​ដោយៈ សុផល / ភ្នំពេញៈ តប​តាម​ការអញ្ជើញ​របស់ លោក​ទេសរដ្ឋមន្ត្រី ប្រាក់ សុខុន រដ្ឋមន្ត្រីការបរទេស និង​សហប្រតិបត្តិការ​អន្តរជាតិ​នោះ លោក ប៊ូ​យ ថា​ញ់​សឺ​ន រដ្ឋមន្ត្រីការបរទេស​វៀតណាម បាន​អញ្ជើញ​មក​បំពេញ ទស្សនកិច្ច​ផ្លូវការ នៅ​កម្ពុជា ចាប់ពី​ថ្ងៃទី​១៩ ដល់​ថ្ងៃទី​២០ ខែមករា ឆ្នាំ​២០២២​។​

​នៅ​ព្រឹក​ថ្ងៃទី​២០ ខែមករា ឆ្នាំ​២០២២​នេះ សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បានអនុញ្ញាត​ឱ្យ លោក ប៊ូ​យ ថា​ញ់​សឺ​ន (Bui Thanh Son) រដ្ឋមន្ត្រីការបរទេស វៀតណាម ចូលជួប​សម្តែង​ការគួរសម និង​ពិភាក្សា ការងារ​មួយចំនួន​។​

​ក្រៅពី​ជួប​សម្តែង​ការគួរសម​នឹង​សម្តេច​តេ​ជោ​ហើយ​នោះ លោក ប៊ូ​យ ថា​ញ់​សឺ​ន នឹង​អញ្ជើញ​ចូលជួប​សម្តែង​ការគួរសម ដោយឡែក​ជាមួយ សម្តេច​វិបុល​សេនា​ភក្តី សាយ ឈុំ ប្រធានព្រឹទ្ធសភា និង​សម្តេច​ពញា​ចក្រី ហេង សំរិន ប្រធានរដ្ឋសភា នៅ​រសៀល ថ្ងៃទី​២០ ខែមករា ឆ្នាំ​២០២២ នេះ​។​

​ឆ្នាំ​២០២២ គឺជា​ឆ្នាំ​រំលឹក​ខួប​អនុស្សាវរីយ៍ លើក​ទី​៥៥ នៃ​ការបង្កើត​ទំនាក់ទំនង​ការទូត និង​ជា «​ឆ្នាំ​មិត្តភាព​កម្ពុជា​-​វៀតណាម ២០២២» ដំណើរ​ទស្សនកិច្ច​ផ្លូវការ របស់លោក ប៊ូ​យ ថា​ញ់​សឺ​ន មកកាន់​កម្ពុជា នឹង​បន្ត​ពង្រឹង និង​ធ្វើ​ឲ្យ​កាន់តែ​ស៊ីជម្រៅ​បន្ថែមទៀត នូវ​ទំនាក់ទំនង​ទ្វេភាគី ដែល​ត្រូវបាន​កសាងឡើង ដោយ​ឈរលើ​ស្មារតី​មិត្តភាព ជា​ប្រពៃណី ភាពជា​អ្នកជិតខាង​ល្អ និង​កិច្ចសហប្រតិបត្តិការ គ្រប់​ជ្រុងជ្រោយ រវាង​កម្ពុជា និង​វៀតណាម ដើម្បី​ផលប្រយោជន៍ ទៅវិញទៅមក សម្រាប់​ប្រជាជន​ទាំងពីរ​៕/V​