ដោយ​: ភ្នំ​ខៀវ / បាត់ដំបងៈ មនុស្ស​ក្មេង ចាស់​ចំនួន ប្រាំ​នាក់ រងរបួស​ធ្ងន់ធ្ងរ នៅពេល​ជួប​ហេតុការណ៍ គ្រោះថ្នាក់​ចរាចរណ៍ រវាង​រថយន្ត​ធុន​ធំ បុក​ជាមួយ រថយន្ត​ធុន​តូច ប៉ើង​ធ្លាក់​ប្រឡាយទឹក នៅ​ល្ងាច​ថ្ងៃទី​១៩ ខែមករា ឆ្នាំ​២០២២ លើ​កំណាត់​ផ្លូវ​វាង​ក្រុង ត្រង់ចំណុច​ក្រុមទី​១៣ ក្នុងភូមិ​ជ្រៃ​ថ្មី ឃុំ​ជ្រៃ ស្រុក​ថ្មគោល ខេត្តបាត់ដំបង​។​

​សមត្ថកិច្ច បាន​ឲ្យ​ដឹងថាៈ គ្រោះថ្នាក់​នេះ ដំបូង​ឡើយ​គេ​ឃើញ​រថយន្ត​ដឹក​គ្រឿង ចក្រ ធុន​ធ្ងន់ មួយគ្រឿង ម៉ាក ISUZU ពណ៌ ស គ្មាន​ស្លាក​លេខ​បានធ្វើ​ដំណើរ ចេញពី​ចំណុច​ផ្លូវលំ ចំណែក​រថយន្ត​ធុន​តូច មួយគ្រឿង​ទៀត ម៉ាក​តូយ៉ូតា កាមរី​(​ឆ្លាម​) ពណ៌​ទឹកប្រាក់ ពាក់​ស្លាក លេខ ភ្នំពេញ ២F-៩៨៦៦​បើកបរ​លើ ផ្លូវជាតិ លុះដល់​ចំណុច​ផ្លូវបំបែក​ប្រសព្វ រថយន្ត​ធុន​ធំ បាន​បុក​លើ​រថយន្ត​ធុន​តូច ពេញទំហឹង បណ្តាល​ប៉ើង​ធ្លាក់ចូល​ប្រឡាយទឹក​តែម្តង​។​

​ពលរដ្ឋ​នៅ​ទីតាំង​កើតហេតុ បាន​ប្រាប់ថាៈ ភាគី​ខាង​រថយន្ត​តូច ផ្ទុក​មនុស្ស ក្មេង​ចាស់ ប្រុស​ស្រី ចំនួន ប្រាំ​នាក់ រងរបួស​ធ្ងន់ធ្ងរ មិនទាន់​ស្គាល់​អត្តសញ្ញាណ នៅឡើយ ត្រូវ​បញ្ជូនទៅ​សង្គ្រោះបន្ទាន់ នៅ​មន្ទីរពេទ្យ​។​

​នគរបាល​ស្រុក​ថ្មគោល បានលើកឡើង​ថាៈ ករណីនេះ កម្លាំង​ផ្នែក​ជំនាញ ស្រុក បានរៀបចំ​ប្រគល់ ឱ្យ​នគរបាល​ការិយាល័យ នគរបាល​ចរាចរណ៍​ផ្លូវគោក ខេត្តបាត់ដំបង ហើយ ដើម្បី​ចាត់ចែង និង​ហៅ​ភាគី​ពាក់ព័ន្ធ​ឲ្យ​ចូលខ្លួន​ដើម្បី ដោះស្រាយ​៕/V​-PC