​ប្រែ​សម្រួល : កញ្ញា​ដា​លី​ស (​បាល់ទាត់​) ៖ នៅ​រាត្រី​ចុង​សប្តាហ៍​នេះ​គឺ​មាន​ការប្រកួត​លី​ក​កំពូល​ធំៗ​ទាំង ៥ ពេញ​សាច់​តែម្តង ជាពិសេស​លី​ក​កំពូល​អង់គ្លេស ដែល​ក្រុម​លេខ​១ Man City ហាក់​ជិះសេះ​ព្រលែង​ដៃ​បាន​ហើយ ព្រោះ​ដាច់​រហូតដល់ ១១ ពិន្ទុ​ពី​លេខ​២ Liverpool ទៅហើយ​។ នៅ​យប់​ថ្ងៃ​សៅរ៍​នេះ Man City រំពឹង​បន្ថែម​ការ​នាំមុខ ១៤ ពិន្ទុ នៅពេល​ធ្វើដំណើរ​ទៅ​ទឹកដី​របស់ Southampton ខណៈ​នៅ​ថ្ងៃអាទិត្យ Liverpool ត្រូវ​លេង​នៅ​ទឹកដី​របស់ Crystal និង Chelsea ទទួល​មាន់​ខ្នាយ​មាស Tottenham ដែល​លទ្ធផល​អាច​នឹង​ស្មើ​គ្នា​តែ​ប៉ុណ្ណោះ​។​

​ដោយឡែក​បិសាច​ក្រហម Man U នឹង​ស្វាគមន៍​ក្រុម​លេខ​៤ West Ham នៅ​ថ្ងៃ​សៅរ៍ ដែល​នេះ​ជា​គូប្រជែង​យក​កៅអី​កំពូល​ទាំង​៤​ដ៏​ស្វិតស្វាញ​ផងដែរ​។ ហេតុដូច្នេះ ក្រុម​ប្រជែង Top 4 គឺ​ត្រូវ​ប៉ះ​គ្នា​ស្ទើរតែ​គ្រប់​គូ លើកលែងតែ Man City ដូច្នេះ​មេឃ​ខៀវ​ចុង​សប្តាហ៍​នេះ​លេង​បណ្តែតៗ​ស៊ី​ត្រឹម​មួយ​គ្រាប់​ក៏​ទទួល​បាន​បី​ពិន្ទុ ហើយ​កីឡាករ​ក៏​មិន​រង​ហានិភ័យ​របួស​នោះ​ដែរ ហើយ​បើ​ក្នុងករណី​ស្មើ​ក៏​មិន​ថ្វី​ដែរ ព្រោះ​នៅ​បន្ត​នាំមុខ​១២​ពិន្ទុ​បណ្តោះអាសន្ន​។

​ចំណែក​ក្រុម​នៅ​លី​ក​កំពូល​ដទៃទៀត​ដែល​រំពឹង​ឈ្នះ​នៅ​ចុង​សប្តាហ៍​នេះ​គឺ Leverkusen, Leipzig, Villarreal, Atl. Madrid, Sevilla, Real Madrid, PSG, Inter Milan និង Napoli​។

​សម្រាប់​ចុង​សប្តាហ៍​នេះ​យើង​នឹង​វិភាគ​ជូន​២​គូ​ប៉ុណ្ណោះ​នៅ​ក្របខ័ណ្ឌ EPL ៖

– [7] Manchester Utd vs West Ham [4]

​ការប្រកួត​នេះ​នឹង​ក្លាយជា​ការសាកល្បង​អត្តចរិត​របស់​បិសាច​ក្រហម​។ ពួកគេ​នៅ​ចាញ់​គេ​ឆ្ងាយ​ណាស់​ក្នុងការ​ប្រជែង​យក​តំណែង​កំពូល​ទាំង​បួន ហើយ​មាន​ព័ត៌មាន​ឥតឈប់ឈរ​អំពី​ជម្លោះ​និង​ភាព​មិន​ចុះសម្រុង​គ្នា​នៅក្នុង​ក្រុម​។​

