ដោយៈ សាត​ចាន់​បុត្រ / មណ្ឌលគិរីៈ ដុត​ស្មៅ ភ្លេច​មើល​ត្រាក់ទ័​ខូច ឆេះ​ទាំង​ត្រាក់​អស់ ១ គ្រឿង ម្ចាស់​ត្រាក់ទ័រ អោយ​សង​ជាង ១ ម៉ឺន​ដុល្លារ ហេតុការណ៍​នេះ បានកើត​ឡើង នៅ​ថ្ងៃទី ២៣ ខែមករា ឆ្នាំ​២០២២ នៅ​ឃុំ​ស្រែ​ឈូក ស្រុក​កែវ​សីមា ខេត្តមណ្ឌលគិរី​។

​សមត្ថកិច្ច បានឱ្យដឹងថាៈ កម្លាំង​ប៉ុស្តិ៍នគរបាល​រដ្ឋបាល​ស្រែ​ឈូក បានទទួល​ពាក្យបណ្ដឹង ពី​ឈ្មោះ ភិន ទីន ភេទ​ប្រុស អាយុ ៣៨ ឆ្នាំ ជនជាតិខ្មែរ មុខរបរ កសិករ មក​ស្នាក់នៅ បណ្ដោះអាសន្ន ក្នុងភូមិ​រណែង ឃុំ​ស្រែ​ឈូក ស្រុក​កែវ​សីមា ខេត្តមណ្ឌលគិរី​។

​បុរស​ម្នាក់នេះ បានមក​ប្តឹង​ម្ចាស់​ចំការ ដែល​បាន​ដុត​គំនរ​ព្រៃ និង​ស្មៅ បណ្ដាលឱ្យ​ភ្លើង​ឆេះ ត្រាក់ទ័រ​ភ្ជួរ​ដី ចំនួន ១ គ្រឿង​របស់គាត់​។​

​ដើមហេតុ​ដំបូង​គឺ ម្ចាស់​ចំការ ឈ្មោះ រិ​ទ្ធ ទិ​ត្យ ភេទ​ស្រី អាយុ ២៥ ឆ្នាំ ជនជាតិ​ព្នង សញ្ជាតិ​ខ្មែរ មុខរបរ កសិករ មាន​ទីលំនៅ នៅ​ភូមិ​ព្រះ ឃុំ​ស្រែ​ឈូក ស្រុក​កែវ​សីមា ខេត្តមណ្ឌលគិរី បាន​ជួល​គ្រឿងចក្រ ដែលមាន​ម្ចាស់​ឈ្មោះ ភី​ន ទីន ភេទ​ប្រុស អាយុ ៣៩ ឆ្នាំ ជនជាតិខ្មែរ មុខរបរ កសិករ មាន​ទីលំនៅ ស្នាក់នៅ​បណ្ដោះអាសន្ន ក្នុងភូមិ​រណែង ឃុំ​ស្រែ​ឈូក ស្រុក​កែវ​សីមា ខេត្តមណ្ឌលគិរី អោយទៅ​ឈួ​ស​ឆាយដី​ចំការ​របស់ខ្លួន ហើយ ភ្ជួរ​ដី​ដើម្បី​ដាំដំឡូង​មី កាលពី​ថ្ងៃទី​១៨ ខែមករា ឆ្នាំ ២០២២​។​

​នៅពេល​ឈូសឆាយដី ជិត​រួចហើយ ត្រាក់ទ័រ ក៏បាន​ខូច (​ឆេះដុំ​ភ្លើង​) ។ ម្ចាស់​ត្រាក់ទ័រ (​ឈ្មោះ ភី​ន ទីន​) ក៏បាន​ដោះយក​ដុំ​ភ្លើង ទៅ​ជួសជុល ។ ចំណែក​ម្ចាស់​ចំការ (​ឈ្មោះ រិ​ទ្ធ ទិ​ត្យ​)​ក៏បាន​ដុត​គំនរ​ព្រៃ និង​ស្មៅ ដែល​ត្រាក់ទ័រ បាន​ឈូស ប្រមូល​នៅ​ជិត​ត្រាក់ទ័រ ដែល​ខូច ហើយក៏​មិនបាន​នៅ​មើល​ភ្លើង ដែល​ខ្លួន​បាន​ដុត​នោះទេ​។

​លុះ​មកដល់​វេលា​ម៉ោង ១៤ និង​៣០ នាទី នា​ថ្ងៃទី ២២ ខែ មករា ឆ្នាំ ២០២២ ម្ចាស់ ត្រាក់ទ័រ ឈ្មោះ ភី​ន ទីន បាន​ត្រឡប់​ទៅ​មើល​ត្រាក់ទ័រ​នោះ ហើយក៏​បានឃើញ​ភ្លើង ឆេះ​ត្រាក់ទ័រ របស់ខ្លួន អស់​បាត់ទៅហើយ ។​

​ក្រោយមក កម្លាំង​ប៉ុស្តិ៍នគរបាល​រដ្ឋបាល​ស្រែ​ឈូក ក៏បាន​ចុះ​ទៅដល់​កន្លែងកើតហេតុ និង​បានឃើញ​មាន​ភ្លើង​ឆេះ​ត្រាក់ទ័រ និង​ខូចខាត​អស់ ពិតប្រាកដ​មែន​។​

​បច្ចុប្បន្ន ម្ចាស់​ត្រាក់ទ័រ បាន​សំណូមពរ អោយ​ម្ចាស់​ចំការ ចេញសង​ថ្លៃ​ត្រាក់ទ័រ ចំនួន ១៣.០០០ ដុល្លារ តែបើ​គ្មាន​លុយ​សង​ទេនោះ សុំ​សង​ជា​ដីចំការ ក៏បាន​ដែរ​៕/V​