ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ អ៊ុយ​ក្រែន​បាន​អង្វរ​អាល្លឺម៉ង់​សុំ​អាវុធ​ដើម្បី​រារាំង​ការវាយប្រហារ​របស់​រុស្ស៊ី ដោយ​បង្កើន​សម្ពាធ​លើ​លោក​អធិការបតី អូ​ឡា​ហ្វ ស្កូ​ល (Olaf Scholz) ដែល​រហូតមកទល់​ពេលនេះ មិន​បាន​ឆ្លើយតប​អ្វី​សោះ​ចំពោះ​ការអំពាវនាវ​ឱ្យ​ផ្តល់​ជំនួយ​យោធា បើទោះបីជា​មាន​ការ​ព្រមាន​ថា​លោកពូ​ទីន​ហៀបនឹង​ចូល​ឈ្លានពាន​ក៏ដោយ​។​

​លោក អេន​ឌ្រី មែ​ល​នី​ក (Andriy Melnyk) ជា​ឯកអគ្គរដ្ឋទូត​អ៊ុយ​ក្រែន​ប្រចាំ​ទីក្រុង​បែរ​ឡាំង បាន​និយាយ​កាលពី​ថ្ងៃ​ពុធ​ទី​១៩​មករា​ថា​អ៊ុយ​ក្រែន​ចង់​ឱ្យ​នាវាចម្បាំង​រប​ស់​អាល្លឺម៉ង់​ជួយ​ការពារ​​ប្រឆាំងនឹង​ការវាយប្រហារ​របស់​រុស្ស៊ី​នៅលើ​ឆ្នេរសមុទ្រ​របស់ខ្លួន​នៅ​សមុទ្រ​ខ្មៅ និង​សមុទ្រ​អា​ហ្សូ​វ (Azov)​និង​ប្រព័ន្ធ​ប្រឆាំង​យន្តហោះ​ដើម្បី​ការពារ​ការវាយប្រហារ​ពីលើ​អាកាស​។​

​ដំណឹង​នេះ​កើត​ឡើង​បន្ទាប់ពី​លោក​ស្កូល ដែល​គេ​ចោទ​ថា​ធ្វើឱ្យ​អឺរ៉ុប​និង​ការឆ្លើយតប​របស់​អង្គការ​ណា​តូ​ចំពោះ​រុស្ស៊ី “​ចុះខ្សោយ​” ជាមួយនឹង​ជំហរ​ទន់ភ្លន់​របស់គាត់​កាលពី​ថ្ងៃ​អង្គារ​បាន​ច្រាន​ចោល​គំនិត​​នៃ​ការផ្គត់ផ្គង់​សូម្បី​តែ​អាវុធ​ការពារជាតិ​ដល់​ទីក្រុង​គៀវ ដោយ​លើកឡើង​ពី​គោលនយោបាយ​ដែល​មាន​ជា​យូរយារ​ណាស់​មកហើយរ​បស់​អាល្លឺម៉ង់​។​

​រឿង​ដូច្នេះ​នៅ​តែ​កើត​ឡើង បើទោះបីជា​ប្រទេស​ផ្សេងទៀត​បាន​បញ្ជូន​ជំនួយ​យោធា​ជា​បន្តបន្ទាប់​ក៏​ដោយ​ដោយ​ចក្រភព​អង់គ្លេស​កាលពី​ថ្ងៃ​អង្គារ​បាន​ផ្គត់ផ្គង់​អ៊ុយ​ក្រែន​ជាមួយនឹង​មី​ស៊ីល​ប្រឆាំង​រថ​​ក្រោះ​ក្នុង​ការប៉ុនប៉ង​ដើម្បី​រារាំង​ការឈ្លានពាន​របស់​រុស្ស៊ី​។​