​ហើយ​ឥឡូវ ពួកគេ​ត្រូវ​ប្រឈមមុខ​នឹង​ក្រុម​លេខ ៤ West Ham ដែល​ដាក់​គោលដៅ​ដណ្តើមយក​តំណែង CL ឱ្យខាងតែបាន​ផងដែរ​។​

​ដោយសារ​ក្រុម​ទាំងពីរ​នេះ​ប្រជែង​គ្នា​យក​លេខ​៤ ដូច្នេះ​ការប្រកួត​នេះ​នឹង​ក្លាយ​ជា​ការប្រកួត​ស្លាប់​រស់​សម្រាប់​ពួកគេ ហើយ​អ្នក​ណា​ដែល​ឈ្នះ គឺ​អាច​និយាយបាន​ថា​មាន​ភាគរយ​ខ្ពស់​ក្នុង​ការធានា​កៅអី​កំពូល​ទាំង​៤​។​

​ដោយហេតុនេះ​ហើយ​យើង​រំពឹង​មាន​គ្រាប់​បាល់​ស៊ុត​បញ្ចូល​គ្នា​នៅ​ចុង​សប្តាហ៍​នេះ​នៅ​ទឹកដី Old Trafford ។​

​ក្រុម​ទាំង​ពីរ​តែង​ស៊ុត​បំប៉ោង​សំណាញ់​ទី​ជាប់លាប់​មិនដែល​ខាន​នោះទេ ហើយ​សម​នឹង​ការប្រកួត​នេះ​សំខាន់​ផង​នោះ យើង​រំពឹង​មានការ​ស៊ុត​ចូល​គ្នា​ទៅវិញទៅមក​កក្រើក​កីឡដ្ឋាន​ជាមិនខាន​។​

​ប្រវត្តិ​ជួបគ្នា​

– ជួប​គ្នា​ចុងក្រោយ West Ham ឈ្នះ ១-០​។​
– មុន​ជំនួប​ខាងលើ Man U ឈ្នះ​ទាំង​ក្នុង​និង​ក្រៅ​ទឹកដី​។
– គិត​ចាប់តាំងពី​ឆ្នាំ​២០១៥ បិសាច​ក្រហម​ខកខាន​ស៊ុត​បញ្ចូល​ទី​ម្តងគត់​នៅ​ទឹកដី Old Trafford ពេល​ទទួល West Ham​។​
– Man U ទទួល West Ham លើក​ចុងក្រោយ​បង្អស់​គឺ​ឈ្នះ ១-០​។​

​ការវិភាគ​

​កូនក្រុម​របស់លោក រ៉ា​ហ្វ រេ​ង​និក បាន​កត់ត្រា​ជ័យជម្នះ ១-៣ នៅ​ថ្ងៃ​ប្រកួត​ចុងក្រោយ​នៅ​ទឹកដី​របស់ Brentford ។ ពួកគេ​ក៏​មិន​ចាញ់​ផងដែរ​ក្នុង​ការប្រកួត​ចំនួន ១២ លើក​នៃ​ការប្រកួត​សរុប ១៣ លើកចុងក្រោយ ហើយ​ពួកគេ​បាន​ស៊ុត​បញ្ចូល​ទី ២ គ្រាប់​ឡើងទៅ​ក្នុង ៣ ប្រកួត​នៃ ៥ ប្រកួត​ចុងក្រោយ​របស់​ពួកគេ​។​

​ជាងនេះទៅទៀត​ពួកគេ​ខកខាន​ស៊ុត​បញ្ចូល​ទី​នៅ​ទឹកដី​ខ្លួន​ឯង​បី​ដង​ប៉ុណ្ណោះ​នៅ​រដូវ​កាល​នេះ​គិត​ចាប់តាំងពី​ខែកញ្ញា​មក ហើយ​ការខកខាន​២​លើក​ក្នុងចំណោម​នោះ​គឺ​ប្រកួត​ទល់នឹង Manchester City និង Liverpool​។​

