ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ សហរដ្ឋ​អាម៉េរិក​និង​អាល្លឺម៉ង់​បាន​និយាយថា​ការឈ្លានពាន​ណាមួយ​របស់​រុស្ស៊ី​ប្រឆាំង​អ៊ុយ​ក្រែ​ននឹង​ជំរុញ​ឱ្យ​មាន​ការឆ្លើយ​តបយ៉ាង​ធ្ងន់ធ្ង​រពីស​ម្ព​ន្ធមិត្ត​​លោកខាងលិច​។​

​រដ្ឋមន្ត្រីការបរទេស​អាម៉េរិក​លោក អាន​ថូ​នី ប្លីង​កិន និង​រដ្ឋមន្ត្រី​ការបរទេស​អាល្លឺម៉ង់​លោកស្រី អាន​ណា​ឡេ​ណា ប៊ែរ​អឺ​បុក (Annalena Baerbock) បាន​ធ្វើ​ការព្រមាន​បែបនេះ​បន្ទាប់​ពី​​កិច្ចប្រជុំ​ចតុ​ភាគី​នៅ​ទីក្រុង​បែរ​ឡាំង​ជាមួយ​សម​ភាគី​បារាំង​និង​អង់គ្លេស​កាលពី​ថ្ងៃ​ព្រហស្បតិ៍​ទី​២០ មករា​ដែល​ជា​ការបង្ហាញ​ការរួបរួម​ចំពេល​មាន​ការបង្កើន​កងទ័ព​របស់​រុស្ស៊ី​នៅតាម​ព្រំដែន​របស់​​ខ្លួន​ជាមួយ​អ៊ុ​យក្រែន​។

​លោក​ប្លីង​កិន​បាន​និយាយថា “​យើង​កំពុង​ឈានទៅដល់​ដំណាក់កាល​សម្រេចចិត្ត​ចុងក្រោយ​។ យើង​បាន​បញ្ជាក់​ច្បាស់​ហើយ​ថា​បើ​កងកម្លាំង​យោធា​រុស្ស៊ី​ណាមួយ​ធ្វើការ​ចល័ត​ទី​ឆ្លងកាត់​ព្រំដែន​អ៊ុ​យក្រែន ហើយ​ប្រព្រឹត្ត​អំពើ​ឈ្លានពាន​ថ្មី​ប្រឆាំងនឹង​អ៊ុ​យក្រែន នោះ​នឹង​ត្រូវ​ជួប​ជាមួយ​នឹង​ការឆ្លើយតប​យ៉ាង​រហ័ស ធ្ងន់ធ្ងរ និង​ឯកភាព​គ្នា​ពី​សហរដ្ឋ​អាម៉េរិក និង​ដៃគូ​របស់​យើង​”​។​

​លោក​ប្លីង​កិន​បាន​បង្ហាញ​ការគាំទ្រ​រប​ស់​សហរដ្ឋ​អាម៉េរិក​សម្រាប់​អ៊ុយ​ក្រែន​នៅក្នុង​កិច្ចប្រជុំជាមួយ​មេដឹកនាំ​របស់​ខ្លួន​ក្នុង​ទីក្រុង​គៀវ​កាលពី​ថ្ងៃ​ពុធ​ខណៈ​លោក​បន្ត​ការជំរុញ​ផ្នែក​ការទូត​ដើម្បី​ទប់ទល់​​ការឈ្លានពាន​របស់​រុស្ស៊ី ដែល​សហរដ្ឋ​អាម៉េរិក​និយាយថា​អាច​នឹង​កើតមាន​។​

​លោកស្រី​ប៊ែរ​អឺបុក​បានចង្អុលបង្ហា​ញ​ថា អាល្លឺម៉ង់​នឹង​ដើរតួនាទី​ដាក់​ទណ្ឌកម្ម​លើ​រុស្ស៊ី​ចំពោះ​សកម្មភាព​យោធា​ប្រឆាំង​នឹង​ប្រទេស​ជិតខាង​។​លោកស្រី​បាន​និយាយថា​”​រាល់​ការឈ្លានពាន​របស់​រុស្ស៊ី​បន្ថែម​​ទៀត​នឹង​មាន​ផលវិបាក​យ៉ាង​ធ្ងន់ធ្ងរ​។ វា​ជា​សញ្ញា​ល្អ​និង​សំខាន់​ដែល​ការចរចា​កំពុង​បន្ត​”​។​

​រដ្ឋមន្ត្រីការបរទេស​បារាំង​លោក​ហ្សង់​អ៊ីវ ឡឺ​ឌ្រី​យ៉ង់ (Jean-Yves Le Drian) និង​រដ្ឋមន្ត្រី​ការបរទេស​អង់គ្លេស​លោក ជេ​មស៍ ក្លេ​វើលី (James Cleverly)​បាន​ចូលរួម​កិច្ចប្រជុំ​នៅ​ទីក្រុង​​ប៊ែរ​ឡាំង​កាលពី​ថ្ងៃ​ព្រហស្បតិ៍​ផងដែរ ហើយ​លោក​ប្លីង​កិនគ្រោង​ជួប​ជាមួយ​អធិការបតី​អាល្លឺម៉ង់​លោក អូ​ឡា​ហ្វ ស្កូ​ល (Olaf Scholz) នៅ​យប់​ថ្ងៃ​ដដែល ។ ​លោក​នឹង​ធ្វើដំណើរ​ទៅ​កាន់​ទីក្រុង​ហ្សឺ​ណែវ​ដើម្បី​ពិភាក្សា​ជាមួយ​សម​ភាគី​រុស្ស៊ី លោក សឺ​ហ្គេ ឡាវ​រ៉ូវ នៅ​ថ្ងៃ​សុក្រ​នេះ​៕

រូបភាព​ផ្កាយរណប​បង្ហាញ​រថក្រោះ​និង​កាំភ្លើង​ធំ​របស់​រុស្ស៊ី​នៅ​តំបន់​ហ្វឹកហាត់​ផូ​ហ្គោ​ណូវ៉ូ​របស់​រុស្ស៊ី​កាលពី​ថ្ងៃទី​១៦​មករា​២០២២