ដោយៈ​សុខុម​/​ក្រចេះៈ​ចម្លាក់​ឈើ​ដែល​កែច្នៃ​ជាវ​ត្ថុ​អនុស្សាវរីយ៍​ជាច្រើន​ប្រភេទ​សម្រាប់​តុបតែង​លម្អ​ឬ​ជា​គ្រឿង​សក្ការៈ​សម្រាប់​គោរពបូជា​ក្នុង​គេហដ្ឋាន​ត្រូវបាន​ដាក់តាំង​លក់​ជាច្រើន​នៅ​តំបន់​ទេសចរណ៍​អន្លង់​ផ្សោត​កាំ​ពី​ខេត្តក្រចេះ​។​ផលិតផល​ដោយ​ដៃ​នេះ​ទទួលបាន​នូវ​ការចាប់អារម្មណ៍​យ៉ាងខ្លាំងអំពី​ភ្ញៀវ​ជាតិ​និង​បរទេស​ដែល​ធ្វើដំណើរ​មកដល់​ទីនេះ​។​ទោះជា​ភ្ញៀវ​ខ្លះ​ពុំបាន​ទិញ​ក៏ដោយ​ក៏​ពួកគេ​មិន​ភ្លេច​នឹង​ឈរ​ទស្សនា​យ៉ាង​ជក់ចិត្ត​លើ​វ​ត្តុ​អនុស្សាវរីយ៍​ទាំងនេះ​ដែរ​។​ប៉ុន្តែ​ជារឿយៗ​អ្នកទេសចរ​តែងតែ​ទិញ​នូវ​វត្ថុ​ទាំង​ឡាយ​ដែល​ទាក់ទង​នឹង​ខេត្តក្រចេះ ឬ អន្លង់​ផ្សោត​ដើម្បី​ទុកជា​អនុស្សាវរីយ៍​មិនដែល​ខាន​។​

ទៅ​ស្តាប់​អ្នកធ្វើ អ្នកលក់​ចម្លាក់​ឈើ​នៅ​អន្លង់​ផ្សោត​កាំ​ពី រៀបរាប់​ពីមុខ​របរ​មួយ​នេះ​(រូបថត សុខុម)

​ពិ​តណាស់​! មុខរបរ​ចម្លាក់​ឈើ​នេះ​មិនកើតឡើង​ដោយ​ងាយស្រួល​ទេ ។​ពីព្រោះ​វា​ការងារនេះត្រូវធ្វើដោយ​ដៃ​សុទ្ធសាធ​បើទោះបី ជា​បច្ចុប្បន្ន​មាន​គ្រឿង​ម៉ាស៊ីន​ជា​ជំនួយ​លើ​ផ្នែក​ខ្លះ​ក៏ដោយ​។​ផលិតផល​មួយ​នេះ​កើតចេញពី​ការព្យាយាម​តស៊ូ​ដោយ​បង្ហូរញើស​របស់​អ្នក​នៅក្បែរ​តំបន់​ទេសចរណ៍​កាំ​ពី​។ ​ប៉ុន្តែ​វា​ក៏​ជា​ប្រភព​ចំណូល​មួយ​ផងដែរ​សម្រាប់​ផលិតករ ឬ​អ្នកលក់ដូរ​ផលិតផល​។​

​យើង​សូមណែនាំ​អារម្មណ៍​ប្រិយមិត្ត​​បន្តិច​អំពី​រមណីយដ្ឋាន​ធម្មជាតិ​មួយ​នេះ ។ មុននឹង​ទៅដល់​រមណីយដ្ឋាន​ទេសចរណ៍​ផ្សោតកាំ​ពី​ខេត្តក្រចេះ ដែល​ស្ថិតនៅ​ក្នុងភូមិ​កាំ​ពី ឃុំ​សំបុក ស្រុក​ចិត្រ​បុរី​  យើង​អាចធ្វើ​ដំណើរ​ពី​ក្រុង​ក្រចេះ​តាមផ្លូវ​ជាតិ​លេខ​៧​ចាស់​ដែល​នៅ​ប្រប​តាម​ដងទន្លេមេគង្គ​ដោយ​ឆ្ពោះទៅកាន់​ទិស​ខាងជើង​។​ការធ្វើដំណើរ​លើ​ចម្ងាយ​ប្រមាណ​១៤​គីឡូម៉ែត្រ យើង​នឹង​បាន​ទៅដល់​ទីនោះ​ដែល​ស្ថិតនៅ ខាងឆ្វេង​ដៃ​។​អន្លង់​ផ្សោត​កាំ​ពី ត្រូវបាន​មនុស្ស​គ្រប់គ្នា​ស្គាល់​ថា មាន​នៅតែ​ក្នុង​ខេត្តក្រចេះ​មួយ​ប៉ុណ្ណោះ​។​

