកសម្របសម្រួល​។

​យោងតាម​កម្មវិធី​ដែល​រៀបចំ​បញ្ជាក់ថា រដូវ​កាល​វប្បធម៌​អំពី​ទីក្រុង​ថ្ងៃស្អែក​ចាប់ពី​ថ្ងៃទី ២០ ខែមករា​ដល់​ថ្ងៃទី ១៩ ខែកុម្ភៈ​ឆ្នាំ ២០២២​។​
. ថ្ងៃ​ព្រហស្បតិ៍ ទី​២០ ខែមករា វេលា​ម៉ោង ១០​ព្រឹក នៅ​សាកលវិទ្យាល័យ​ភូមិន្ទ​វិចិត្រសិល្បៈ សម្ពោធ​ការតាំងពិព័រណ៍ “ AJAP – កម្រង​រូបថត​នៃ​ស្ថាបត្យករ និង​ទេសភាព​ករ​វ័យក្មេង ២០១៨ ”​។​
. ថ្ងៃ​ព្រហស្បតិ៍ ទី​២០ ខែមករា វេលា​ម៉ោង ៤​រសៀល នៅ​សារមន្ទី​ជាតិ សម្ពោធ​ការតាំងពិព័រណ៍ “ ការប្រកួតប្រជែង​ស្ថាបត្យកម្ម​៖ ការអភិវឌ្ឍន៍​ប្រកបដោយ​ចីរភាព​នៃ​ច្រាំង​ទន្លេមេគង្គ ”​។​
. ថ្ងៃ​ព្រហស្បតិ៍ ទី​២០ ខែមករា វេលា​ម៉ោង ៦:៣០​ល្ងាច នៅ​វិទ្យាស្ថាន​បារាំង សម្ពោធ​ការតាំងពិព័រណ៍ “ បង្កើត​មន្ត​ស្នេហ៍​​ពិភពលោក​ជាថ្មី ”​។

​កម្មវិធី​បង្ហាញ​ម៉ូដ​ប្រកបដោយ​ភាព​ច្នៃប្រឌិត និង​ច្នៃប្រឌិត​ដោយ ស៊ី​ល​វាំង លីម​, អេ​រិ​ក រេ​ស៊ីណា​, រ៉ុ​មី​ដា គេ​ធ និង តូម៉ាស ចាស​ហ្វ្រេ នឹង​ប្រព្រឹត្តទៅ​នៅ​វិទ្យាស្ថាន​បារាំង​។​

. ថ្ងៃ​អង្គារ ទី ១ ខែកុម្ភៈ វេលា​ម៉ោង ៦:៣០​ល្ងាចៈ​សន្និសីទ “​បេតិកភណ្ឌ​ក្រោយ​សម័យអង្គរ​៖ បញ្ហា​ប្រឈម​នៃ​ការការពារ​” ជាមួយ​អ្នក​ម្នាង ស៊ីសុវត្ថិ ម៉ែន​ច័ន្ទ​ទេវី ស្ថាបត្យករ និង​សាកលវិទ្យាធិការរង​នៃ​សាកលវិទ្យាល័យ​ភូមិន្ទ​វិចិត្រសិល្បៈ​។​

. ថ្ងៃ​សៅរ៍ ទី​៥ ខែកុម្ភៈ វេលា​ម៉ោង ៣​រសៀលៈ​ការ​បញ្ចាំង និង​ជជែក​ពិភាក្សា​ផ្លាស់ប្តូរ​គំនិត​លើ​ខ្សែភាពយន្ត ” The Man Who Built Cambodia ” និង ” Les siècle de Le Corbusier ” ដោយមាន​វត្តមាន​រប​ស់លោក Christopher Rompré ដែលជា​អ្នកដឹកនាំ​រឿង​។​

