ដោយៈ​មុនី​រ័ត្ន​/​ភ្នំពេញៈ​នៅ​ព្រឹក​ថ្ងៃទី​២១​ខែមករា​ឆ្នាំ២០២២​លើ​បណ្តាញ​សង្គម​ហ្វេ​ស​ប៊ុ​ក​ផ្លូវការ​របស់លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រី​ក្រសួងការបរទេស​និង​សហ​ប្រតិ​ប​ត្តិការ​អន្តរជាតិ​បានបង្ហាញ​នូវ​ខ្លឹមសារ​ខ្លី​មួយ​ទាក់ទង​នឹង​ជំនួប​រវាង​លោក​ជាមួយ​តំណាង​ជាន់ខ្ពស់​ទទួលបន្ទុក​កិច្ចការបរទេស និង​សន្តិសុខ​គោលនយោបាយ​និង​ជា​អនុប្រធាន គណៈកម្មការ​អឺរ៉ុប​។​

​លោក​បាន​សរសេរថា​”​ខ្ញុំ​បាន​ជួប​សន្ទនា​តាម​ទូរស័ព្ទ​ជាមួយ ឯកឧត្តម ចូ​សិប បូរ​រែ​ល ហ្វុ​ន​តេ​លលេ​តំណាង​ជាន់ខ្ពស់​ទទួល បន្ទុក​កិច្ចការបរទេស និង​សន្តិសុខ​គោលនយោបាយ និង​ជា​អនុប្រធាន​គណៈកម្មការ​អឺរ៉ុប​។ ជាង​២​ឆ្នាំ​ហើយ ដែល​យើង​បាន​ជួបគ្នា​ផ្ទាល់​ចុងក្រោយបង្អស់​នៅ​ទីក្រុង​ម៉ា​ឌ្រី​ត​។​យើង​ទាំងពីរ​ពេញ​ចិត្តនឹង​ភាពជោគជ័យ​នៃ​កិច្ចប្រជុំ​កំពូល​អាស៊ី​-​អឺរ៉ុប លើក​ទី​១៣ កាលពី​ឆ្នាំមុន ហើយ​ខ្ញុំ​បាន​ថ្លែងអំណរគុណ​ចំពោះ​ការគាំទ្រ​របស់​សហភាព​អឺរ៉ុប​នៅពេលនោះ ក៏ដូចជា​ពេលបច្ចុប្បន្ន ខណៈដែល​កម្ពុជា​ធ្វើជា​ប្រធាន​អាស៊ាន​។ ទន្ទឹមនឹងនេះ ជំនួយ​សុ​ប្បរស​ធម៌​របស់​សហភាព​អឺរ៉ុប និង​ប្រទេស​សមាជិក ផ្តល់ជូន​កម្ពុជា​ដើម្បី​ប្រយុទ្ធ​ប្រឆាំងនឹង​ជំងឺ​កូ​វីដ​-១៩ គឺមាន​សារសំខាន់​ណាស់​”​។​

​លោក​រដ្ឋមន្ត្រី​បានបញ្ជាក់​ជា​ចុងក្រោយ​ថា “​ចំពោះ​បញ្ហា​មី​យ៉ាន់​ម៉ា​យើង​បាន​គូសបញ្ជាក់​អំពី​សារៈសំខាន់​បំផុត​នៃ​ការ បញ្ឈប់​អំពើហិង្សា​និង​ការផ្តល់​ជំនួយ​មនុស្សធម៌​ដោយ​មិនមាន​ការរារាំង​និង​មិន​រើសអើង​ដល់​ប្រជាពលរដ្ឋ​មី​យ៉ាន់​ម៉ា​ដែល​ត្រូវការ​ជំនួយ​”៕​សរន​