​អ្នកទេសចរ​ឬ​ភ្ញៀវ​ទាំងឡាយ​ដែល​ធ្វើដំណើរ​ទៅ​រមណីយដ្ឋាន​ធម្មជាតិ​មួយ​នេះ​ដំបូង​ពិតជា​មាន​អារម្មណ៍​ប្លែក​ជាមួយនឹង​ទិដ្ឋភាព​ទាំងឡាយ​នៅតាម​ដងផ្លូវ​។​អម​សងខាង​ផ្លូវ​កៅស៊ូ​ធំ​ល្មម​យើង​អាច​មើលឃើញ​ភូមិឋាន​របស់​អ្នកស្រុក​នៅជាប់រដឹក​មិន​ដាច់​។​សំណង់​ខ្លះ​ធ្វើ​អំពី​ឈើ​ដែល​រក្សា​នូវ​ទម្រង់​បែប​ខ្មែរ ។​សំណង់​ខ្លះ​សង់​អំពី​បេតុង​បែប​ទំនើប​ក្លាយ​ឬ​សំណង់​ខ្លះ​បែប​ស៊ី​វិ​ល័យ​តែម្តង​។​នៅតាម​ដងផ្លូវ​ដដែល​នេះ​ក៏មាន សកម្មភាព​លក់ដូរ​ចម្រុះ​របស់​ប្រជាពលរដ្ឋ​នៅ​ទីនោះ​ផងដែរ​។​ប៉ុន្តែ​គេ​សង្កេតឃើញ​ការលក់​ក្រឡាន​(​បាយដំណើប​ចម្អិន​ដោយ​បំពង់​ឫស្សី​ស្រស់​មាន​លាយ​អំបិល​និង​ខ្ទិះដូង​ជាដើម​) លក់​ក្រូចថ្លុង ពោត ណែម​ត្រី​។​ល​។​និង​។​ល​។​ជាទូទៅ​ទាក់ទង​នឹង​អ្វីដែល​អាច​ទិញ​ទទួលទាន បាន​ភ្លាមៗ​។​

ទៅ​ស្តាប់​អ្នកធ្វើ អ្នកលក់​ចម្លាក់​ឈើ​នៅ​អន្លង់​ផ្សោត​កាំ​ពី រៀបរាប់​ពីមុខ​របរ​មួយ​នេះ​(រូបថត សុខុម)

​យើង​ងាក​ទៅ​ស្តាប់​អ្នក​ផលិត​វត្ថុ​អនុស្សាវរីយ៍​សម្រាប់​លក់​ដូរ​នៅ​រមណីយ​ដ្ឋា​អន្លង​ផ្សោត​កាំ​ពី​វិញ​ម្តង​។​បុរស​វ័យ​ចំណាស់​ម្នាក់​អង្គុយ​ក្រោមផ្ទះ ដែល​ក្នុង​ដៃ​កំពុង​ប្រើ​ម៉ាស៊ីន​ខាត់​ទៅលើ​ដុំ​ឈើ ដែលមាន​រាង​ជា​កូន​ត្រី​បាន​ប្រាប់​ឲ្យ​ដឹងថា មុខរបរ​ឆ្លាក់​ឈើ គេ​ធ្វើ​នៅពេល​ទំនេរ ពី​ការងារ ផ្សេងទៀត​។ របរ​នេះ​ដើម្បី​បង្កើន​ប្រាក់ចំណូល​ដល់​ក្រុមគ្រួសារ​។​

​បុរស​រូបនេះ​បាន​និយាយទៀតថា​ការងារ​មួយ​នេះ​វា​ពិតជា​លំបាក​ណាស់​។​វា​តម្រូវ​ឲ្យ​យើង​ទៅរក​ឈើ​ដែល​សេសសល់​ឬ​ទិញ​ត​ពី​គេ​យកមក​ឆ្លាក់​ចេញ​ជា​រូបចម្លាក់​នានា មានដូចជា សត្វ​ផ្សោត ត្រី កង្កែប ត្រប់ និង របស់​ប្រើប្រាស់​ផ្សេងទៀត​រួមមាន គ្រឿង​តុបតែង ជាច្រើន​មុខ​ដែល​អាចធ្វើ​ទៅបាន​។​

