ដោយៈមុនីរ័ត្ន/ភ្នំពេញៈ​មន្រ្តីជាន់ខ្ពស់បានអះអាងថា ក្រសួងមហាផ្ទៃ​បាន​ស្នើសុំ​រាជរដ្ឋាភិបាល​ដើម្បី​ឲ្យ​ក្រសួងការបរទេស​កម្ពុ​ជា​ប្រាប់​ទៅ​កុងស៊ុល​កម្ពុជា​ប្រចាំ​នៅក្រៅ​ប្រទេស​ទាំងអស់​កុំ​​ឈ្មោះ GENSER JARED MATTHEW ជាជនជាតិអាម៉េរិកចូលមក​កម្ពុជា​ជា​រៀងរហូត​។​ ជននេះ​បាន​បន្លំ​ខ្លួន ធ្វើជា​មេធាវី​អន្តរជាតិ​ការពារ​ឲ្យ​ជនជាប់ចោទ​ឈ្មោះ សេង ធា​រី ហើយ​បាន​ចូលមក​ជ្រៀតជ្រែក​យុត្តាធិការ​កម្ពុជា​។​

​អ្នកនាំពាក្យ​ក្រសួងមហាផ្ទៃ​លោកនាយ​ឧ​ត្ត​ម​សេនីយ៍ សន្តិ​បណ្ឌិត ខៀវ សុភ័គ បាន​ប្រាប់រស្មីកម្ពុជានៅ​រសៀល ថ្ងៃទី​២០ ខែមករាឆ្នាំ២០២២នេះ​ថា ឈ្មោះ GENSER JARED MATTHEW​កាន់​លិខិតឆ្លងដែន​ទេសចរ​ចូលមក​កម្ពុជា ហើយ​បាន ប្រើប្រាស់​តួនាទី​របស់ខ្លួន​ជា​មេធាវី​អន្តរជាតិ និង​បាន​គំរាមកំហែង​លើ​តុលាការ​កម្ពុជា​ថែម​ទៀតផង​។​

​នាយ​ឧ​ត្ត​ម​សេនីយ៍​សន្តិ​បណ្ឌិត ខៀវ សុភ័គ បាន​បញ្ជាក់ថា “​គាត់​កាន់​លិខិតឆ្លងដែន​ទេសចរ​សុំ​មក​កម្ពុជា​ហើយពេល​មក​គា​ត់ទៅ​ការពារ​ក្តីដោយប្រើប្រាស់​តួ​នាទី​របស់​ខ្លួន​ជា​មេធាវី​អន្តរជាតិ។​មិន​ត្រឹមតែ​ការពារ​ក្តី​ទេ តែានចេញមក​សំញែង​ថា ខ្លួន​ជា​មេធាវី​អន្តរជាតិ ​មាន​សិទ្ធិ​មានអី​… ។ បន្ទាប់មក​យើង​ក៏​ធ្វើការ​ស្រាវជ្រាវ​ទៅ​ឃើញថា គាត់​ចូលមក​ធ្វើជា​ទេសចរ​ធម្មតា ហើយ​មក​ជ្រៀត​ជ្រែកចូល​យុត្តាធិការ​របស់​យើង​ទៀត​។ ជាធម្មតា​មេធាវី​អន្តរជាតិ ប៉ុន្តែ​វា​ត្រូវតែមាន​ការអនុញ្ញាត​​ មិនមែនមេធាវី​ចេះតែ​បាន​ទាំងអស់​ឯណា​? វា​ទាល់តែ​មានការ​យល់ព្រម​ពី​តុលាការ​ដែរ​។ គាត់​ធ្វើ​ខុសពី​តួនាទី​ភារកិច្ចរបស់ខ្លួន​។ ហេតុនេះហើយ​បានជា​យើង​ហាម​មិន​ឲ្យ​មក​កម្ពុជា​”​។​

​​នាយ​ឧ​ត្ត​ម​សេនីយ៍ ខៀវ សុភ័គ បន្តថា ក្រសួងមហាផ្ទៃ​បាន​ស្នើសុំ​រដ្ឋាភិបាល​ដើម្បី​ឲ្យ​ក្រសួងការបរទេស​កម្ពុជា​ប្រាប់​ទៅ​កុងស៊ុល​កម្ពុជា​នៅក្រៅ​ប្រទេស​ទាំងអស់​កុំ​ឲ្យ​ឈ្មោះ GENSER JARED MATTHEW​ចូលមកកម្ពុជា​ទៀត ដោយ​ដាក់​នៅក្នុង​បញ្ជីខ្មៅ​តែម្តង​។ ក្រៅពី​ជាប់​ពាក់ព័ន្ធ​នឹង​សកម្មភាព​បំពាន​ដែន​យុត្តាធិការ​កម្ពុជា​ក្នុង​គោលដៅ គំរាមកំហែង​ដល់​ឯករាជ្យភាព​តុលាការ​កម្ពុជា​ឈ្មោះ GENSER JARED MATTHEW​ក៏បាន​ល្មើ​សនឹង​ច្បាប់​ស្តីពី​អន្តោប្រវេសន៍ ដោយបាន​ប្រើប្រាស់​ទិដ្ឋាការ​ខុសពី​គោលបំណង​ស្នើសុំ​ចូលមក​កម្ពុជា​ដើម្បី​ទេសចរ​ប៉ុន្តែ​បានធ្វើ​សកម្មភាព​ផ្ទុយ​ពី​ប្រភេទ ទិដ្ឋាការ​ដែល​បានអនុញ្ញាត​។​

​សូមជម្រាបថា លោក GENSER JARED MATTHEW បានធ្វើ​ដំណើរ​ចូលមក​កម្ពុជា​កាលពី​ថ្ងៃ​ទី​០៥ ខែធ្នូ ឆ្នាំ​២០២១ ដោយ​ប្រើប្រាស់​ទិដ្ឋាការ​ទេសចរ ផ្ដល់​ដោយ​ស្ថានទូត​ខ្មែរ​ប្រចាំ​សហរដ្ឋអាមេរិក និង​បានធ្វើ​ដំណើរ​ចេញពី​កម្ពុជា​នៅ​ថ្ងៃទី​០៩ ខែធ្នូ ឆ្នាំ​២០២១ ឆ្ពោះទៅកាន់​ទីក្រុង​សេ​អ៊ូ​ល សាធារណរដ្ឋ​កូរ៉េ​។​

​គួរ​រំលឹថា បន្ទាប់ពី​មកដល់​កម្ពុជា លោក GENSER JARED MATTHEW បាន​តាំងខ្លួន​ជា​មេធាវី​អន្តរជាតិ​ដោយ​ចូលរួម ឃ្លាំមើល​ដំណើរការ​សវនាការ​លើ​ជនជាប់ចោទ​ឈ្មោះ សេង ធា​វី និង​បានផ្ដល់​បទសម្ភាសន៍​ដ​ល់​អ្នកសារព័ត៌មាន​នៅ​មុខ តុលាការ​ដោយបាន​ហៅ​សវនាការ​នោះ​ថា​ជា សវនាការ​ឆាកល្ខោន​។ លើសពីនេះ បុគ្គល​ខាងលើ​បាន​ព្រមាន​រាជរដ្ឋាភិបាល​ថា នឹងមាន​បញ្ហា បើ​ហ៊ាន​ឲ្យ​កញ្ញា សេង ធា​វី ជាប់ទោស​ជាដើម​៕សរន​