​ប្រែ​សម្រួលៈ​វាសនា​(​បាងកក​ប៉ុស្តិ៍​)៖ នាយករដ្ឋមន្ត្រី​ថៃ លោក ប្រា​យុទ្ធ ចាន់​អូ​ចា កាលពី​ថ្ងៃ​ព្រហស្បតិ៍​ទី​២០​មករា​នៅ​តែ​និយាយថា លោក​មិន​មាន​ផែនការ​រុះរើ​គណៈរដ្ឋមន្ត្រី ឬក៏​រំលាយ​សភា​និង​កោះ​ធ្វើការ​​បោះឆ្នោត​មុន​កាលកំណត់​អី​ទេ​។​

​ការអះអាង​របស់​លោក​ប្រា​យុទ្ធ​បែប​នេះ​កើតឡើង​បន្ទាប់​ពី​គណបក្សកាន់អំណាច ផា​ឡាង ប្រា​ចា​រ៉ា​ត (PPRP)​កាលពី​យប់​ថ្ងៃ​ពុធ​បានសំរេច​បណ្តេញ​អគ្គលេខា​បក្ស​និង​សមាជិកសភា​២០​រូប​ទៀត​នៅ​​ក្រោម​ការគ្រប់គ្រង​របស់លោក ដោយសារតែ​ពួកគេ​បាន​បង្ក​ការបែកបាក់​នៅក្នុង​បក្ស​។​

​លោកនាយក​រដ្ឋមន្ត្រី​បាន​និយាយថា​« ខ្ញុំ​អត់​ពាក់ព័ន្ធ​នឹង​ការសំរេចចិត្ត​របស់​ស​មាជិក​ប្រតិបត្តិ​របស់​គណបក្ស​PPRP​និង​មេដឹកនាំ​របស់​វា​ឧត្តមសេនីយ៍ ប្រា​វីត វង់​ស៊ូ​វ៉ុន ទេ ។​ខ្ញុំ​ជឿថា​គ្រប់​គ្នា​នឹង​ព្យាយាម​​នាំ​អ្វីៗ​អោយ​វិល​មក​ធម្មតា​វិញ​អោយ​បាន​ឆាប់​តាម​ដែល​អាច​ធ្វើបាន​។​ខ្ញុំ​មិន​អាច​ប្រាប់​ថា​នរណា​ល្អ​នរណា​អាក្រក់​ទេ ។​ទុក​អោយ​អំពើ​របស់​គេ​បញ្ជាក់​ដោយ​ខ្លួនឯង និង​ទុក​អោយ​ប្រជាជន​ពិចារណា​ហើ​​យ​សំរេចចិត្ត​នៅក្នុង​ការបោះឆ្នោត​នាពេលខាងមុខ​»​។​

​លោក​បាន​បន្ថែមថា នឹង​មិន​មាន​ការរុះរើ​គណៈរដ្ឋមន្ត្រី ឬ​រំលាយ​សភា​ក្នុងពេល​ឆាប់ៗ​ទេ ដោយសារ​មាន​ការងារ​ត្រូវ​បន្តធ្វើ​។​

​ឥឡូវ សមាជិក​សភា​ទាំង​២១​រូប​ដែល​ត្រូវ​បក្ស​កាន់​អំណាច​បណ្តេញ​ចេញ​ត្រូវ​ស្វែងរក​គណបក្ស​ថ្មី​ណាមួយ​ក្នុង​រយៈពេល​៣០​ថ្ងៃ បើ​មិន​ដូច្នេះ​ទេ​ពួកគេ​នឹង​បាត់បង់​អាសនៈ​សភា​របស់​គេ​។​

​ការបែកបាក់​ផ្ទៃក្នុង​គណបក្ស​កាន់​អំណាច​នេះ​កើត​ឡើង​មួយ​ថ្ងៃ​ក្រោយពី​អតីត​សមាជិក​គណបក្ស​PPRP​សំខាន់ៗ​បានរួម​គ្នា​បង្កើត​គណ​បក្ស​ថ្មី​មួយ និង​ប្រកាស​ថា​ពួកគេ​នឹង​មិន​តែងតាំង​លោក​ប្រា​​យុទ្ធ ជា​បេក្ខជន​នាយករដ្ឋមន្ត្រី​ទៀត​ទេ​សំរាប់​ការបោះឆ្នោត​ខាងមុខ​។​

​គណបក្ស​សាង​អនាគត​ថៃ​(Building Thailand’s Future)​ត្រូវបាន​បង្កើតឡើង​កាលពី​ថ្ងៃ​១៩​មករា​និង​មេដឹកនាំ​របស់​វា​អះអាង​ថា​គណបក្ស​នឹង​ផ្តោត​លើ​បញ្ហា​សេដ្ឋកិច្ច​និង​បញ្ចប់​ការ​បែក​​បាក់​នយោបាយ​។​

​សុន​ទី​រ៉ា​ត សុន​ទី​ហ្សី​រ៉ា​វង់​(Sontirat Sontijirawong)​អតីត​អគ្គលេខា​PPRP​និង​អតីត​រដ្ឋ​មន្យ្រី​ថាមពល បាន​អះអាង​ថា​គណបក្ស​ថ្មី​នេះ​នឹង​មិន​គាំទ្រ​លោក​ប្រា​យុទ្ធ​ជា​បេក្ខជន​នាយករដ្ឋមន្ត្រី​​សំរាប់​ដឹកនាំ​ប្រទេស​ទេ​។​

​ចំណែក​លោក អ៊ុត​តា​ម៉ា សាវ៉ា​ណា​យ៉ា ដែល​ជា​ស្ថានិក​គណបក្ស​ថ្មី​និង​ជា​អតីត​មេដឹកនាំ​គណបក្ស​PPRP​បាន​និយាយថា បេក្ខជន​នាយករដ្ឋមន្ត្រី​ត្រូវតែ​មាន​សមត្ថភាព​ដឹកនាំ​ប្រទេស​ចេញពី​ជម្លោះ មាន​​ទេពកោសល្យ​គ្រប់គ្រង​ចាំបាច់​ដើម្បី​គ្រប់គ្រង​ប្រទេស​យ៉ាង​អង់អាច​និង​បាន​ការទទួលស្គាល់​ជា​អន្តរជាតិ​។​«​គណបក្ស​មិន​លៃ​ទុក​កន្លែង​សម្រាប់​ឧត្តមសេនីយ៍ប្រា​យុទ្ធ​ទេ​។​តែ​អតីត​ឧបនាយករដ្ឋមន្ត្រី​​សំ​ឃី​ត ចា​ទូ​ស្រ៊ី​ពី​តាក់​(Somkid Jatusripitak)​អាច​ស័ក្តិសម​»៕

​ប្រា​យុទ្ធ មិនដឹង​ជា​ឈរ​ឈ្មោះ​សំរាប់​អាណត្តិ​ថ្មី​ឬ​យ៉ាងណាទេ នៅពេល​ក្រុម​កាន់អំណាច​របស់​លោក​បែកបាក់​ជា​ពីរ​ជា​បី​

​សមាសភាព​គណបក្ស​សាង​អនាគត​ថៃ​ដែល​ត្រូវបាន​បង្កើតឡើង​កាលពី​ថ្ងៃ​ពុធ សុទ្ធតែ​ជា​អតីត​សមាជិក​បក្ស​កាន់​អំណាច​តែ​ពួកគេ​អះអាងថា មិន​គាំទ្រ​លោក​ប្រា​យុទ្ធ​ទៀត​ទេ​