និយាយ​បណ្ដើរ​បន្តការងារ​បណ្តើ​រ​បុរស​នេះ​រៀបរាប់​អំពី​វិធី​មុន​សម្រេចបាន​ផលិតផល​ឈើ​អនុស្សាវរីយ៍​។​លោក​ប្រាប់ថា ដំបូង​ឡើយ គេ​ត្រូវ​ជ្រើស​ប្រភេទ​ឈើ​សម្រាប់​យកមក​កែច្នៃ​។​ឈើ​ខ្លះ​អាច​កែ​ច្នែ​បាន​មិន​ដូចគ្នា​ទេ​។​ដូចនេះ​ការ​ជ្រើស​សម្រាំង​ប្រភេទ​ឈើ គឺ​អ្នក​ផលិត​ត្រូវតែមាន​ការយល់ដឹង​ឱ្យ​ច្បាស់​ជាមុនសិន​។​លោក​បន្តថា​ពីមុន​ចម្លាក់​ឈើ​ត្រូវ​ប្រើ​ដោយ​ដៃ​សុទ្ធសាធ​។​ការយក​ឈើ​មក​ដាប់​ឆ្លា​ក់ដោយ​ប្រើ​ពន្លាក មិន​ងាយ​រួចរាល់​នោះទេ​និង​ត្រូវ​ប្រើ​កម្លាំង​ច្រើន​។​បច្ចុប្បន្ន​មាន​ភាព​ងាយ​បន្តិច​ដោយហេតុថា គេ​ប្រើ​ម៉ាស៊ីន​ម៉ូ​ទ័​រ ខ្នាតតូច​ជា​ជំនួយ​ក្នុង​កែច្នៃ​ចម្លាក់ ទៅតាម​ចំណង់​ចិត្ត ដែល​យើង​ចង់បាន​។ ការធ្វើ​បែបនេះ​ងាយស្រួល​ជាង​មុន​និង ផលិត​បាន​លឿន​ជាង​មុន​។​ប៉ុន្តែ​អ្វី​ដែលជា​បញ្ហា គឺ​ទេពកោសល្យ​ឬ សិល្បៈ​ក្នុង​ការផលិត​វត្ថុ​ទាំងនេះ​ទៅតាម​ក្បួនខ្នាត មាន​សោភណភាព​ទាក់ទាញ​ឬ​អត់​តែប៉ុណ្ណោះ​។​

ទៅ​ស្តាប់​អ្នកធ្វើ អ្នកលក់​ចម្លាក់​ឈើ​នៅ​អន្លង់​ផ្សោត​កាំ​ពី រៀបរាប់​ពីមុខ​របរ​មួយ​នេះ​(រូបថត សុខុម)

​លោក​បន្តថា មុខរបរ​នេះ​មិនបាន​ប្រាក់​ច្រើន​ទេ ប៉ុន្តែ​ក៏​អាចជួយ​បង្កើន​ប្រាក់ចំណូល​ខ្លះ​ដែរ សម្រាប់​ក្រុមគ្រួសារ​។ ពីព្រោះថា តម្រូវការ​អ្នកលក់​នៅ​តំបន់​ទេសចរណ៍​គេ​នៅ​បន្ត​ការបញ្ជាទិញ​ជា​ហូរហែ​។​ប៉ុន្តែ​រយៈពេល​ជាង​មួយ​ឆ្នាំង​ចុងក្រោយ​នេះ មុខរបរ​បន្ថែម​មួយ​នេះ​បាន​ថយចុះ រហូត​ធ្វើឱ្យ​អ្នកខ្លះ​បាន​បោះបង់ចោល​ទៅ​ប្រកប​របរ​ផ្សេង​វិញ​។​

​បុរស​ជាង​ឆ្លាក់​ឈើ​បាន​បញ្ជាក់ថា ពីមុន​មាន​អ្នក​ប្រកបមុខរបរ​នេះ​ច្រើនណាស់ ប៉ុន្តែ​ចាប់ពី​ជំងឺ កូ​វីដ​១៩ រាតត្បាត​មក គ្មាន​ទេសចរ​មក​កម្សាន្ត​មក​ទស្សនា​រមណីយដ្ឋាន​កាំ​ពី​ឡើយ​។​ដូចនេះ​ផលិតផល​មិនអាច​លក់​ចេញ​បាន​។​អ្នកលក់​បាត់​ចំណូល​។​ចំណែក​អ្នកធ្វើ​មិនមាន​អ្នក​កុម្មង់​ទិញ​។ ហេតុនេះហើយ អ្នកខ្លះ​ក៏​បោះបង់​មុខរបរ​នេះ​ចោល​ដោយ​ចាប់​ការងារ​ផ្សេង​។​

