ដោយៈ​យោធិន​/ភ្នំពេញៈ​ឯកអគ្គរដ្ឋទូត​សាធារណរដ្ឋ​បារាំង​ប្រចាំ​នៅ​ព្រះរាជាណាចក្រ​កម្ពុជា​បាន​វាយតម្លៃ​ខ្ពស់​ចំពោះ​កម្ពុជា​ក្នុងការ​បញ្ជូន​កម្លាំង​នារី​ចូលរួម​បេសកកម្ម​អង្គការសហប្រជាជាតិ​ដែលមាន​កម្រិត​ចំនួន​លើសពី​ការស្នើសុំ​របស់​អគ្គលេខា​ធិ​ការ​អង្គការសហប្រជាជាតិ​(អ.ស.ប.)។

ឯកអគ្គរដ្ឋទូត​បារាំ​ង​ប្រចាំ​កម្ពុជា​វាយតម្លៃ​ខ្ពស់​​ចំពោះការ​បញ្ជូន​កម្លាំង​នារី​ចូលរួម​បេសកកម្ម អ​.​ស​.​ប.របស់កម្ពុជា(រូបថតៈ យោធិន)


ការវាយតម្លៃ​នេះ​បាន​លើកឡើង​ដោយ​លោក ​ហ្សាក់កេ ប៉ែលឡេត(Jacques PELLET )ឯកអគ្គ​រដ្ឋ​ទូក​បារាំង​ប្រចាំ​ព្រះរាជាណាចក្រ​កម្ពុជា​ក្នុងឱកាស​អញ្ជើញ​ចូលរួម​បិទ​វគ្គ​បណ្តុះបណ្តាល​ភាសា​បារាំង​នា​ថ្ងៃទី​២០ ខែមករា ឆ្នាំ​២០២២ នៅ​មជ្ឈមណ្ឌល​ជាតិ​រក្សា​សន្តិភាព​។​

សូមបញ្ជាក់ថា ក្នុង​ដំណើរ​អញ្ជើញ​ចូលរួម​ពិធី​បិទ​វគ្គ​សិក្ខាកាម​ភាសា​បារាំង​ដែល​ឧបត្ថម្ភ​ដោយ​ជំនួយ​របស់​បេសកកម្ម​បារាំង​និង​អង្គការ​អន្តរជាតិ​និយាយ​ភាសា​បារាំង​(OIF) ឯកអគ្គរដ្ឋទូត​បារាំ​ប្រចាំ​កម្ពុជា លោក​Jacques PELLET និង​លោកស្រី ម៉ិ​ញ ទីតាំង( Minh Di Tang) ទទួល​ការស្វាគមន៍​កក់ក្តៅ​និង​សវនាការ​ដោយមាន​ការផ្លាស់ប្តូរ​នូវ​វត្ថុ​អនុស្សាវរីយ៍​ពី​នាយ​ឧ​ត្ត​ម​សេនីយ៍​សែម សុវណ្ណនី អនុប្រធាន​គណៈកម្មាធិកា​រ​ជាតិ​និង​ជា​អគ្គនាយក​មជ្ឈមណ្ឌល​ជាតិ​រក្សា​សន្តិភាព​ផងដែរ​។​

ទីប្រឹក្សា​បារាំង​ប្រចាំ​មជ្ឈមណ្ឌល​ជាតិ​រក្សា​សន្តិភាព​បាន​ថ្លែង​បញ្ជាក់ថា វគ្គ​សិក្សា​ភាសា​បារាំង​នេះ​បានចាប់ផ្តើម​ដំណើរការ​ពី​ខែមករា ឆ្នាំ​២០២០ ដែលមាន​សិក្ខាកាម​នារី​ចំនួន​២៥​នាក់​។ ក្នុងចំណោម​សិក្ខាកាម​នា​រី​២៥​នាក់ មាន​សិក្ខាកាម​នារី​ចំនួន​២១​នាក់​បាន​ឆ្លងកាត់​ការសិក្សា​យ៉ាង​ពេញលេញ រយៈពេល​ពីរ​ឆ្នាំ​ដោយបាន​ឆ្លងកាត់​ការប្រលង​ច្រើនលើកច្រើនសារ​ទោះបី​ក្នុង​សម័យកាល​នៃ​ការរីក​រាលដាល​រោគរាតត្បាត​កូ​វីដ​។ ជា​លទ្ធផល​សិក្ខាកាម​នារី​២១​នាក់​ទទួលបាន​លទ្ធផល​ក្នុងនោះ​៧​នាក់​ទទួលបាន​កម្រិត​A1 ៩​នាក់​ទទួលបាន​កម្រិត​A2 និង​៥​នាក់​ទទួលបាន​កម្រិត​B1 ។​

