ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ប្រភព​វេជ្ជសាស្ត្រ​មួយរូប​បាន​និយាយ​កាលពី​ថ្ងៃ​អង្គារ​ទី​១៨​មករា​ថា កងកម្លាំង​ចម្រុះ​ដឹកនាំ​ដោយ​អា​រ៉ាប៊ីសាអូឌីត​បានសម្លាប់​មនុស្ស ១៤​នាក់​នៅ​ក្នុងការ​​វាយប្រហារ​តាម​អាកាស​លើ​រដ្ឋធានី​ដែល​គ្រប់គ្រង​ដោយ​ពួក​ឧទ្ទាម​របស់យេ​ម៉ែន បន្ទាប់​ពី​ការវាយប្រហារ​ដោយ​ពួក​ឧទ្ទាម​ហ៊ូ​ធី​លើ​អារ៉ាប់​រួម​អេ​មី​រ៉ា​ត​បង្ក​ភាព​តានតឹង​ក្នុង​តំបន់​ខ្លាំង​ឡើង​។​

​អ្នកស្រុក​នៅ​ទីក្រុង​សា​ណា (Sanaa)​កំពុង​កាយ​គំនរ​បាក់បែក​ដើម្បី​រក​អ្នក​នៅ​រស់​ពី​ការវាយប្រហារ ដែល​បាន​រំលំ​ផ្ទះ​ពីរ​ខ្នង​ពោលគឺ​តែ​ប៉ុន្មាន​ម៉ោង​បន្ទាប់ពី​ក្រុម​ហ៊ូ​ធី​បាន​សម្លាប់​មនុស្ស​បីនាក់​​កាលពី​ថ្ងៃ​ចន្ទ​ក្នុង​ការវាយប្រហារ​ដោយ​ដ្រូ​ន​និង​មី​ស៊ី​ល​លើ​រដ្ឋធានី​អា​ប៊ូ​ដា​ប៊ី​របស់​អារ៉ាប់​រួម​អេ​មី​រ៉ា​ត​។​

​ទីភ្នាក់ងារ​សារព័ត៌មាន​សា​បា (Saba)​របស់​ពួក​ឧទ្ទាម​នេះ​បាន​និយាយថា ឧត្តមសេនីយ៍ឯករប​ស់​ឧទ្ទាម​ហ៊ូ​ធី គឺ លោក អាប់​ឌុល​ឡា កា​សសិ​ម អាល់​-​ជូ​ណា​អ៊ី​ដ (Abdullah Qassem al-Junaid) ជា​នាយក​សាលា​ទ័ពអាកាស​របស់​ក្រុម​ឧទ្ទាម​នេះ ត្រូវបាន​សម្លាប់​រួម​ជាមួយ​សមាជិក​គ្រួសារ​។​

​កងកម្លាំង​ចម្រុះ​បាន​បើក​ការវាយប្រហារ​បន្ថែមទៀត​លើ​ទីក្រុង​សា​ណា​កាលពី​ថ្ងៃ​អង្គារ​។​

​លោក អា​ក្រាម អាល់​-​អា​ដាល់ (Akram al-Ahdal)​ជា​សាច់ញាតិ​របស់​ជនរងគ្រោះ បាន​និយាយថា “​ការស្វែងរក​អ្នក​នៅ​រស់​នៅក្នុង​គំនរ​បាក់បែក​នៅតែ​បន្ត​”៕

ជនជាតិ​យេ​ម៉ែន​កំពុង​ពិនិត្យ​ការខូចខាត​បង្កឡើង​ដោយ​ការវាយប្រហារ​តាម​អាកាស​ដឹកនាំ​ដោយ​អា​រ៉ាប៊ីសាអូឌីត​