​លោក​ឯកអគ្គរដ្ឋទូត​មែ​ល​នី​កបាន​ប្រាប់​ប្រព័ន្ធ​ផ្សព្វផ្សាយ​អាល្លឺម៉ង់​ថា​”​រឿង​ចម្បង​គឺថា​នាវាចម្បាំង​អាល្លឺម៉ង់​ស្ថិតក្នុង​ចំណោម​នាវា​ល្អ​ដាច់​គេ​នៅ​ក្នុង​ពិភពលោក​ដែល​យើង​ត្រូវការ​ជា​បន្ទាន់​សម្រាប់​ការ​​ការពារ​ដ៏​រឹងមាំ​នៃ​ឆ្នេរ​សមុទ្រ​ដ៏​វែង​នៅ​សមុទ្រ​ខ្មៅ និង​សមុទ្រ​អា​ហ្សូ​វ​”​។​

“​ក៏​មាន​តម្រូវការ​ដ៏​ធំ​ដូចគ្នា​ដែរ​សម្រាប់​ប្រព័ន្ធ​ការពារ​ដែនអាកាស​ទំនើ​ប​បំផុត ដែល​បច្ចុប្បន្ន​កំពុង​ត្រូវបាន​ផលិត​ដោយ​ក្រុមហ៊ុន​សព្វាវុធ​អាល្លឺម៉ង់​”​។​

​អាល្លឺម៉ង់​យក​លេស​ដោះសារ​ចំពោះ​ជំហរ​ទន់ភ្លន់​របស់ខ្លួន​ចំពោះ​រុស្ស៊ី ដោយ​អះអាង​ថា​ខ្លួន​ជំពាក់​បំណុល​ប្រវត្តិសាស្ត្រ​ចំពោះ​ទីក្រុង​មូ​ស្គូ​ដោយសារតែ​អំពើ​ឃោរឃៅ​ដែល​ប្រព្រឹត្ត​ដោយ​ពួក​ណា​ស៊ី​ប្រឆាំង​​នឹង​សូ​វៀត​ក្នុងអំឡុង​សង្គ្រាមលោកលើកទីពីរ​។​

​រឿង​នេះ​ក៏​ជា​លេស​ចំពោះ​ការហាមឃាត់​ការនាំ​ចេញ​អាវុធ​សាហាវៗ​ផងដែរ​។​

​ប៉ុន្តែ​ការវែកញែក​បែបនេះ​គឺ​មិន​សម​ហេតុផល​ចំពោះ​ទីក្រុង​គៀវ​ទេ ដែល​ចង្អុលបង្ហាញ​ថា​ពួក​ណា​ស៊ី​ក៏​បាន​កាន់កាប់​ផ្នែក​ដ៏​ធំ​នៃ​អឺរ៉ុប​ខាងកើត​ដែរ រួម​ទាំង​អ៊ុយ​ក្រែន​ក្នុងអំឡុង​សង្គ្រាមលោក​លើក​​ទី​ពីរ​និង​បាន​ប្រព្រឹត្ត​អំពើ​ឃោរឃៅ​ដ៏​អាក្រក់​បំផុត​នៅ​ទីនោះ​។​

​លោក​មែ​ល​នី​ក​បាន​បន្ថែមថា “​វា​គួរ​ឱ្យ​ភ្ញាក់ផ្អើល​ណាស់​ដែល​នៅ​ទីក្រុង​បែរ​ឡាំង សំណួរ​នៃ​ទំនួល​ខុស​ត្រូវ​ប្រវត្តិសាស្ត្រ​ត្រូវបាន​ប្រើ​ជាទឡី​ក​រណ៍​សម្រាប់​ការបដិសេ​ធ​ជំនួយ​យោធា​”​។​

“​ទំនួល​ខុស​ត្រូវ​នេះ​គួរតែ​អនុវត្ត​ចំពោះ​ប្រជាជន​អ៊ុយ​ក្រែន​ដែល​បាន​បាត់បង់​ជីវិ​ត​យ៉ាងហោច​ណាស់​ប្រាំបី​លាន​នាក់​ក្នុង​អំឡុង​ពេល​ដែល​ពួក​ណា​ស៊ី​អាល្លឺម៉ង់​កាន់កាប់​អ៊ុ​យក្រែន​”៕

​អ៊ុយ​ក្រែន​អង្វរ​អាល្លឺម៉ង់​ឱ្យ​បញ្ជូន​នាវាចម្បាំង​និង​ខែល​មី​ស៊ី​ល​មកជួយ​ទប់ទល់​ការឈ្លានពាន​ពី​រុស្ស៊ី