​ប្រែ​សម្រួល : កញ្ញា​ដា​លី​ស (​ស្ពុត​និក​) ៖ វេបសាយ Politico បាន​រាយការណ៍​កាលពី​ថ្ងៃ​ពុធ​ទី​១៩​មករា​ថា អេ​ស្តូ​នី លី​ទុយ​អា​នី និង​ឡេតូ​នី​កំពុង​រង់ចាំ​ការយល់ព្រ​ម​ពី​សហរដ្ឋ​អាម៉េរិក​ដើម្បី​​បញ្ជូន​សព្វា​អាវុធសាហាវៗ​ដែល​ផលិត​ដោយ​អាម៉េរិក​ទៅកាន់​អ៊ុ​យក្រែន ដើម្បី​ទប់ស្កាត់​ការឈ្លានពាន​របស់​រុស្ស៊ី​។​

​របាយការណ៍​របស់​វេប​សាយនេះ ដែល​ដកស្រង់​ប្រភព​មន្ត្រី​ពី​ប្រទេស​ទាំង​បី​និង​មនុស្ស​ដែល​ដឹង​រឿងនេះ បាន​និយាយថា​ប្រទេស​នៅ​តំបន់​បាល់​ទិក​ទាំង​បី​បាន​ត្រៀម​ខ្លួន​រួចរាល់​​ដើម្បី​ផ្ទេរ​អាវុធ​ដូចជា​មី​ស៊ី​ល​ប្រឆាំង​រថពាសដែក​និង​មី​ស៊ី​លបាញ់​ពី​ដី​ទៅ​អាកាស​ទៅកាន់​អ៊ុ​យក្រែន​។​

​ព្រឹទ្ធ​សមាជិក​លោក ជី​ម រី​ស (Jim Risch) ជា​មន្ត្រី​កំពូល​នៃ​គណបក្ស​សាធារណរ​ដ្ឋ​នៅ​គណៈកម្មាធិការ​ទំនាក់ទំនង​បរទេស​របស់​ព្រឹទ្ធសភា បាន​ប្រាប់ Politico ថា គាត់​សង្ឃឹម​ថា​រដ្ឋបាលបៃដិ​ន​​នឹង​យល់ព្រម​ភ្លាមៗ​នូវ​ការផ្ទេរ​អាវុធ​ទៅ​អ៊ុ​យក្រែន​។​

​បទ​ប្បញ្ញត្តិ​អាជ្ញាប័ណ្ណ​នាំ​ចេញ​របស់​សហរដ្ឋ​អាម៉េរិក​តម្រូវ​ឱ្យ​ប្រទេស​តំបន់​បាល់​ទិក​ស្វែងរ​កការយល់ព្រម​ពី​ក្រសួង​ការបរទេស​អាម៉េរិក​ជាមុនសិន មុន​នឹង​ផ្ទេរ​អាវុធ​ទៅ​អ៊ុ​យក្រែន​។​

​ប្រទេស​តំបន់​បាល់​ទិក​ទាំង​បី​គឺ​ជា​សមាជិករ​បស់​ណា​តូ ហើយ​បាន​គាំទ្រ​ក្នុង​ការជំរុញ​វត្តមាន​របស់​សម្ពន្ធមិត្ត​នៅក្នុង​ប្រទេស​របស់​ពួកគេ​។​

​របាយការណ៍​បាន​និយាយថា ក្រសួងការបរទេស​អាម៉េរិ​ក​បាន​បដិសេធ​មិន​ធ្វើ​អត្ថាធិប្បាយលើ​បញ្ហា​នេះ​ទេ ហើយ​សេត​វិមាន​មិនបាន​ឆ្លើយតប​ទៅនឹង​សំណើ​សុំ​ការបំភ្លឺ​នោះទេ​។​

​បណ្តា​ប្រទេស​លោកខាងលិច​និង​រដ្ឋាភិបាល​ទីក្រុង​គៀវ​នា​ពេល​ថ្មីៗ​នេះ​បាន​សម្តែង​ការព្រួយបារម្ភ​អំពី “​សកម្មភាព​ឈ្លានពាន​” របស់​រុស្ស៊ី​នៅ​ជិត​ព្រំដែន​ជាមួយ​អ៊ុ​យក្រែន​។ ទីក្រុង​គៀវ​បាន​ចោទ​ទីក្រុង​មូ​ស្គូ​ពី​ការបង្កើន​កម្លាំងយោធា​និង​ការត្រៀមខ្លួន​សម្រាប់​ការ​លុកលុយ​ប្រទេសជិតខាង​។ ទោះយ៉ាងណា រុស្ស៊ី​បដិសេធ​ការចោទប្រកាន់​នេះ ហើយ​បញ្ជាក់​ជា​ថ្មី​ថា​ខ្លួន​មិន​មាន​ចេតនា​វាយប្រហារ​ប្រទេស​ណាមួយ​​ឡើយ​។ ជាងនេះទៅទៀត ទីក្រុង​មូ​ស្គូ​ចាត់ទុ​កការចោទប្រកាន់​នេះ​ថា​ជា​លេស​សម្រាប់​ការ​ដាក់​ពង្រាយ​សម្ភារៈ​យោធា​របស់​ណា​តូ​បន្ថែម​ទៀត​នៅ​ជិត​ព្រំដែន​រុស្ស៊ី​៕

ប្រទេស​នៅ​តំបន់​បាល់​ទិក​ទាំង​បី​ត្រៀម​ខ្លួន​រួចរា​ល់​ដើម្បី​ផ្ទេរ​អាវុធ​ដូចជា​មី​ស៊ី​ល​ប្រឆាំង​រថពាសដែក​និង​មី​ស៊ី​លបាញ់​ពី​ដី​ទៅ​អាកាស​ទៅកាន់​អ៊ុ​យក្រែន