ថ្លែង​ក្នុង​ពិធី​បិទ​វគ្គ​បណ្តុះបណ្តាល​ភាសា​បារាំង​ក្រោម​ជំនួយ​របស់​បេសកកម្ម​បារាំង​ប្រចាំ​កម្ពុជា​និង​អង្គការ​អន្តរជាតិ​និយាយ​ភាសា​បារាំង​ហ្វ្រ​ង់​កូ​ហ្វូ​ន​(OIF) នាយ​ឧ​ត្ត​ម​សេនីយ៍​សែម​សុវណ្ណនី​អនុប្រធាន​គណៈកម្មាធិកា​រ​ជាតិ​និង​ជា​អគ្គនាយក​មជ្ឈមណ្ឌល​ជាតិ​រក្សា​សន្តិភាព បាន​ថ្លែងអំណរគុណ​និង​វាយតម្លៃ​ខ្ពស់​ឯកអគ្គរដ្ឋទូត​បា​រាំង​ដែល​បង្ហាញ​ពី​ការយកចិត្តទុកដាក់​ក្នុង​ការបន្ត​ពង្រឹង​កិច្ចសហប្រតិបត្តិការ​ក​ម្ពុ​ជា​-​បារាំង​។​


ប្រមុខ​កង​យោធា​មួក​ខៀវ​កម្ពុជា​នាយ​ឧ​ត្ត​ម​សេនីយ៍​សែម សុវណ្ណនី ​បាន​ថ្លែងបន្តថា ​សាធារណរដ្ឋ​បារាំង​ក៏បាន​គាំទ្រ​ផងដែរ​ចំពោះ​កិច្ច​ខំប្រឹងប្រែង​របស់​កម្ពុជា​ក្នុង​កិច្ចប្រតិបត្តិការ​សន្តិភាព​អង្គការសហប្រជាជាតិ តាមរយៈ​ការបណ្តុះបណ្តាល​កងកម្លាំង​មួក​ខៀវ​លើ​ផ្នែក​បោសសំអាត​មីន នាយទាហាន​សេនាធិការ នាយទាហាន​សង្កេតការណ៍​យោធា សុវត្ថិភាព​ក្នុងការ​ដឹកជញ្ជូន​គ្រាប់​យុទ្ធភណ្ឌ​មិនទាន់​ផ្ទុះ ថ្នាក់​បណ្តុះបណ្តាល​និង​បំប៉ន​ភាសា​បារាំង ។ ពិសេស​គឺ​ការផ្តួចផ្តើម​បង្កើត​វគ្គ​កម្ទេច​គ្រាប់​មិនទាន់​ផ្ទុះ ថ្នាក់​អាស៊ាន​និង​ក្នុង​តំបន់​ដើម្បី​ប្រសិទ្ធភាព​ក្នុងការ​បំពេញបេសកកម្ម​នៅតាម​បណ្តា​ប្រទេស​និយាយ​ភាសា​បារាំង​។​

នាយ​ឧ​ត្ត​ម​សេនីយ៍​សែម​សុវណ្ណនី​បានបញ្ជាក់​បន្ថែមថាៈ​បណ្តា​សិក្ខាកាម​ក្រោម​ជំនួយ​ឧបត្ថម្ភ​ពី​រដ្ឋាភិបាល​បារាំង​និង​អង្គការ​OIF​សុទ្ធសឹងតែ​ទទួលបាន​ឱកាស​ចូលរួម​បេសកកម្ម​នៅក្នុង​បណ្តា​ប្រទេស​និយាយ​ភាសា​បារាំង​៕សរន

ឯកអគ្គរដ្ឋទូត​បារាំ​ង​ប្រចាំ​កម្ពុជា​វាយតម្លៃ​ខ្ពស់​​ចំពោះការ​បញ្ជូន​កម្លាំង​នារី​ចូលរួម​បេសកកម្ម អ​.​ស​.​ប.របស់កម្ពុជា(រូបថតៈ យោធិន)