​ដោយឡែក West Ham បាន​ចាញ់ ២-៣ នៅក្នុង​ផ្ទះ​កាលពី​សប្តាហ៍​មុន​ទល់នឹង Leeds ។ ប៉ុន្តែ​មុន​នេះ​ពួកគេ​បាន​ឈ្នះ​៤​ប្រកួត​ជាប់ៗ​គ្នា ហើយ​ស៊ុត​ចូល​លើសពី​២​គ្រាប់​នៅ​៦​ប្រកួត​ចុងក្រោយ​ជាប់ៗ​គ្នា​។​

​ដោយ​ពិចារណា​លើ​ចំណុច​ទាំងអស់នេះ យើង​រំពឹង​មាន​គ្រាប់​បាល់​ច្រើន​រវាង​ក្រុម​ទាំង​ពីរ​។​

​លទ្ធផល​ព្យាករណ៍ Man U ចាញ់ ១-២​។​

– [12] Southampton vs Manchester City [1]

​ក្រុម​ការពារ​តំណែង​ជើងឯក Manchester City ហាក់​គ្មាន​ក្រុម​ណា​អាច​បញ្ឈប់​បានឡើយ​នាពេលនេះ​។ ពួកគេ​កំពុង​ឈរ​នៅលើ​កំពូល​តារាង​ដោយមាន ១១ ពិន្ទុ​នាំមុខ​លើ​លេខ​២ Liverpool ហើយ​ពួកគេ​ក៏​កំពុង​ស្ថិត​ក្នុង​ទម្រង់​លេង​ឈ្នះ​ជាប់ៗ​គ្នា​យូរ​ផងដែរ​។ ពួកគេ​តែង​ស៊ុត​ចូល​ទី​គូប្រកួត​ច្រើនៗ​គ្រាប់ ហើយ​ពួកគេ​ក៏​មាន​ខ្សែការពារ​ល្អ​បំផុត​នៅក្នុង​លី​ក​ទាំងមូល​ផង​ដែរ​។​

​ហើយ​ស្របពេល Chelsea ចំណាត់ថ្នាក់​លេខ ៣ ត្រូវ​ជួប​ក្រុម​លេខ ៥ Tottenham រួម​ជាមួយនឹង​ក្រុម West Ham ចំណាត់ថ្នាក់​ទី ៤ ត្រូវ​ប៉ះ​ក្រុម Manchester United ចំណាត់ថ្នាក់​ទី ៧ នេះ​គឺជា​ឱកាស​មាស​សម្រាប់​កូនក្រុម​របស់លោក ប៉េប ហ្គាឌី​អូ​ឡា បង្កើន​ការ​នាំមុខ​បន្ថែមទៀត​។​

​គូប្រកួត​របស់​ពួកគេ​សម្រាប់​ថ្ងៃ​សៅរ៍​នេះ​គឺ Southampton ជា​ក្រុម​ដែល​លេង​ឡើង​ចុះ​មិន​ថេរ​នោះទេ​។ ពួកគេ​បាន​ទទួល​ជ័យជម្នះ​សរុប​ចំនួន ៥ ដង​ប៉ុណ្ណោះ​ក្នុង​យុទ្ធនាការ​រដូវ​កាល​នេះ ហើយ​អ្វី​ដែល​សំខាន់​បំផុត​នោះ​គឺ​ពួកគេ​មាន​កំណត់ត្រា​ខ្សោយ​ខ្លាំង​ណាស់​ពេល​ប៉ះ Man City ក្នុង​រយៈពេល​ប៉ុន្មាន​ឆ្នាំ​កន្លងមកនេះ​។​

​សម្រាប់​ហេតុផល​នេះ យើង​រំពឹង Man City បន្ត​ឈ្នះ​ថែម​ទៀត ប៉ុន្តែ​ក្នុង​លទ្ធផល​តិចតួច​ប៉ុណ្ណោះ​គឺ ១-០៕

Man U មិន​រំពឹង​ទទួល​លទ្ធផល​ល្អ​ពេល​ប៉ះ West Ham ថ្ងៃ​សៅរ៍​នេះ