​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ យុវតី​ជនជាតិ​អង់គ្លេស​កាត់​បែលហ្ស៊ិក​ម្នាក់​បាន​ក្លាយជា​ស្ត្រី​វ័យក្មេង​បំផុត​ដែល​បាន​ហោះហើរ​ទោល​ជុំវិញ​ពិភពលោក​កាលពី​ថ្ងៃ​ព្រហស្បតិ៍ ទី​២០ មករា និង​ជា​មនុស្ស​ដំបូង​គេ​ដែល​ធ្វើដូច្នេះបាន​នៅក្នុង​យន្តហោះ​ខ្នាត​តូច​បន្ទាប់​ពី​ហោះ​ឆ្លង​ទ្វីប​ចំនួន​ប្រាំ​អស់​រយៈពេល​ប្រាំ​ខែ​។​

​នាង ហ្សា​រ៉ា រូ​ធឺ​ហ្វ​ត (Zara Rutherford)​អាយុ ១៩ ឆ្នាំ​បាន​ចុះចត​នៅ​អាកាសយានដ្ឋាន​កត​ទ្រី​ក​-​វេ​វែល​ហ្គឹម (Kortrijk-Wevelgem) ក្នុងប្រទេស​បែលហ្ស៊ិក​បន្ទាប់​ពី​ហោះហើរ​បាន​ចម្ងាយ ៥១.០០០ គីឡូម៉ែត្រ​លើ​ប្រទេស​ចំនួន ៥២ ចាប់តាំងពី​ការចាកចេញ​របស់​នាង​កាលពី​ថ្ងៃទី ១៨ ខែសីហា​នៅក្នុង​យន្តហោះ​ខ្នាតតូច​ដែល​មាន​ល្បឿន​លឿន​បំផុត​លើ​ពិភពលោក​។​

​មាន​ការអបអរសាទ​រ​និង​ទះដៃ​ខណៈ​យន្តហោះ​របស់​នាង​បាន​ឈប់​នៅលើ​ផ្លូវ​រត់​។​

​នាង​រូ​ធឺ​ហ្វ​ត ដែល​បញ្ចេញ​ស្នាមញញឹម​ពព្រាយ​និង​ពាក់​ទង់ជាតិ​អង់គ្លេស​និង​បែលហ្ស៊ិក បាន​ប្រាប់​អ្នកយកព័ត៌មាន​ថា “​វា​ពិតជា​អស្ចារ្យ​មែនទែន ខ្ញុំ​មិន​នឹកស្មាន​សម្រេច​វា​បាន​ទេ​”​។​

​បន្ទាប់​ពី​ចុះ​សំចត​ចុងក្រោយ​នៅ​ភូមិ​មួយ​របស់​អាល្លឺម៉ង់​កាលពី​ថ្ងៃ​ពុធ នាង​បាន​និយាយថា វា​ជា​ការសម្រេច​ស្នាដៃ​មួយ ដែល​នាង​មិន​រំពឹង​កើតឡើង​ម្តងទៀត​នោះឡើយ​។​

​នាង​បាន​បន្ថែមថា “​មាន​ពេលវេលា​ដ៏​អស្ចារ្យ ប៉ុន្តែ​បន្ទាប់​មក​ក៏​មាន​ពេល​ដែល​ខ្ញុំ​ភ័យ​ខ្លាច​ស្លាប់​ដែរ​” ដោយ​នាង​ជ្រើស​យក​ទីក្រុង​ញូវយ៉ក​និង​ភ្នំភ្លើង​សកម្ម​នៅ​អ៊ី​ស្លង់​ធ្វើ​ជា​ការហោះហើរ​ដែលនា​ង​​ចូលចិត្ត​ជាង​គេ​បំផុត​៕

​នាង ហ្សា​រ៉ា រូ​ធឺ​ហ្វ​ត​កាន់​វិញ្ញាបណ្ណបត្រ​បញ្ជាក់​ការហោះហើរ​ជុំវិញ​ពិភពលោក​តែម្នាក់ឯង ក្រោយ​ចុះចត​នៅ​ទីក្រុង​កត​ទ្រី​ក​កាលពី​ថ្ងៃ​ព្រហស្បតិ៍​ទី​២០​មករា ២០២២