ដោយៈ​មុនី​រ័ត្ន​/​ភ្នំពេញៈ រដ្ឋមន្ត្រី​ក្រសួងការបរទេស​កម្ពុជា ឧបនាយករដ្ឋមន្ត្រី ប្រាក់ សុខុន បាន​ជួបពិភាក្សា​ទ្វេភាគី​ជាមួយ​ជា លោក ប៊ូ​យ ថា​ញ់​សឺ​ន រដ្ឋមន្ត្រីការបរទេស​នៃ​សាធារណរដ្ឋ​សង្គមនិយម​វៀតណាម​នៅ​ព្រឹក​ថ្ងៃទី​២០​ខែមករា​ឆ្នាំ​២០២២​នៅ​ទីស្តីការក្រសួង ការបរទេស​កម្ពុជា​។

​ខ្លឹមសារ​លំអិត​ពុំទាន់​ត្រូវបាន​ផ្សព្វផ្សាយ​នៅឡើយ​ទេ​។​ប៉ុន្តែ​តាម​ប្រភព​បឋម​បាន​បញ្ជាក់ថា​នៅក្នុង​ជំនួប​ភាគី​ទាំងពីរ​បាន​ពិភាក្សា​អំពី​ការពង្រឹង​ទំនាក់ទំនង​ឲ្យ​កាន់តែ​ស៊ីជម្រៅ​បន្ថែមទៀត និង​កិច្ចសហប្រតិបត្តិការ​ទ្វេភាគី និង​ក្នុង​តំបន់​។​

​គួរ​បញ្ជាក់ថា តប​តាម​ការអញ្ជើញ​របស់លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស​និង សហប្រតិបត្តិការ​អន្តរជាតិ​នៃ​ព្រះរាជា ណា​ចក្រ​កម្ពុជា លោក ប៊ូ​យ ថា​ញ់​សឺ​ន រដ្ឋមន្ត្រី ការបរទេស​នៃ​សាធារណរដ្ឋ​សង្គមនិយម​វៀតណាម បាន​អញ្ជើញ​មក​បំពេញ​ទស្សនកិច្ច​ផ្លូវការ នៅ​ព្រះរាជាណាចក្រ​កម្ពុជា រយៈពេល​ពីរ​ថ្ងៃ ពីថ្ងៃ​ទី ១៩-២០ ខែមករា ឆ្នាំ​២០២២​។​

​ក្នុងឱកាស​នៃ​ដំណើរ​ទស្សនកិច្ច​នេះ លោក ប៊ូ​យ ថា​ញ់​សឺ​ន នឹង​អញ្ជើញ​ចូលជួប​សម្តែង​ការគួរសម​ដាច់ដោយឡែក​ពីគ្នា​ចំពោះ​សម្តេច​វិបុល សេនា​ភក្តី សាយ ឈុំ ប្រធានព្រឹទ្ធសភា សម្តេច​អគ្គ​មហា​ពញា​ចក្រី ហេង សំរិន ប្រធានរដ្ឋសភា និង​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ។​

​សេចក្តីប្រកាស​ព័ត៌មាន​ក្រសួងការបរទេស​បាន​រំលឹកថា ឆ្នាំ​២០២២ គឺជា​ឆ្នាំ​រំលឹក​ខួប​អនុស្សាវរីយ៍​លើក​ទី​៥៥​នៃ​ការបង្កើត​ទំនាក់ទំនង ការទូត និង​ជា «​ឆ្នាំ​មិត្តភាព​កម្ពុជា​-​វៀតណាម ២០២២» ដំណើរ​ទស្សនកិច្ច​ផ្លូវការ​របស់លោក ប៊ូ​យ ថា​ញ់​សឺ​ន មកកាន់​កម្ពុជា នឹង​បន្ត​ពង្រឹង និង​ធ្វើ​ឲ្យ​កាន់តែ​ស៊ីជម្រៅ​បន្ថែមទៀត​នូវ​ទំនាក់ទំនង​ទ្វេភាគី ដែល​ត្រូវបាន​កសាងឡើង​ដោយ​ឈរលើ​ស្មារតី​មិត្តភាព ជា​ប្រពៃណី ភាពជា​អ្នកជិតខាង​ល្អ និង​កិច្ចសហប្រតិបត្តិការ គ្រប់​ជ្រុងជ្រោយ​រវាង​កម្ពុជា និង​វៀតណាម ដើម្បី​ផលប្រយោជន៍​ទៅវិញទៅមក​សម្រាប់ ប្រជាជន​ទាំងពីរ​៕​សរន