ដោយ​:​ពៅ​និមល​/​ភ្នំពេញ​៖ ដោយសារ​ការបិទ​បញ្ចប់​ការយកពន្ធ​លើ​អង្ករ​កម្ពុជា នាំចូល​សហគមន៍​អ៊ឺរ៉ុប​ដែល​នឹង​ចូល​ជាធរ​មាននៅ​ថ្ងៃទី​២០ ខែមករា ឆ្នាំ​២០២២ នេះ​តទៅ អ្នក​នាំចេញ​នៅ​កម្ពុជា​រំពឹងទុក​ថា នឹងមាន​កំណើន​មកវិញ​ចំនួន ប្រមាណ ២០​ម៉ឺន​តោន ខណៈដែល​បច្ចុប្បន្ននេះ​ឃើញ​មាន​ការបញ្ជាទិញ​ច្រើន ពី​ភាគី​សហគមន៍​អឺរ៉ុប​។​

​លោក សុង សារ៉ន ប្រធាន​សហព័ន្ធ​ស្រូវ​អង្ករ​កម្ពុជា កាលពី​ល្ងាច​ថ្ងៃទី​១៩ ខែមករា​កន្លងទៅនេះ បាន​មានប្រសាសន៍ប្រាប់​រស្មី​កម្ពុជា​ថា​”​ជាកា​ពិត​សហគមន៍ អ៊ឺរ៉ុប​បាន​អនុគ្រោះ​ពន្ធ គឺ​បន្ទាប់ពី​ដាក់​វិធានការ​របាំង​ពន្ធ​បាន​ផុតរលត់​និង​ចាប់ ផ្តើម នៅ​ខែម​ករានេះ​អញ្ចឹង​ការនាំ​អង្ករ​ចេញ​ពន្ធ​សូន្យ​ទាំងអស់​គ្រប់​ទំនិញ​អង្ករ គ្រប់​ប្រភេទ ហើយ​អ្វីដែល​យើង​បានឃើញ​ជាក់ស្តែង​គឺមាន​ការបញ្ជាទិញ​ច្រើន​ពី សហគមន៍​អឺរ៉ុប​មានការ​កើនឡើង​វិញ ប៉ុន្តែ​យើង​នៅ​រងចាំ​ថា មានការ​ដឹកជញ្ជូន បើតាម​ការវិភាគ​និង​តាម​ការធ្វើផែនការ​រប​ស់​សហព័ន្ធ យើង​គិតថា នឹងមាន កំណើន​ប្រហាក់​ប្រហែលជា ២០​ម៉ឺន​តោន​នៅ​ឆ្នាំ​២០២២​នេះ កើន​ពី ១៥​ម៉ឺន យើង​រៀបចំ​ផែនការ យ៉ាងតិច​ប្រហែល​២​ឆ្នាំ ត្រឡប់មក​បរិមាណ​ជាង​២៦-២៧​ម៉ឺន​តោន ដូច​ឆ្នាំ​២០១៣ មុនពេល​ដែល​គេ​ដាក់​របាំង​ពន្ធ​ឥ​ញ្ចឹ​ង​យើង​ត្រូវ ការ​ពេល ២​ទៅ​៣​ឆ្នាំ​ដើម្បី​កែប្រែ​ស្ថានភាព​ឲ្យ​ដូច​ពីមុន​វិញ​”​។​

​លោក​ប្រធាន​បាន​រម្លឹក​ឡើងវិញ​ថា ”​ក្នុង​រយៈពេល ៣​ឆ្នាំកន្លងមក (២០១៩-២០២១) គឺថា​កម្ពុជា​យើង​បាន​បង់ពន្ធ​ចំនួន​ជាង ៥០​លាន​ដុល្លារ​ដល់​គយ សហគមន៍​អឺរ៉ុប ហើយ​ជាមួយគ្នានេះដែរ​យើង​មានការ​ធ្លាក់​ចុះបើ​យើង​ប្រៀប ធៀប​៣​ឆ្នាំមុន ពេល​គេ​ដាក់​របាំង​ពន្ធ (២០១៦-២០១៨) គឺមាន​ការធ្លាក់ចុះ​ជាង ៣០​ម៉ឺន​តោន​។ លោក​បាន​បន្តថា កម្ពុជា​យើង​តែងតែ​នាំទៅ​កាន់​សហគមន៍​អឺរ៉ុប ប្រហាក់ប្រហែល​ក្នុង​រង្វង់ ២៥​ម៉ឺន​តោន​រៀងរាល់ឆ្នាំ នៅពេលដែល​របាំង​ពន្ធ វិធានការ​ដាក់​ពន្ធ​មកដល់ គឺថា​ការ នាំចេញ​មាន​ប្រហាក់ប្រហែល​២០​ម៉ឺន​តោន តែប៉ុណ្ណោះ ក្នុង​មួយឆ្នាំ ហើយ​មានការ​ធ្លាក់ចុះ​ខ្លាំង​នៅ​ឆ្នាំ​២០២១​ការនាំចេញ មាន​ចំនួន​តែ​ជាង ១៥​ម៉ឺន​តោន​ប៉ុណ្ណោះ​”​។​

​សូម​រម្លឹកថា ការនាំចេញ​អង្ករ​របស់​កម្ពុជា​ក្នុង​ឆ្នាំ​២០២១ មាន​ចំនួន​សរុប​ក្នុង​រង្វង់ ៦៣​ម៉ឺន​តោន ដែលមាន​តម្លៃ​ជិត​៤០០​លាន​ដុល្លារ​អាម៉េរិក​។ ក្នុងចំណោម​អង្ករ ដែល​ត្រូវបាន​នាំចេញ​នេះ​មាន​ជិត ១៤​ម៉ឺន​តោន ដែល​បាន​នាំចូល​ទីផ្សារ​អឺរ៉ុប​។
​សូមបញ្ជាក់​ទៀតថា​សភា​ពាណិជ្ជកម្ម​នៃ​សហភាព​អឺរ៉ុប​យកពន្ធ​លើ​អង្ករ​កម្ពុជា ជា​ផ្លូវការ ចាប់ពី​ថ្ងៃទី​១៨ មករា ឆ្នាំ​២០១៩ ក្នុង​អត្រា​ជិត ២០០​ដុល្លារ​សម្រាប់​អង្ករ មួយ​តោន​។ អត្រាពន្ធ​នេះ បាន​ធ្លាក់​មក​នៅត្រឹម​ជាង ១៧០​ដុល្លារ​សម្រាប់​អង្ករ មួយ​តោន នៅក្នុង​ឆ្នាំ​២០២០ និង​ជាង ១៤១​ដុល្លារ​ក្នុង​អង្ករ​មួយ​តោន នៅ​ឆ្នាំ​២០២១៕​/PC