. ថ្ងៃ​អង្គារ ទី ៨ ខែកុម្ភៈ វេលា​ម៉ោង ៦:៣០​ល្ងាចៈ​សន្និសីទ “​ស្ថាបត្យកម្ម​ប្រកបដោយ​និរន្តរភាព​៖ ស្លាក ” Bas-carbone ” ឬ low CO2 ជាមួយ Yvon Chalm ស្ថាបត្យករ និង​សហ​ស្ថាបនិក​នៃ​ទីភ្នាក់ងារ ACYC​។​

. ថ្ងៃ​ពុធ ទី ៩ ខែកុម្ភៈ វេលា​ម៉ោង ៦:៣០​ល្ងាចៈ​ការ​បញ្ចាំងភាពយន្ត​ក្រៅ​អគារ ” Mon Oncle ” ដោយ Jacques Tati (១៩៥៨)
. ថ្ងៃ​សៅរ៍ ទី​១២ ខែមករា វេលា​ម៉ោង ៣​រសៀលៈការចាក់​បញ្ចាំង​ខ្សែភាពយន្ត ” Playtime ” ដោយ Jacque Tati (១៩៦៧)
. ថ្ងៃ​ពុធ ទី ១៦ ខែកុម្ភៈ វេលា​ម៉ោង ៦:៣០​ល្ងាចៈ​ការ​បញ្ចាំងភាពយន្ត​ក្រៅ​អគារ “ កោះ​ពេជ្រ ” ដោយ ដាវី ជូ (២០១៦)
. ទស្សនា​ពិព័រណ៍​ជាមួយនឹង​អ្នកសម្របសម្រួល​ខាង​ផ្នែក​វប្បធម៌​តាមរយៈ​ការចុះឈ្មោះ​ជាមុន [email protected]​។​

​វិទ្យាស្ថាន​បារាំង​នៅ​កម្ពុជា (IFC) គឺជា​ឧបករណ៍​របស់​ក្រសួងការបរទេស​បារាំង និង​ការអភិវឌ្ឍន៍​អន្តរជាតិ សម្រាប់​កិច្ចសហប្រតិបត្តិការ និង​សកម្មភាព​វប្បធម៌​នៅ​ខាងក្រៅ​ប្រទេស​បារាំង​។ ដូច្នេះហើយ វា​ដើរតួនាទី​សំខាន់​ក្នុងការ​ផ្លាស់ប្តូរ​និង​កិច្ចសហប្រតិបត្តិការ​រ​វាង​ប្រទេស​បារាំង និង​កម្ពុជា ក្នុង​វិស័យ​វប្បធម៌ សិល្បៈ ការអប់រំ និង​បណ្តុះបណ្តាល​។ យើង​ផ្តល់ជូន​នូវ​កម្មវិធី​ផ្សេងៗ​គ្នា​ពេញ​មួយឆ្នាំ (​ការតាំង​ពិព័រណ៍ ការ​បញ្ចាំងភាពយន្ត ការប្រគំ​តន្ត្រី សន្និសីទ​) ជាមួយនឹង​បេសកកម្ម​ផ្សព្វផ្សាយ​វប្បធម៌​បារាំង​ក្នុងន័យ​ទូលំទូលាយ (​សិល្បៈ​​ទស្សនីយភាព ភាពយន្ត តន្ត្រី អក្សរសិល្ប៍ ភាសា​បារាំង ការ​ចម្អិន​អាហារ និង​សិល្បៈ​នៃ​ការរស់នៅ​។ …) លើសពី​កម្មវិធី​ធម្មតា​នេះ វិទ្យាស្ថាន​បង្កើត​គម្រោង​ជាមួយ​ដៃគូ​ក្នុងស្រុក​ដែលមាន​គោលបំណង​លើកកម្ពស់​ការអភិវឌ្ឍ​ន៍ និង​ការផ្លាស់ប្តូរ​វប្បធម៌​៕​សរន​

រូបថតៈ​វិទ្យាស្ថាន​បារាំង​នៅ​កម្ពុជា (IFC)