​អ្នកស្រី ឈ្នាង ណា​លីន អ្នកលក់​ចម្លាក់​ឈើ​នៅ​កាំ​ពី​បាន​ប្រាប់​រស្មី​កម្ពុជា​ថា ចម្លាក់​ឈើ តាំង​លក់​ទាំងអស់នេះ​នាង​បានទទួល​កុម្មង់​មកពី អ្នកធ្វើ​នៅក្នុង​ភូមិ​ក្បែរ​នោះ​។ ប្រភព​ឈើ​ទាំងនោះ​ភាគច្រើន​ជា​ឈើប្រណិត​ដូចជា បេង នាងនួន និង​ឈើ​កម្រ​ប្រភេទ​គ្រញូង​រួមទាំង​ឈើ មួយចំនួនទៀត​ដែល​សេសសល់​។​

​ណា​លីន រៀបរាប់​អំពី​ស្ថានភាព​លក់ដូរ​នៅ​រមណីយដ្ឋាន​នេះ​។ អ្នកស្រី​បញ្ជាក់ថា នៅក្នុង​តំបន់ ទេសចរណ៍​ផ្សោត​កាំ​ពី មុន​ផ្ទុះ​ជំងឺ​កូ​វីដ​១៩​ខ្លាំង​មាន​ភ្ញៀវទេសចរ​ជាច្រើន​ក្នុង​មួយថ្ងៃ​បានមក​កម្សាន្ត​នៅ​ព្រែក​កាំ​ពី ។ ចំនួន​ភ្ញៀវ​ច្រើន​ធ្វើ​ឲ្យ​ការលក់ ដូរ​ក៏​ដាច់​តាម​ហ្នឹង​ដែរ​។ ក៏ប៉ុន្តែ​ពេល​មានការ​រាតត្បាត​ជំ​ង ដ៏​កាច​សាហាវ​នេះ​មិនមាន​ភ្ញៀវ​ច្រើន​ដូចពេលមុន​ឡើយ ធ្វើឱ្យ​ការលក់ដូរ​ស្ងាត់ឈឹង​។​

​អ្នកស្រី ណា​លីន បន្តថា បន្ទាប់ពី​ស្ថានភាព​ជំងឺ​កូ​វីដ​១៩​បាន​ធូរស្រាល​វិញ ហើយ​ប្រមុខ​រាជរដ្ឋាភិបាល​បើក​ប្រទេស​ឡើងវិញ​នោះ ភ្ញៀវទេសចរ​ក៏បាន​ចាប់ផ្ដើម​មក​កម្សាន្ត​នៅ​អន្លង់​ផ្សោត​កាំ​ពី​ជា​បណ្ដើរៗ​ឡើងវិញ​បើទោះជា​មិនទាន់មាន​ចំនួន​ច្រើន​ដូច​គ្រា​មុន​ក៏ដោយ​។​ពេលនេះ​រមណីយដ្ឋាន​ផ្សោត​កាំ​ពី​ហាក់​មានជីវិត​ឡើងវិញ​។​របរ​លក់​វត្ថុ​អនុស្សាវរីយ៍​ក៏​ហាក់​ល្អ​ជាង​មុន​ដែរ​។​មាន​អ្នកទិញ​ចម្លាក់​ឈើ​ជា​បណ្ដើរៗ ធ្វើឱ្យ​នាង​មាន​ក្តីសង្ឃឹម​ឡើងវិញ ក្នុងការ​ទទួលបាន​ប្រាក់ចំណូល​ដល់​ក្រុមគ្រួសារ​។ ចំណែក​អ្នក​ផលិត​ក៏​នឹង​មាការងារ​ធ្វើ​ច្រើននិងមានចំណូលដូច​មុន​ដែរ​៕​សរន​

ទៅ​ស្តាប់​អ្នកធ្វើ អ្នកលក់​ចម្លាក់​ឈើ​នៅ​អន្លង់​ផ្សោត​កាំ​ពី រៀបរាប់​ពីមុខ​របរ​មួយ​នេះ​(រូបថត សុខុម)