​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ទីក្រុង​ហ្សឺ​ណែ​វ ជា​ទីលាន​អព្យាក្រឹត ដែល​ធ្លាប់​ជា​ម្ចាស់ផ្ទះ​សម្រាប់​ការចរចា​សង្គ្រាមត្រជាក់​នោះ​បាន​ស្វាគមន៍​ម្តង​ទៀត​ចំពោះ​មន្ត្រី​រុស្ស៊ី​និង​អាម៉េរិក​ដើម្បី​​ពិភាក្សា​អំពី​មី​ស៊ី​ល អាវុធ​នុយក្លេអ៊ែរ និង​ប្លុក​ឥទ្ធិពល​របស់​គ្នា​នៅមុន​លទ្ធភាព​ផ្ទុះ​ជម្លោះ​នឹង​គ្នា​។​

​វា​មាន​កំសួល​ខ្លាំងក្លា​ដូច​ការ​ប្រទាញប្រទង់​រវាង​មហាអំណាច​លោក​ខាងកើត​និង​លោក​ខាងលិច​នា​សតវត្សរ៍​ទី ២០ នៅក្នុង​រដ្ឋធានី​របស់​ស្វ៊ី​ស​ដែល​ជា​ការ​រំលេច​ឱ្យឃើញ​ឡើងវិញ​នា​សម័យកាល​​ដ៏​តានតឹង​រវាង​សង្គ្រាមលោកលើកទី ២ និង​ការដួលរលំ​នៃ​សហភាពសូវៀត​ក្នុង​ឆ្នាំ ១៩៩១ នៅពេលដែល​ជោគវាសនា​របស់​ពិភពលោក​កំពុង​ស្ថិតនៅ​មាត់​ជ្រោះ​មរណៈ​។​

​ជំរំ​គូប្រជែង​ទាំងពីរ​ចាប់ផ្តើម​ធ្វើ​ការប្រៀបធៀប​ខ្លួនឯង​ដោយ​បើកចំហ បើទោះបីជា​អ្នកសង្កេតការណ៍​កត់សម្គាល់​ឃើញ​ពី​ភាពខុស​គ្នា​សំខាន់ៗ​ក៏ដោយ​។​

​លោក ឌី​មី​ទ្រី ប៉ូ​លី​យ៉ាន​ស្គី (Dmitri Polyansky)​ជា​ឯកអគ្គរដ្ឋទូត​រង​រុស្ស៊ី​ប្រចាំ​អង្គការសហប្រជាជាតិ​បាន​និយាយ​កាលពី​ខែ​មុន​ថា “​អ្វី​ដែល​យើង​មាន​នៅ​ពេល​នេះ​គឺ​យើង​កំពុង​មាន​ប្រភេទ​​នៃ​សង្គ្រាមត្រជាក់​ឡើងវិញ ពោលគឺ​សង្គ្រាមត្រជាក់ ២.០”​។​

​នៅ​ទីក្រុង​បែរ​ឡាំង ជា​ទីក្រុង​ធ្លាប់​ខ័ណ្ឌ​ចែក​ដោយ​ជញ្ជាំង​ដែល​បាន​ក្លាយជា​និមិត្តរូប​នៃ​សង្គ្រាមត្រជាក់ រដ្ឋមន្ត្រីការបរទេស​អាម៉េរិក​លោក អាន​ថូ​នី ប្លីង​កិន បាន​ព្រមាន​កាលពី​ថ្ងៃ​ព្រហស្បតិ៍​ថា​ការ​​ឈ្លានពាន​របស់​រុស្ស៊ី​លើ​អ៊ុ​យក្រែន ដែល​លោក​ខាងលិច​បារម្ភ​អាច​កើតឡើង​នៅ​ពេល​ណាមួយ​នោះ នឹង​នាំ​ពិភពលោក​ត្រឡប់​ទៅរក​ពេលវេលា​មួយ​”​នៅពេល​ដែល​ទ្វីប​នេះ​និង​ទីក្រុង​នេះ​ត្រូវបាន​ខ័ណ្ឌ​​ចែក​ជា​ពីរ​…​ជាមួយ​នឹង​ការគំរាមកំហែង​នៃ​សង្គ្រាម​ពេញទំហឹង​ស្ថិតក្នុង​ចិត្ត​មនុស្ស​គ្រប់គ្នា​”​។​

– ការអនុវត្ត​នយោបាយ​គ្រោះថ្នាក់​

​ភាពស្រដៀងគ្នា​គឺ​កំពុង​កើតឡើង​ហើយ​។

​ជា​បឋម​គឺ​ការ​ខ័ណ្ឌ​ចែក​ភូមិសាស្ត្រគឺ​ដូចគ្នា​បេះបិទ ដោយ​ទីក្រុង​មូ​ស្គូប្រ​ឈមមុខ​ជាមួយ​លោកខា​ង​លិច​។​

