​ប្រែ​សម្រួល : កញ្ញា​ដា​លី​ស (​ស្រេ្តត​ថែមស៍​,​ដេល្លី​ម៉េល​) ៖ យោធា​ចិន​បាន​និយាយ​កាលពី​ថ្ងៃ​ព្រហស្បតិ៍​ទី​២០​មករា​ថា កងកម្លាំង​ចិន​បាន​ដេញតាម​និង​ព្រមាន​នាវាចម្បាំង​អាម៉េរិក​មួយគ្រឿង​ដែល​បាន​​ចូល​ដែនទឹក​នៅ​ជិត​ប្រជុំ​កោះ​ប៉ា​រ៉ា​សែ​ល​ក្នុង​សមុទ្រ​ចិន​ខាងត្បូង​ឱ្យ​ថយ​ចេញ​ឆ្ងាយ នៅក្នុង​ភាព​តានតឹង​ចុងក្រោយបង្អស់​នៅក្នុង​ផ្លូវទឹក​ដែល​មាន​ជម្លោះ​នេះ​។​

​ទីបញ្ជាការ​ភូមិ​ភាគខាងត្បូង​នៃ​កងទ័ព​រំដោះប្រជាជន​ចិន​បាន​និយាយថា នាវា USS Benfold បាន​ធ្វើដំណើរ​ចូល “​ខុសច្បាប់​” ទៅក្នុង​ដែនទឹក​របស់​ចិន​ដោយ​គ្មាន​ការអនុញ្ញាត​ដោយ​រំលោភ​លើ​​អធិបតេយ្យភាព​របស់​ចិន ហើយ​កងកម្លាំង​ជើង​ទឹក​និង​ជើង​អាកាស​ចិន​បាន​ដេញ​តាម​នាវា​នោះ​។​

​ទីបញ្ជាការ​នេះ​បាន​បន្ថែមថា “​យើង​ទាមទារ​យ៉ាង​ម៉ឺងម៉ាត់​ឱ្យ​ភាគី​អាម៉េរិក​បញ្ឈប់​ជា​បន្ទាន់​នូវ​សកម្មភាព​បង្ក​ហេតុនេះ បើ​មិន​ដូច្នោះ​ទេ​អាម៉េរិក​នឹង​ទទួល​នូវ​ផលវិបាក​ធ្ងន់ធ្ងរ​ពី​ហេតុការណ៍​ដែល​មិន​​អាច​មើលឃើញ​ជា​មុន​បាន​”​។​

​កងទ័ពជើងទឹក​អាម៉េរិក​និយាយថា នាវា Benfold “​បាន​អះអាង​សិទ្ធិ​និង​សេរីភាព​ក្នុង​ការធ្វើ​នាវាចរណ៍​នៅក្នុង​តំបន់​ជុំវិញ​ប្រជុំ​កោះ​ប៉ា​រ៉ា​សែ​ល​ស្របតាម​ច្បាប់​អន្តរជាតិ​”​។​

​អ្នកនាំពាក្យ​កង​នាវាចរណ៍​ទី​៧ លោក ម៉ាក ឡាង​ហ្វ​ត (Mark Langford)​បាន​និយាយថា “​នៅ​ពេល​បញ្ចប់​ប្រតិបត្តិការ នាវា USS Benfold​បាន​ចាកចេញ​ពី​តំបន់​ដែល​មាន​ការទាមទារ​​កាន់កាប់​ហួសហេតុ​ដោយ​ចិន​នេះ និង​បន្ត​ប្រតិបត្តិការ​នៅ​ក្នុង​សមុទ្រ​ចិន​ខាងត្បូង​”​។​

​សហរដ្ឋ​អាម៉េរិក​តែងតែ​អនុវត្ត​នូវ​អ្វី​ដែល​ខ្លួន​ហៅ​ថា​សេរីភាព​នៃ​បេសកកម្ម​ធ្វើ​នាវាចរណ៍​នៅ​សមុទ្រ​ចិន​ខាងត្បូង ដើម្បី​ប្រជែង​នឹង​ការទាមទារ​ទឹកដី​របស់​ចិន​។​

​ចិន​បាន​បង្កើត​ប៉ុស្តិ៍​យោធា​នៅលើ​កោះ​សិប្ប​និមិត្ត​នៅក្នុង​ដែនទឹក ដែល​ជា​ចំណុច​ឆ្លងកាត់​នៃ​ផ្លូវ​ដឹកជញ្ជូន​សំខាន់ៗ ហើយ​ក៏​សម្បូរ​វាល​ឧស្ម័ន និង​កន្លែង​នេសាទ​សម្បូរបែប​ផងដែរ​៕

​ចិន​អះអាង​ថា​បណ្តេញ​នាវា​អាម៉េរិក​នៅ​ជិត​ប្រជុំ​កោះ​ប៉ា​រ៉ា​សែ​ល