ដោយៈ ជា សីហៈ​/​ភ្នំពេញៈ គម្រោង​វិនិយោគ​ចំនួន ១០ គម្រោង​ដែលមាន​ទុន ប្រមាណ​ជា ២.០០០ លាន​ដុល្លារ ត្រូវបាន​ក្រុមប្រឹក្សា​អភិ​វ​ឌ្ឈ​ន៍​កម្ពុជា​ប្រកាសថា បានអនុម័ត​នៅក្នុង​ខេត្ត​ចំនួន ៨ ដែល​រួមមាន ភ្នំពេញ និង កណ្តាល​ពីរ​កន្លែង ក្រៅពីនោះ​មាននៅ កំពង់ធំ បាត់ដំបង កំពង់ស្ពឺ ឧ​ត្ត​រ​មានជ័យ កោះកុង និង កំពត ។

​មន្ត្រី​នៅ​ក្រុមប្រឹក្សា​អភិ​វ​ឌ្ឈ​ន៍​កម្ពុជា​បាន​ឲ្យ​ដឹងថា គម្រោង​នៅ​ភ្នំពេញ​គឺ​រួមមាន គម្រោង​បង្កើត​រោងចក្រ​កាត់ដេរ​សម្លៀកបំពាក់​ដែលមាន​ទីតាំង​វិនិយោគ​ស្ថិតនៅ​ភូមិ​ព្រៃ​ព្រីង​ខាងត្បូង ១ សង្កាត់​ចោមចៅ​ទី​២ ខណ្ឌ​ពោធិ៍​សែន​ជ័យ មាន​ទុន វិនិយោគ​ប្រមាណ ៣,១​លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ៧១៤​កន្លែង ដោយ​ក្រុមហ៊ុន INDEPENDENCE CLOTHING (CAMBODIA) CO., LTD និង គម្រោង​វិនិយោគ​សាងសង់ និង​អាជីវកម្ម​សណ្ឋាគារ​ថ្នាក់​ផ្កាយ​៥ ចំនួន​៥២៨​បន្ទប់​ដែលមាន​ទីតាំង​វិនិយោគ​ស្ថិតនៅ​មហាវិថី​ព្រះមុនីវង្ស សង្កាត់​បឹង​កេងកង​ទី​៣ ខណ្ឌ​បឹង​កេងកង មាន​ទុនវិនិយោគ​ចំនួន ១២៩ លាន​ដុល្លារ​អាមេរិក និង​អាចបង្កើត​ការងារ​បាន​ចំនួន​៧៣៧​កន្លែង​របស់​ក្រុមហ៊ុន K.B.X INVESTMENT CO., LTD ។

​ដោយឡែក​នៅ​ខេត្តកណ្តាល មន្ត្រី​ដដែល​បាន​ឲ្យ​ដឹងថា​គឺមាន​គម្រោង​វិនិយោគ បង្កើត​រោងចក្រ​ផលិត​ការ៉ូ​ជ័រ កម្រាល​បាត ទ្រនាប់​កម្រាល​បាត និង​ជើង​ជញ្ជាំង​ជ័រ ដែលមាន​ទីតាំង​វិនិយោគ​ស្ថិតនៅ​ភូមិ​ក្តាន់​រយ ឃុំ​ដំណាក់​អំពិល ស្រុក​អង្គស្នួល មាន​ទុនវិនិយោគ​ប្រមាណ​៤,២​លាន​ដុល្លារ​អាមេរិក និង​អាចបង្កើត​ការងារ បាន​ចំនួន ១៩៤​កន្លែង របស់ ក្រុមហ៊ុន HAOPAI DECORATION MATERIAL (CAMBODIA) CO., LTD និង គម្រោង​បង្កើត​រោងចក្រ​ផលិត និង​ផ្គុំ​ដំឡើង​បន្ទះ សូ​ឡា ដែលមាន​ទីតាំង​វិនិយោគ​ស្ថិតនៅ​ភូមិ​សន្លុង ឃុំ​សន្លុង​ស្រុក​ខ្សាច់កណ្តាល មាន​ទុន វិនិយោគ​ប្រមាណ​៨,២​លាន​ដុល្លារ​អាមេរិក និង​អាចបង្កើត​ការងារ បាន​ចំនួន ២៦៥​កន្លែង​របស់​ACADEMIC SOLAR ENERGY MFG CO., LTD ។