​យោធា​ផង​ដែរ ជាថ្មី​ម្តងទៀត​គឺ​មាន​ហានិភ័យ​ផ្ទុះ​ជា​ជម្លោះ​ក្នុង​តំបន់ ដែល​ការប្រយុទ្ធ​គ្នា​ដោយ​កងកម្លាំង​ប្រូក​ស៊ី​(​តំណាង​)​អាច​បង្កើត​ទៅ​ជា​ការប្រឈមមុខ​ដាក់​គ្នា​ដោយផ្ទាល់​រវាង​មហាអំណាច​ធំៗ​។​

​ហើយ​ដូច​ក្នុងសម័យ​ពុះកញ្ជ្រោល​បំផុត​នៃ​សង្គ្រាមត្រជាក់ មហាអំណាច​ទាំងពីរ​បាន​ប្រមូលផ្តុំ​សម្ពន្ធមិត្ត​និង​ការពារ​តំបន់​ឥទ្ធិពល​របស់​ពួកគេ​រៀងៗ​ខ្លួន​។​

​ខណៈ​អាម៉េរិក​សង្ស័យថា​រុស្ស៊ី​ចង់​ប្រើប្រាស់​បេឡា​រូស​ជា​មូលដ្ឋាន​ក្រោយ​ផ្ទះ​សម្រាប់​លទ្ធភាព​វាយលុក​លើ​អ៊ុយ​ក្រែន​អង្គកា​រណាតូដែល​ជា​សម្ពន្ធមិ​ត្ត​ឆ្លងសមុទ្រ​អា​ត្លង់​ទិក​ដែល​សហរដ្ឋអាម៉េរិ​ក​ថ្មីៗ​នេះ​បាន​​ព្យាយាម​បង្វែរ​ទិសដៅ​ឆ្ពោះទៅរក​ចិន បាន​រក​ហេតុផល​សំខាន់​របស់​ខ្លួន​ឡើងវិញ​តាំងពី​ពេល​បង្កើត​អង្គការ​នេះ​ឡើង​ក្នុង​ឆ្នាំ ១៩៤៩​គឺ​ការពារ​អឺរ៉ុប​ដែល​មិនមែន​ជា​សូវៀ​ត​ពី​លទ្ធភាព​វាយប្រហារ​ដោយ​​ទីក្រុង​មូ​ស្គូ​។​

​លោកស្រី សា​រ៉ា ក្រេប (Sarah Kreps) ជា​សាស្ត្រាចារ្យ​នៅ​សាកលវិទ្យាល័យខ័​រនែ​ល (Cornell) បាន​ប្រាប់​ទីភ្នាក់ងារ​សារព័ត៌មាន AFP​ថា ប្រធានាធិបតី​រុស្ស៊ី លោក វ្ល៉ា​ឌី​មៀរ ពូ​ទីន​ដែល​ជា​អតីត​​មន្ត្រី​ចារកម្ម KGB កំពុង​អនុវត្ត “​នយោបាយ​គ្រោះថ្នាក់​យក​ស្ទីល​តាម​សម័យ​សង្គ្រាមត្រជាក់ ការគំរាមកំហែង និង​ការបំភិតបំភ័យ ក្នុង​គោលបំណង​ឱ្យ​គេ​មើល​ទៅ​ពូ​ទីន​ជា​បុរស​ខ្លាំង​”​។​

​រាប់​ចាប់ពី​ទីតាំង​នៃ​កិច្ចចរចា​រហូត​ដល់​វាក្យស​ព្ទដែល​បាន​ប្រើ​និង​បញ្ហា​នៅ​លើ​តុ​ចរចា វា​គឺ​មាន​អារម្មណ៍​ដូច​សម័យ​សង្គ្រាមត្រជាក់​យ៉ាង​អ៊ីចឹង​នៅពេលដែល​ភាគី​ទាំង​ពីរ​ហៀបនឹង​ដាក់ពង្រាយ​មី​ស៊ី​ល​​និង​កងទ័ព​នៅ​មាត់ទ្វារ​នៃ​ប្លុក​ទល់មុខ​គ្នា​ទាំង​ពីរ​នេះ​៕

​រដ្ឋមន្ត្រីការបរទេស​អាម៉េរិក អាន​ថូ​នី ប្លីង​កិន​ចាប់​ដៃ​ជាមួយ​រដ្ឋ​មន្ត្រី​ការបរទេស​រុស្ស៊ី សឺ​ហ្គេ ឡាវ​រ៉ូវ នៅ​ទីក្រុង​ហ្សឺ​ណែវ​កាលពី​ថ្ងៃទី​២១​មករា​២០២២​