ដោយៈ សុខ​សុ​ភ័​ណ្ឌ / កំពង់ស្ពឺៈ រថយន្ត​មួយគ្រឿង ព្រមទាំង​កូន​គ្រែង ប្រមាណ​ជាង ១២ តោន បាន​ត្រូវ​នគរបាល​ការិយាល័យ ប្រឆាំង​បទល្មើស សេដ្ឋកិច្ច បង្ក្រាប នៅ​ថ្ងៃទី​២២ ខែមករា ឆ្នាំ​២០២២ នៅតាម​បណ្តោយ ផ្លូវជាតិ​លេខ​៤ ចន្លោះ​គីឡូម៉ែត្រ​លេខ ៧១-៧២ ស្ថិត​ក្នុងភូមិ​ក្រាំង​ភ្នៅ ឃុំ​អូរ ស្រុក​ភ្នំស្រួច ខេត្តកំពង់ស្ពឺ​។​

​លោក ហេង សម្រេច នាយការិយាល័យ​នគរបាល ប្រឆាំង​បទល្មើស​សេដ្ឋកិច្ច នៃ​ស្នងការដ្ឋាន​នគរបាល ខេត្តកំពង់ស្ពឺ បាន​ឲ្យ​ដឹងថាៈ នគរបាល​ប្រឆាំង បទល្មើស សេដ្ឋកិច្ច​ខេត្ត បាន​ឃាត់​រថយន្ត​មួយគ្រឿង ម៉ាក Daewoo ពាក់​ស្លាក លេខ កំពង់ធំ 3A 2312 ។ អ្នកបើកបរ​ឈ្មោះ ឃាង សុខា ភេទ​ប្រុស អាយុ ៤១​ឆ្នាំ រស់នៅ​ភូមិ​ត្រពាំង​ត្រស់ ឃុំ​សំ​រោងទង ស្រុក​សំរោង​ទង ខេត្តកំពង់ស្ពឺ ។ បុរស​នោះ ដឹក​គ្រឿង​សមុទ្រ ប្រភេទ កូន​គ្រែង គ្មាន​លិខិតអនុញ្ញាត​ដោយ​ដឹក ចេញពី​ចំណុច​កំពង់ផែ​កែវផុស ស្រុកស្រែ​អំបិល ខេត្តកោះកុង ទៅ​ប្រទេស វៀតណាម តាម​ច្រក​ដា ខេត្ត​ត្បូងឃ្មុំ​។​

​លោក​បាន​បន្តទៀតថាៈ នៅក្នុង​ការបង្ក្រាប​នេះ សមត្ថកិច្ច​ជំនាញ​វត្ថុតាង​ជាក់ ស្តែង រួមមាន រថយន្ត​មួយគ្រឿង កូន​គ្រែង ចំនួន ២៤៥ បាវ (​ទំងន់​ជាង ១២ តោន​) វត្ថុតាង​ខាងលើ បានប្រគល់​ជូន​មន្ទីរ​កសិកម្ម រុក្ខាប្រមាញ់ និង​នេសាទ ខេត្តកំពង់ស្ពឺ ដើម្បី​អនុវត្ត​នីតិវិធី​៕/V​-PC