ដោយៈមុនីរ័ត្ន/ភ្នំពេញៈ​សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បានស្នើ​ឲ្យ​ព្រះអង្គម្ចាស់ នរោត្តម ចក្រាវុធ អនុប្រធាន​គណបក្ស​ហ្វ៊ុនស៊ិនប៉ិច​ត្រូវធ្វើ​ការសម្របសម្រួល​ផ្ទៃក្នុង​គណបក្ស​ដើម្បី​ធ្វើ​សមាជ​ជ្រើសរើស​ក្បាលម៉ាស៊ីន​ដឹកនាំ​គណបក្ស​។នេះបើយោងតាមលិខិតទូលថ្វាយព្រះអង្គម្ចាស់ នរោត្តម ចក្រាវុធ នៅថ្ងៃទី២០ខែមករាឆ្នាំ២០២២នេះ។

ព្រះអង្គម្ចាស់ នរោត្តម ចក្រាវុធ(រូបថត ឯកសារ)

ការស្នើ​នេះ​បាន​ធ្វើឡើង​ក្នុងពេលដែល​ក្រុមមន្ត្រី​ជាន់ខ្ពស់​គណបក្ស​ហ្វ៊ុនស៊ិនប៉ិច គឺ​ក្រុម​លោក​សាយ ហាក់ លោក ហេង ចន្ថា និង លោក​ផាន់ សិទ្ធី និង​ក្រុម​លោក​ឆឹង ចំរើន និង​លោក អាំង សំបូរ​គ្រោង​នឹង​រៀបចំ​ធ្វើ​សមាជ​ជ្រើសរើស ប្រធាន​គណបក្ស​ថ្មី​ជំនួស​សម្តេចក្រុមព្រះនរោត្តម រណឫទ្ធិ គឺ ​សម្តេច​រាជបុត្រី ព្រះអនុជ នរោត្តម អរុណរស្មី និង ព្រះអង្គម្ចាស់​នរោត្តម ច​ក្រា វុ​ធ​។

​លោក​​ញឿ​ន រ៉ា​ដែន អ្នកនាំពាក្យគណបក្ស​ហ្វ៊ុនស៊ិនប៉ិច បាន​ប្រាប់រស្មីកម្ពុជានៅថ្ងៃទី២ខែមករានេះថា លិខិតនេះគឺមានន័យថា ក្រសួងមហាផ្ទៃ​បានទទួលស្គាល់​ព្រះអង្គម្ចាស់ នរោត្តម ចក្រាវុធ ជា​មេដឹកនាំ​នៃគណបក្ស​ហ្វ៊ុនស៊ិនប៉ិច ស្របទៅតាមសេចក្តី សម្រេចការ​តែងតាំង​សព្វព្រះទ័យរបស់​សម្តេចក្រុមព្រះ នរោត្តម រណឫទ្ធិ តែងតាំង​ព្រះអង្គ​កន្លងមក​។

អ្នកនាំពាក្យដដែលបាន​អះអាងថា “​ព្រះអង្គម្ចាស់ នរោត្តម ចក្រាវុធ លោក​មាន​សិទ្ធិ​គ្រប់គ្រាន់ក្នុងការ​កោះអញ្ជើញ​សមាជិក សមាជិកា ថ្នាក់ដឹកនាំ​ដើម្បីធ្វើ​សមាជ​ក្នុងពេលដ៏​ឆាប់​ខាងមុខនេះ​”។

សម្តេច​រាជបុត្រី ព្រះអនុជ នរោត្តម អរុណរស្មី(រូបថត ឯកសារ)

គួរបញ្ជាក់ថា ក្រុមលោកសាយ ហាក់ លោកហេង ចន្ថា និងលោកផាន់ សិទ្ធី គឺបានប្រជុំវិសាមញ្ញគណៈកម្មាធិការនាយក​ គណបក្សហ៊្វុនស៊ិនប៉ិចកាលពីថ្ងៃទី២៣ ខែធ្នូ ឆ្នាំ២០២១ បានសម្រេចជាឯកច្ឆន្ទយាងសម្តេចរាជបុត្រី ព្រះអនុជ នរោត្តម អរុណរស្មី អនុប្រធានទី១ គណបក្សជាព្រះប្រធានគណបក្ស ហ៊្វុនស៊ិនប៉ិច។ចំណែកក្រុមលោកឆឹង ចំរើន និងលោកអាំង សំបូរ គ្រោងនឹងរៀបចំធ្វើសមាជនៅចុងខែមករាខាងមុខនេះ ជ្រើសតាំងព្រះអង្គម្ចាស់នរោត្តម ចក្រាវុធ បុត្រាច្បងសម្តេចក្រុមពព្រះ នរោត្តម រណឫទ្ធិ ជាព្រះប្រធានគណបក្សហ៊្វុនស៊ិនប៉ិច៕សរន