​ប្រែ​សម្រួល : កញ្ញា​ដា​លី​ស (VNExpress) ៖ ប៉ូលិស​ក្រុង​ហាណូយ​កំពុង​សាកសួរ​បុរស​ម្នាក់ បន្ទាប់​ពី​កូនស្រី​អាយុ ៣ ឆ្នាំ​របស់​មិត្តស្រី​គាត់​ត្រូវបាន​រកឃើញ​ជាមួយនឹង​ដែកគោល ៩​ដើម​កប់​ជាប់​នៅក្នុង​​លលាដ៍ក្បាល​របស់​នាង​។​

​នាយកដ្ឋាន​ព្រហ្មទណ្ឌ​បាន​ចាប់ផ្តើម​ស៊ើបអង្កេត​បុរស​ឈ្មោះ ង្វៀន ទ្រុង​ហ្វៀ​ន (Nguyen Trung Huyen) អាយុ ៣០ ឆ្នាំ បន្ទាប់​ពី​ករណី​នេះ​ត្រូវបាន​ប៉ូលិស​សង្កាត់​ប្រគល់​ឱ្យ​ហើយ​ប៉ូលិស​ក៏​បាន​កោះ​​ហៅ​ម្តាយ​អាយុ ២៧ ឆ្នាំ​របស់​ក្មេងស្រី​នេះ​ផង​ដែរ​។​

​កាលពី​ថ្ងៃ​ចន្ទ​ទី​១៧​មករា ក្មេងស្រី​រងគ្រោះ​ត្រូវបាន​នាំ​ទៅកាន់​មន្ទីរពេទ្យបង្អែក​សង្កាត់​ថាច់​ថា​ត​ទាំង​សន្លប់​និង​ប្រកាច់​។​

​លោក វឿង ទ្រុង​គៀន (Vuong Trung Kien)​ប្រធាន​មន្ទីរពេទ្យ បាន​និយាយ​កាលពី​ថ្ងៃ​អង្គារ​ថា​ក្មេង​ស្រី​នេះ​ត្រូវបាន​ម្តាយ​នាំយក​មក​ហើយ​កាំរស្មីអ៊ិច​បាន​បង្ហាញ​ឱ្យឃើញ​នូវ​វត្ថុ​ស្រដៀង​នឹង​ដែក​​គោល​ជាច្រើន​ដើម​ដោត​ចូលទៅក្នុង​ក្បាល​របស់​នាង​។​

​នាង​ជា​ម្តាយ បាន​នាំ​កូនស្រី​ទៅ​មន្ទីរពេទ្យ ដោយសារតែ​កូន​របស់​នាង​សន្លប់ ប៉ុន្តែ​គ្រូពេទ្យ​សង្ស័យថា​មាន​ការរំលោភបំពាន ហើយ​បាន​ទាក់ទង​ទៅ​ប៉ូលិស​។​

​ក្មេង​ស្រី​នេះ​ត្រូវបាន​បញ្ជូន​ទៅ​មន្ទីរពេទ្យ​សាំង​ប៉ូល (Saint Paul)​ដែល​ជា​មន្ទីរពេទ្យ​កម្រិត​ក្រុង ដើម្បី​ព្យាបាល ហើយ​ស្ថិតក្នុង​ស្ថានភាព​ធ្ងន់ធ្ងរ​នៅឡើយ​។​

​ការស៊ើបអង្កេត​បន្ថែម​បានបង្ហាញ​ថា នាង​តូច​ធ្លាប់​បាន​ចូល​មន្ទីរពេទ្យ​ចំនួន ៤ ដង​មក​ហើយ​សម្រាប់​ការពុល​ថ្នាំ​សម្លាប់​សត្វល្អិត ការ​លេប​ថ្នាំលាបក្រចក​ដៃ​ការ​បាក់ដៃ​និង​ការរង​របួស​ច្រមុះ​ក្នុង​រយៈពេល ៣ ខែ​ចុងក្រោយ​នេះ​។​

​ប៉ូលិស​ក្រុង​ហាណូយ​បាន​បដិសេធ​មិន​ផ្តល់​ព័ត៌មាន​បន្ថែម​ទេ​។​

​ជីតា​បង្កើត​របស់​ក្មេងស្រី​អាយុ ៦៨ ឆ្នាំ បាន​និយាយថា ឪពុក​ម្តាយ​របស់​នាង​បាន​លែងលះគ្នា​កាលពី​ឆ្នាំមុន ហើយ​ក្មេង​ស្រី​នេះ​មាន​បងស្រី​ពីរ​នាក់​ទៀត ដែល​មាន​អាយុ ៨ និង ៦ ឆ្នាំ​។​

​ក្មេងស្រី​អាយុ​៣​ឆ្នាំ​នេះ​បាន​រស់នៅ​ជាមួយ​ឪពុក​និង​ជីតា​របស់​នាង​រហូត​ដល់​ប្រហែល​ខែឧសភា ឆ្នាំ ២០២១ ប៉ុន្តែ​ចាប់តាំងពី​ពេលនោះ​មក​បាន​ទៅ​រស់នៅ “​ពាសវាល​ពាសកាល​ជាមួយ​ម្តាយ​របស់​នាង និង​ពេលខ្លះទៀត​…​មិនដឹង​រស់នៅ​ជាមួយ​អ្នកណា​នោះ​ទេ​”៕

​ប៉ូលិស​មក​ដល់​មន្ទីរ​ពេទ្យ​សាំង​ប៉ូល​ក្រុង​ហាណូយ ទី​ដែល​ក្មេងស្រី​អាយុ​៣​ឆ្នាំ​កំពុង​សម្រាក​ព្យាបាល​របួស​ដែល​គោល​ដោត​ជាប់​ក្បាល​