​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ កូន​គោមួយ​ក្បាល ដែល​កើត​នៅក្នុង​កសិដ្ឋាន​មួយ​ក្នុង​ប្រទេស​ឥណ្ឌា​បានចាប់ផ្តើម​ទាក់ទាញ​អ្នកទេសចរ​ដែល​ជឿ​ថា​វា​ជា​ការចាប់​កំណើត​របស់​ព្រះ​ហិណ្ឌូ​​ដោយសារ​ភ្នែក​ទី​បី​និង​រន្ធ​ច្រមុះ​មួយគូ​បន្ថែម​ទៀត​របស់​វា​។​

​ត្បិត​មាន​លក្ខណៈ​ចម្លែក​បែប​នេះ​ក្តី ក៏ប៉ុន្តែ​គោ​ដែល​កើត​នៅក្នុង​ភូមិ​រ៉ា​ចណាន (Rajnand) នៃ​រដ្ឋ​ឆា​តទី​ស​ហ្គា (Chhattisgarh) ត្រូវបាន​ចាត់ទុក​ថា​មាន​កាយសម្បទា​និង​សុខភាព​ល្អ​។​

​អ្នកស្រុក​ខ្លះ​បាន​អះអាង​កាលពី​ថ្ងៃ​អង្គារ​ទី​១៨​មករា​ថា កូន​គោ​នេះ​គឺជា​ការ​ចាប់កំណើត​របស់​ព្រះ​សិ​វៈ ជា​ព្រះ​មួយ​ក្នុងចំណោម​ព្រះ​ទាំងបី​នៃ​សាសនា​ហិណ្ឌូ​។​

​ប្រការ​នេះ​បាន​ញ៉ាំង​ឱ្យ​មនុស្ស​ធ្វើដំណើរ​យ៉ាង​ពិសេស​ទៅកាន់​កសិដ្ឋាន​នេះ​ដើម្បី​មើល​កូន​គោ​ភ្នែក​បី ដោយ​អ្នកខ្លះ​ជឿថា​ការចាប់​កំណើត​របស់​វា​នឹង​នាំមក​នូវ​សំណាង​និង​ភាពរុងរឿង​ដល់​ភូមិ​។​

​កសិករ​ឈ្មោះ នី​រ៉ា​ច ចាន់​ដែល (Neeraj Chandel) បាន​និយាយថា “​នៅពេល​ដែល​គោ​កើត​មក​ភ្លាម ពួកយើង​ស្មានតែ​វា​មាន​របួស​នៅលើ​ថ្ងាស​របស់​វា​មុន​ពេល​ឆ្លុះ​ពិល​ឃើញ​ភ្នែក​បី​។​បន្ទាប់មក​​យើង​បាន​រកឃើញ​រន្ធ​ច្រមុះ​បួន​បន្ថែមទៀត​ជាហេតុ​នាំ​ឱ្យ​អ្នកស្រុក​សម្រុក​មក​កក​កុញ​ពេញ​ផ្ទះ​របស់​យើង​បន្ទាប់ពី​ការ​កំណើត​របស់​វា​នៅពេល​យប់​”​។​

​អ្នកស្រុក​បាន​ធ្វើ​ដង្វាយ​ជាដូងនិង​ផ្កា​ដល់​កូនគោ​ទើបនឹង​កើត​នេះ​។​

​មេគោ​ធ្លាប់​កើត​បាន​កូន​គោ​ធម្មតា​ពីរ​ក្បាល​កាលពីមុន ហើយ​ឥឡូវ​ពួក​វា​ធំ​ពេញវ័យ​អស់ហើយ​។​

​តាម​វេជ្ជសាស្ត្រ ភ្នែក​ទី​បី​នៅ​លើ​សត្វ​ត្រូវ​បាន​បង្កឡើង​ដោយសារ​ជំងឺ​អ័រម៉ូន​៕

​កូន​គោ​ភ្នែក​បី​កើត​នៅ​ភូមិ​រ៉ា​ចណាន​នៃ​រដ្ឋ​ឆាត​ទី​ស​ហ្គា