​ប្រែ​សម្រួលៈ​បំណង​(​អេ​ភី​,​ដេល្លី​ម៉េល​)៖ ការខ្វះ​គ្រឿង​បង្គំ​បង្កឡើង​ដោយ​ជំងឺ​ឆ្លងកូវី​ដ​១៩​កំពុង​បង្ក​បញ្ហា​ផលិតកម្ម​នៅ​រោងចក្រ​ផលិត​រថយន្ត​Toyota​របស់​ជប៉ុន​។​ផលិតកម្ម​នៅ​១១​រោងចក្រ​នៅក្នុង​​ប្រទេស​ជប៉ុន​នឹងត្រូវ​បញ្ឈប់​នៅ​ថ្ងៃ​សុក្រ ថ្ងៃ​សៅរ៍ និង​ថ្ងៃ​ចន្ទ​សប្តាហ៍​ក្រោយ​។​

​ការបញ្ឈប់​នេះ​បន្ថែម​លើ​ការបន្ថយ​ផលិតកម្ម​សំរាប់​ខែកុម្ភៈ ដែល​ក្រុមហ៊ុន​បាន​ប្រកាស​រួច​ហើយ​នៅ​៨​រោងចក្រ​ក្នុង​ប្រទេស​ជប៉ុន រួម​មាន​រោងចក្រ​ដំឡើង​រថយន្ត​Prius​និង​ម៉ូ​ដែល Lexus​។​

​ការផ្គត់ផ្គង់​គ្រឿង​ផ្នែក​ផ្សំ​បាន​រីងស្ងួត​ដោយសារ​ខ្វះ​ឈីប​កុំព្យូទ័រ ដែល​សំខាន់​សំរាប់​គ្រឿង​បង្គំយានយន្ត នៅ​ពេល​រោងចក្រ​ទាំង​ក្នុង​និង​ក្រៅ​ជប៉ុន​ស្ថិតក្រោម​ការបិទ​ខ្ទប់ ឬ​ឈប់​ដំណើរការ​ពាក់ព័ន្ធ​នឹង​​វិធានការ​ប្រឆាំង​កូវី​ដ​១៩​។​

​ការផលិត​រថយន្ត​Toyota​នៅ​ខែ​មករា​ក្នុង​ប្រទេស​ជប៉ុន​កាត់បន្ថយ​អស់​៤៧.០០០​គ្រឿង

​ការផ្អាក​ផលិតកម្ម​នៅ​រោងចក្រ​របស់​ក្រុមហ៊ុន​ផលិត​រថយន្ត​ធំ​បំផុត​របស់​ជប៉ុន​កើត​ឡើង​នៅ​ពេល​ជប៉ុន​ចាប់ផ្តើម​ពង្រីក​វិធានការ​ទប់ស្កាត់​ការរីក​រាលដាល​កូវី​ដ​១៩​។​ចាប់ពី​ថ្ងៃ​សុក្រ​ទី​២១​មករា បណ្តា​ភោ​ជ​​នី​យដ្ឋា​ន និង​បារ​នឹង​បិទ​លឿន​ជាង​មុន នៅ​តំបន់​តូ​ក្យូ និង​នៅ​តំបន់​រាប់សិប​ទៀត​នៅ​ពាសពេញ​ជប៉ុន​នៅ​ពេល​ប្រទេស​នេះ​ចាប់ផ្តើម​ពង្រីក​តំបន់​ត្រូវ​រឹតត្បិត​ដោយសារ​ការផ្ទុះ​វីរុស​អូ​មី​ក្រុង​ដែល​កំពុង​​នាំ​អោយ​ចំនួន​ឆ្លង​ប្រចាំ​ថ្ងៃ​កើនឡើង​ដល់​កំរិត​ខ្ពស់បំផុត​។​

​ក្រោម​វិធានការ​ថ្មី បណ្តា​ហាង​ស៊ីចុក​ភាគច្រើន​ត្រូវ​បិទ​នៅ​ម៉ោង​៨​យប់ នៅពេល​ព្រឹត្តិការណ៍​ធំៗ​អាច​ដាក់​មនុស្ស​ពេញ​ចំណុះ​បាន​ដរាបណា​វា​អនុវត្ត​តាម​ផែនការ​ប្រឆាំង​វីរុស​៕

​ក្រុង​តូ​ក្យូ កាល​ពី​ម្សិលមិញ​បាន​រក​ឃើញ​អ្នក​ឆ្លងកូវី​ដ​១៩​ថ្មី ៨.៦៣៨​នាក់ ដោយ​ឡើង​ហួស​ចំនួន​ឆ្លង​ច្រើន​បំផុត​ពី​មុន ៧.៣៧៧​នាក់​