​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ កំណត់ត្រា​ពិភពលោក​ហ្គី​ន​ណេ​សបាន​និយាយថា លោក សា​ធួ​នី​ណូ ដឺ ឡា ហ្វុន​តេ (Saturnino de la Fuente)​ជា​ជនជាតិ​អេ​ស្ប៉ាញ​ដែល​ពណ៌នា​ដោយ​​កំណត់ត្រា​ពិភពលោក​ហ្គី​ន​ណេ​ស​ថា​ជា​បុរស​ចាស់​ជាងគេ​បំផុត​របស់​ពិភពលោក បាន​ទទួលមរណភាព​កាលពី​ថ្ងៃ​អង្គារ​ទី​១៨​មករា​ក្នុង​ជន្មាយុ ១១២ ឆ្នាំ ៣៤១ ថ្ងៃ​។​

​លោក​ហ្វុន​តេ​បាន​ទទួលមរណភា​ព​នៅ​ផ្ទះ​របស់​គាត់​ក្នុង​ទី​ក្រុងឡេអន (León) ស្ថិត​នៅ​ភាគ​ពាយព្យ​នៃ​ប្រទេស​អេ​ស្ប៉ា​ញ​។​

​កំណត់ត្រា​ពិភពលោក​ហ្គី​ន​ណេ​ស​បាន​ប្រកាស​ឈ្មោះ​លោក​ហ្វុន​តេ​ជា​បុរស​មាន​វ័យ​ចំណាស់​ជាង​គេ​បំផុត​របស់​ពិភពលោក​កាលពី​ខែ​កញ្ញា ពេល​ដែល​គាត់​មាន​អាយុ ១១២ ឆ្នាំ ២១១ ថ្ងៃ​។​កំណត់ត្រា​នេះ​បាន​​និយាយថា លោក​ហ្វុន​តេ​បាន​កើត​នៅក្នុង​សង្កាត់​ផុន​តេ​កា​ស្ត្រូ (Puente Castro) នៃ​ទី​ក្រុងឡេអន​នៅ​ថ្ងៃទី ១១ ខែ​កុម្ភៈ ឆ្នាំ ១៩០៩ ។​

​ទីភ្នាក់ងារ​សារព័ត៌មាន​រដ្ឋ EFE របស់​ប្រទេស​អេ​ស្ប៉ាញ​បាន​រាយការណ៍​ថា លោក​ហ្វុន​តេ​គឺជា​អ្នកជំនាញដេរ​ស្បែក ហើយ​បាន​ចាប់ផ្តើម​ធ្វើការ​នៅក្នុង​រោងចក្រ​ស្បែកជើង​នៅ​អាយុ ១៣ ឆ្នាំ​។​

EFE និយាយថា លោក​ហ្វុន​តេ​បាន​រស់រាន​មានជីវិ​ត​ពី​ជំងឺ​គ្រុន​ផ្តាសាយអេ​ស្ប៉ាញ​ដែល​បាន​ផ្ទុះ​ឡើង​ក្នុង​ឆ្នាំ ១៩១៨ ហើយ​បាន​រៀបការ​ជាមួយ​ប្រពន្ធ​ឈ្មោះ អង់​តូ​នី​ណា (Antonina) ដោយ​មាន​កូនស្រី ៧ នាក់​និង​កូនប្រុស​ម្នាក់ បន្ទាប់មក​មាន​ចៅ ១៤ នាក់​និង​ចៅទួត ២២ នាក់​។​

EFE បាន​និយាយថា លោក​នឹង​ត្រូវ​បញ្ចុះ​នៅ​ថ្ងៃ​ពុធ​នេះ​នៅ​ឯ​ទី​បញ្ចុះសព​ក្នុង​ទី​ក្រុងឡេអន​៕

លោក សា​ធួ​នី​ណូ ដឺ ឡា ហ្វុន​តេ ស្លាប់​កាលពី​ថ្ងៃ​អង្គារ​នៅ​ជន្មាយុ ១១២ ឆ្នាំ ៣៤១ ថ្ងៃ