​រីឯ​គម្រោង​វិនិយោគ​ផ្សេងទៀត​រួមមាន របស់​ក្រុមហ៊ុន CAMBODIAN GUOXING YI QUN LANG PLYWOOD CO., LTD លើ គម្រោង​វិនិយោគ បង្កើត​រោងចក្រ​កែច្នៃ​ក្តារបន្ទះ ដែលមាន​ទីតាំង​វិនិយោគ​ស្ថិតនៅ​ភូមិ​ស្រឡៅ​តូង ឃុំ​បល្ល័ង្ក ស្រុក​បារាយណ៍ ខេត្តកំពង់ធំ មាន​ទុនវិនិយោគ​ប្រមាណ ៣,៤​លាន ដុល្លារ​អាមេរិក និង​អាចបង្កើត​ការងារ​បាន​ចំនួន ១៩២​កន្លែង​។ ក្រុមហ៊ុន MUTITA TEXTILE SOCIAL ENTERPRISE CO., LTD លើ គម្រោង​បង្កើត​រោងចក្រ កាត់ដេរ​សម្លៀកបំពាក់ ដែលមាន​ទីតាំង​វិនិយោគ​ស្ថិតនៅ​ភូមិ​សូ​ភី ១ សង្កាត់​រតនៈ ក្រុង​បាត់ដំបង ខេត្តបាត់ដំបង មាន​ទុន វិនិយោគ​ប្រមាណ​៣,៩​លាន​ដុល្លារ អាមេរិក និង​អាចបង្កើត​ការងារ​បាន​ចំនួន​៦៤៩​កន្លែង​។​

​ប្រភព​ដដែល​បាន​បន្ថែមថា ក្រុមហ៊ុន TMH POULTRY CO., LTD លើ គម្រោង​បង្កើត​រោងចក្រ​កែច្នៃ​និង​វេច​ខ្ចប់​សាច់ (​មាន់ ទា ជ្រូក គោ​) និង ផលិត​ម្ហូបអាហារ ដែលមាន​ទីតាំង​វិនិយោគ​ស្ថិតនៅ​ភូមិ​ព្រៃ​ច្រាប​លិច ឃុំ​វាល​ពង់ ស្រុក​ឧដុង្គ ខេត្តកំពង់ស្ពឺ មាន​ទុនវិនិយោគ​ប្រមាណ​៥,៧​លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ២២៦​កន្លែង​។ ហើយ ក្រុមហ៊ុន LONGFUITER ANLONG VENG ODDOR MEANCHEY AGRICULTURE PARK CO., LTD​ដាក់ទុន​លើ គម្រោង​វិនិយោគ​កសិកម្ម​ដំណាំ​ចេក​និង​ដំណាំ​ហូប​ផ្លែ ដែលមាន​ទីតាំង​វិនិយោគ​ស្ថិតនៅ​ភូមិ​លំ​ទង​ចាស់ ឃុំ​លំ​ទង ស្រុក​អន្លង់វែង ខេត្ត​ឧ​ត្ត​រ​មានជ័យ មាន​ទុនវិនិយោគ​ចំនួន ៥១​លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ១.៨៦៧​កន្លែង​។​

​ប្រភព​ដដែល​បាន​បន្តថា គម្រោង​របស់​ក្រុមហ៊ុន CAMBODIAN UPPER TATAY HYDROPOWER CO., LTD គឺ​សុំ​លើ គម្រោង​វិនិយោគ​អភិវឌ្ឍន៍​វា​រី​អគ្គិសនី ស្ទឹង​តា​តៃ​លើ អានុភាព ១៥០ MW ដែលមាន​ទីតាំង​វិនិយោគ​ស្ថិតនៅ​ស្រុក​ថ្មបាំង និង​ស្រុក​កោះកុង ខេត្តកោះកុង មាន​ទុនវិនិយោគ​ប្រមាណ ៣៨៩​លាន​ដុល្លារ អាមេរិក និង​អាចបង្កើត​ការងារ​បាន​ចំនួន ១.៥៨០​កន្លែង​។​

​ប្រភព​ដដែល​បាន​បន្តថា សម្រាប់​ខេត្តកំពត​គឺ​ទាក់ទាញ​គម្រោង​ធំជាងគេ របស់​ក្រុមហ៊ុន KAMPOT LOGISTICS AND PORT COMPANY LIMITED​លើ គម្រោង​វិនិយោគ​អភិវឌ្ឍន៍​មណ្ឌល ភ័ស្តុភា​រកម្ម និង​កំពង់ផែ​ពហុ​បំណង ដែលមាន​ទីតាំង​វិនិយោគ​ស្ថិតនៅ​ភូមិ​ច​ង្ហោ​ន សង្កាត់​ព្រែក​ត្នោត ក្រុង​បូកគោ ខេត្តកំពត មាន​ទុនវិនិយោគ​រហូតដល់​ទៅ​ចំនួន ១.៣០០​លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ៥៩០​កន្លែង​៕​/PC