​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ រដ្ឋមន្ត្រី​ការពារជាតិ​ជប៉ុន​បាន​និយាយ​កាលពី​ថ្ងៃ​ព្រហស្បតិ៍​ទី​២០​មករា​នៅ​ឯ​ការចាប់ផ្តើម​កិច្ចចរចា​រវាង​រដ្ឋមន្ត្រី​ការបរទេស​និង​ការពារជាតិ​នៃ​ប្រទេស​ជប៉ុន​​និង​បារាំង​ថា ស្ថានភាព​សន្តិសុខ​ដែល​ជប៉ុន​និង​បារាំង​កំពុង​ប្រឈម​មុខ​នឹង​នៅ​តំបន់​ឥណ្ឌូ​ប៉ាស៊ីហ្វិក គឺ​មិន​មាន​ស្ថិរភាព​និង “​កាន់តែ​តឹងតែង​”​។​

​កិច្ច​ចរចា ដែល​គេ​ហៅថា កិច្ច​ចរចា “​ពីរ​បូក​ពីរ​” រវាង​រដ្ឋាភិបាល​ទីក្រុង​តូ​ក្យូ​និង​ទីក្រុង​ប៉ារីស បាន​កើតឡើង ខណៈ​ជប៉ុន​ជំរុញ​កិច្ចសហប្រតិបត្តិកា​រ​សន្តិសុខ​ជាមួយ​សម្ពន្ធ​មិត្ត​លោកខាងលិច​ខណៈ​ខ្លួន​​ប្រឈម​មុខ​នឹង​ការកើនឡើង​នៃ​កម្លាំង​របស់​ចិន និង​ការអភិវឌ្ឍ​មី​ស៊ី​ល​របស់​កូរ៉េ​ខាងជើង​។​

​បារាំង​មាន​ទឹកដី​នៅ​បរទេស​ក្នុង​តំបន់​ឥណ្ឌូ​ប៉ាស៊ីហ្វិក​និង​មាន​កម្លាំងប្រដាប់អាវុធ​ឈរជើង​ក្នុង​តំបន់​នោះ​។ ភាព​តានតឹង​កើនឡើង​ទាក់ទង​នឹង​តៃវ៉ាន់​ដែល​ចិន​អះអាង​ថា​ស្ថិត​ក្រោម​អធិបតេយ្យភាព​​របស់ខ្លួន​នោះ បានដាក់​ការយកចិត្តទុកដាក់​យ៉ាង​ខ្លាំង​លើ​តួនាទី​សន្តិសុខ​របស់​ជប៉ុន​។ កូរ៉េ​ខាងជើង​ក៏​បាន​បាញ់​សាកល្បង​មី​ស៊ី​ល​ជា​ច្រើន​គ្រាប់​ផង​ដែរ​កាលពី​ពេល​ថ្មីៗ​នេះ​។​

​រដ្ឋមន្ត្រី​ការពារជាតិ​លោក ណូ​ប៊ូ​អុ គី​ស៊ី (Nobuo Kishi) បាន​និយាយថា “​ការប៉ុនប៉ង​ឯកតោភាគី​ដើម្បី​ផ្លាស់ប្តូរ​ស្ថានភាព​បច្ចុប្បន្ន​ដោយ​កម្លាំង​កំពុង​បន្ត​នៅក្នុង​តំបន់​ឥណ្ឌូ​ប៉ាស៊ីហ្វិក​ហើយ​បរិយា​​កាស​សន្តិសុខ​ជុំវិញ​ប្រទេស​ជប៉ុន​និង​បារាំង​កាន់តែ​តឹងតែង​និង​មិន​មាន​ស្ថិរភាព​”​។​

​លោក​គី​ស៊ី​និង​រដ្ឋមន្ត្រី​ការបរទេស​យ៉ូ​ស៊ីម៉ាសា ហា​យ៉ា​ស៊ី (Yoshimasa Hayashi) បាន​ជួប​ជាមួយ​សម​ភាគី​បារាំង​លោក ហ្សង់​អ៊ីវ ឡឺ​ឌ្រី​យ៉ង់ (Jean-Yves Le Drian) និង​លោកស្រី ផ្ល​រ៉ង់​​ស្បា​លី (Florence Parly) តាមរយៈ​វីដេអូ​ខុន​ហ្វើ​រិន​។​

​សេចក្តីថ្លែងការណ៍​ចុងក្រោយ​មួយ​បាន​និយាយថា ប្រទេស​ទាំង​ពីរ​បាន​ព្រមព្រៀង​គ្នា​ក្នុង​ការពង្រឹង​កិច្ចសហប្រតិបត្តិកា​រ​សន្តិសុខ និង​បង្កើន​កម្រិត​នៃ​កិច្ចសហប្រតិបត្តិការ​ទ្វេភាគី​នៅ​ឥ​ណ្ឌូ​-​ប៉ាស៊ីហ្វិក​។​

​សេចក្តីថ្លែងការណ៍​ចុងក្រោយ​និយាយថា “​រដ្ឋមន្ត្រី​ទាំង​បួន​បាន​ចែករំលែក​ការព្រួយបារម្ភ​យ៉ាងខ្លាំង​អំពី​ស្ថានភាព​សមុទ្រ​ចិន​ខាងត្បូង​និង​ខាងកើត​ហើយ​បាន​ឯកភាព​គ្នា​ដើម្បី​ជំទាស់​យ៉ាង​ខ្លាំងក្លា​​ចំពោះ​ការប៉ុនប៉ង​ឯកតោភាគី​ដើម្បី​ផ្លាស់ប្តូរ​ស្ថានភាព​បច្ចុប្បន្ន​ដោយ​កម្លាំង​”​។​

“​ពួកគេ​ក៏​បាន​បញ្ជាក់​ពី​សារៈសំខាន់​នៃ​សន្តិភាព​និង​ស្ថិរភាព​នៅក្នុង​ច្រក​សមុទ្រ​តៃវ៉ាន់​ផងដែរ ហើយ​បាន​យល់ព្រម​ជំរុញ​ភាគី​ពាក់ព័ន្ធ​ឱ្យ​ដោះស្រាយ​បញ្ហា​ឆ្លង​ច្រក​សមុទ្រ​នេះ​ដោយ​សន្តិវិធី​”​។ ​គេ​មិន​ច្បាស់​ទេ​ថា​តើ​ការពង្រឹង​ទំនាក់ទំនង​ទ្វេភាគី​មានន័យ​យ៉ាងណា​៕

រដ្ឋមន្ត្រី​មក​ពី​បារាំង​និង​ជប៉ុន​ចូលរួម​កិច្ច​ចរចា “​ពីរ​បូក​ពីរ​” តាមរយៈ​វីដេអូ​ខុន​ហ្វើ​រិន​កាលពី​ថ្ងៃ​ព្រហស្បតិ៍​ទី​២០​មករា​២០២២