​ប្រែ​សម្រួល : កញ្ញា​ដា​លី​ស (​ឆា​នែ​ល​ញូ​វ​អេ​ស៊ា​) ៖ ប្រធាន​អង្គការ​សហប្រជាជាតិ​លោក អង់​តូ​នីញ៉ូ គូថេ​រ៉េស​(Antonio Guterres ) បាន​ប្រាប់​វេទិកា​អន​ឡាញ​នៅ​ទីក្រុង​ដា​វូ​ស​(Davos)​កាលពី​​ថ្ងៃ​ចន្ទ​ទី ១៧ ខែ​មករា​ថា ពិភពលោក​ត្រូវ​តែ​ចាក់​វ៉ាក់សាំង​មនុស្ស​គ្រប់គ្នា​ប្រឆាំង​នឹង​កូវី​ដ​១៩ ដើម្បី​ធានាបាន​នូវ​ច្រក​ចេញពី​ជំងឺ​រាតត្បាត​។​

​ការជួបជុំ​ទល់មុខ​គ្នា​នៃ​តួអង្គ​មហាអំណាច​ផ្នែក​នយោបាយ​និង​សាជីវកម្ម​នៅ​ទីក្រុង​តំបន់ភ្នំ​អាល់​របស់​ស្វីស​គឺ​ធ្វើតាម​អន​ឡាញ​ពីរ​ឆ្នាំ​ជាប់​គ្នា​ហើយ ដោយសារ​ជំងឺ​រាតត្បាត​មិន​បង្ហាញ​សញ្ញា​ធូរស្រាល​សោះ​។​

​អគ្គលេខាធិការ​អ​.​ស​.​ប​និយាយថា “​រយៈពេល​ពីរ​ឆ្នាំ​ចុងក្រោយ​នេះ​បាន​បង្ហាញ​ឱ្យឃើញ​នូវ​ការ​ពិត​ដ៏​សាមញ្ញ​ប៉ុន្តែ​ឃោរឃៅ​។ ប្រសិនបើ​យើង​ចាកចោល​នរណា​ម្នាក់​នោះ​គឺ​យើង​ពិតជា​ទុក​ពួកគេ​ឱ្យ​នៅ​ឯ​​កោ​ហើយ​។​ប្រសិនបើ​យើង​ខកខាន​ចាក់​ថ្នាំ​បង្ការ​ដល់​មនុស្ស​គ្រប់រូប នោះ​យើង​នឹង​ធ្វើឱ្យ​មេរោគ​បំប្លែង​ខ្លួន​ថ្មីៗ​ឡើង​ចាង រីក​រាលដាល​ឆ្លង​ព្រំដែន​ហើយ​នាំ​ឱ្យ​ជីវិត​ប្រចាំ​ថ្ងៃ​និង​សេដ្ឋកិច្ច​ត្រូវ​បញ្ឈប់​”​។​

​លោក​គូថេ​រ៉េស​បាន​និយាយថា សហគមន៍​អន្តរជាតិ​ចាំបាច់​ត្រូវ “​តតាំង​ជាមួយ​នឹង​ជំងឺ​រាតត្បាត​ដោយ​សមធម៌​និង​យុត្តិធម៌​”​។​

​លោក​បាន​កត់សម្គាល់​ថា អង្គការ​សុខភាព​ពិភពលោក​បាន​បង្ហាញ​យុទ្ធសាស្ត្រ​កាល​ពី​រដូវ​ស្លឹកឈើ​ជ្រុះ​ចុង​ក្រោយ​ដើម្បី​ចាក់​វ៉ាក់សាំង ៤០ ភាគរយ​នៃ​ចំនួន​ប្រជាជន​លើ​ពិភពលោក​នៅ​ចុងឆ្នាំ ២០២១ និង ៧០ ភាគរយ​នៅ​ពាក់កណ្តាល​ឆ្នាំ​នេះ​។​

​លោក​គូថេ​រ៉េស​បាន​ប្រាប់​វេទិកាសេ​ដ្ឋ​កិច្ច​ពិភពលោក​ថា “​យើង​មិន​បាន​កៀក​គោលដៅ​ទាំងនេះ​ទេ​”​។​

​លោក​បាន​បន្ថែមថា “​អត្រា​នៃ​ការទទួល​ថ្នាំ​បង្ការ​នៅក្នុង​ប្រទេស​ដែល​មាន​ប្រាក់​ចំណូល​ខ្ពស់​គឺ​ខ្ពស់ជាង​ប្រទេស​នៅ​អាហ្វ្រិក​រហូតដល់ ៧ ដង​យ៉ាង​អាម៉ាស់​។ យើង​ត្រូវការ​សមធម៌​វ៉ាក់សាំង​ឥឡូវនេះ​”​។​

​លោក​បាន​និយាយថា ក្រុមហ៊ុន​ឱសថ​ទាំងអស់​គួរតែ “​សាមគ្គី​ជាមួយ​ប្រទេស​កំពុងអភិវឌ្ឍន៍ ដោយ​ចែករំលែក​អាជ្ញាប័ណ្ណ ចំណេះ​ធ្វើ​និង​បច្ចេកវិជ្ជា​ដូច្នេះ​ទើប​យើង​ទាំងអស់គ្នា​អាច​ស្វែងរក​ផ្លូវ​ចេញ​​ពី​ជំងឺ​រាតត្បាត​នេះ​បាន​”៕

​ប្រធាន​អង្គការ​សហប្រជាជាតិ​លោក អង់​តូ​នីញ៉ូ គូថេ​រ៉េស