ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ កាលពី​ថ្ងៃ​អង្គារ​ទី​១៨​មករា​សហរដ្ឋ​អាម៉េរិក​បាន​បង្កើន​ការព្រួយបារម្ភ​អំពី​លទ្ធភាព​វាយប្រហារ​របស់​រុស្ស៊ី​ប្រឆាំង​នឹង​អ៊ុ​យក្រែន នៅមុន​បេសកកម្ម​ការទូត​ដ៏​មមាញឹក​ដោយ​រដ្ឋមន្ត្រី​ការបរទេស​អាម៉េរិក​លោក អាន​ថូ​នី ប្លីង​កិន​(Antony Blinken)​។​

​ជាមួយ​ទាហាន​រុស្ស៊ី​រាប់ម៉ឺន​នាក់​ប្រមូលផ្តុំ​គ្នា​នៅតាម​ព្រំដែន​អ៊ុ​យក្រែន លោក​ប្លីង​កិន​បាន​ជិះ​យន្តហោះ​ទៅ​ជួប​មន្ត្រី​អ៊ុយ​ក្រែ​ន​និង​សម្ពន្ធមិត្ត​អឺរ៉ុប នៅមុន​ការពិភាក្សា​ជាមួយ​រដ្ឋមន្ត្រី​ការបរទេស​រុស្ស៊ី​លោក សឺ​ហ្គេ ឡាវ​រ៉ូវ (Sergei Lavrov)​នៅ​ថ្ងៃ​សុក្រ​ខាង​មុខ​។​

​ក្រុមមន្ត្រី​អាម៉េរិក​បាន​បង្កើន​កម្រិត​នៃ​ការគំរាមកំហែង​នេះ ដោយ​និយាយថា វិបត្តិ​ដែល​មាន​សន្ទុះ​សន្សឹមៗ​នេះ កំពុង​ឈានដល់​ដំណាក់កាល​ថ្មី​ដ៏​គ្រោះថ្នាក់​។​

​អ្នកនាំពាក្យ​សេត​វិមាន លោកស្រី ជេ​ន សា​គី (Jen Psaki)​បាន​និយាយថា “​យើង​ជឿ​ថា ឥឡូវ​នេះ​យើង​កំពុង​ស្ថិត​ក្នុង​ដំណាក់កាល​មួយ ដែល​រុស្ស៊ី​អាច​ធ្វើការ​វាយប្រហារ​លើ​ប្រទេស​អ៊ុយ​ក្រែន​គ្រប់ពេល​។ ខ្ញុំ​ចង់​និយាយថា​វា​គ្រោះថ្នាក់​ជាង​អ្វីដែល​យើង​គិត​ទៅ​ទៀត​”​។​

​នៅក្នុង​ការវិវត្ត​ថ្មី​មួយទៀត មន្ត្រីជាន់ខ្ពស់​ក្រសួងការបរទេស​អាម៉េរិក​និយាយថា​មាន​ការព្រួយបារម្ភ​ថា សេចក្តីព្រាង​កំណែទម្រង់​រដ្ឋ​ធម្មនុញ្ញ​នៅក្នុង​ប្រទេស​បេឡា​រុស​ដែល​ជា​រដ្ឋ​ផ្តាច់ការ​និង​ជា​សម្ពន្ធ​​មិត្ត​ជិតស្និទ្ធ​នឹង​ទីក្រុង​មូ​ស្គូ អាច​អនុញ្ញាត​ឱ្យ​មាន​ការដាក់​ពង្រាយ​អាវុធ​នុយក្លេអ៊ែរ​របស់​រុស្ស៊ី​។​

​រឿង​នេះ​បាន​កើតឡើង​ខណៈ​ទាហាន​រុស្ស៊ី​បាន​ហូរ​ចូល​ទៅក្នុង​ប្រទេស​នេះ​សម្រាប់​អ្វី​ដែល​គេ​និយាយថា​ជា​សមយុទ្ធ​ហ្វឹកហ្វឺន ប៉ុន្តែ​ក្នុង​កម្រិត​ដែល​ក្រុមមន្ត្រី​អាម៉េរិក​និយាយថា “​លើស​ពី​ចំនួន​ធម្មតា​”៕

​ទាហាន​រុស្ស៊ី​មក​ដល់​បេឡា​រុស​កាន់តែ​ច្រើនឡើងៗ ដើម្បី​សមយុទ្ធ​ធំ​មួយ​នៅក្បែរ​ព្រំដែន​អ៊ុ​យក្រែន​