ដោយៈ វ៉ៃ​កូ / ស្វាយរៀងៈ ភូមិ​ខ្មែរ​មរតក បង្ហាញ​លទ្ធផល​វិជ្ជមាន របស់​ខ្លួ សម្រាប់​ឆ្នាំ ២០២១ និង​លើក​ទិសដៅ អនុវត្ត​បន្ត ឆ្នាំ​២០២២ តាមរយៈ​សិក្ខាសាលា​រយៈពេល ២ ថ្ងៃ ចាប់ពី​ថ្ងៃទី​២២ ដល់​ថ្ងៃទី​២៣ ខែមករា ឆ្នាំ​២០២២ ដែល​បាន​ប្រព្រឹត្តទៅ នា​សណ្ឋាគារ Garden City ។​

​សិក្ខាសាលា​នេះ បាន​ត្រូវគេ​ចាត់ទុកថា ជា​ព្រឹ​ត្ត​ការណ៍​ដ៏​ធំ ប្រចាំឆ្នាំ​២០២២ ( Kick Off 2022 Event) ដែលជា​ការជួបជុំ​ថ្នាក់ដឹកនាំ អាជីវកម្ម បុត្រ​សម្ព័ន្ធ​ទាំងអស់​របស់ ថ្នាក់ដឹកនាំ​ក្រុមហ៊ុន ដៃគូ​ជាតិ អន្តរជាតិ សហការី ភូមិ​ខ្មែរ​គ្រុប ដែលមាន​សមាជិក ចូលរួម ប្រមាណ​ជាង ២០០ នាក់ ដែល​បាន​អញ្ជើញ​មកពី​ខេត្តកំពង់ធំ កំពត និង ខេត្តស្វាយរៀង ។

​លោក សោម សុធា អគ្គនាយក​គម្រោង​ភូមិ​ខ្មែរ​មរតក បាន​ឲ្យ​ដឹង​នៅ​ព្រឹក​ថ្ងៃទី​២៣ ខែមករា ឆ្នាំ​២០២២ នេះ​ថាៈ គោលបំណង​ដែល​បានរៀបចំ នៅ​អង្គសិក្ខាសាលា​នេះ​ឡើង គឺ​ដើម្បី​បង្ហាញ និង​អបអរសាទរ លទ្ធផល​ឆ្នាំ​២០២១ យ៉ាង​ល្អ​ក្រៃលែង ពី​សំណាក់​ថ្នាក់​នាំ អាជីវកម្ម បុត្រ​សម្ព័ន្ធ​ទាំងអស់ ព្រមជាមួយ​ការបង្ហាញ អំពី​ផែនការអាជីវកម្ម គោលដៅ ប្រាក់ចំណូល ប្រចាំឆ្នាំ​២០២២ នេះ​។

​លោក​បាន​ឲ្យ​ដឹង​ទៀតថាៈ រឹតតែ​ពិសេស​ទៅទៀត​នេះ យើង​ក៏​ទទួល​ការអញ្ជើញ​ចូលរួម ដ៏​ខ្ពង់ខ្ពស់ អំពី​ដៃគូ​ក្រុមហ៊ុន​អន្តរជាតិ ACCI ដែល​ដឹកនាំ និង​ធ្វើ​បទ​បង្ហាញ​ដោយផ្ទាល់ ពី​លោក Zhigang Wang នាយក​ប្រតិបត្តិ ACCI Group អំពី​ទិសដៅ​សហការ ជាមួយ​អាជីវកម្ម Phum Khmer Group របស់​យើង ជាពិសេស​គឺ វិស័យ​អចលន ទ្រព្យ ទៅលើ​ការ​បោះទុន ប្រាក់​វិនិយោគ នាំយកមក​នូវ គម្រោង​សហគ្រាស រោងចក្រ ផ្សារ​ពិព័រណ៍​ផលិតផល​សង្ហា​រឹម គ្រឿងអគ្គិសនី ក្រុមហ៊ុន​បេតុង និង​ក្រុមហ៊ុន​ដៃគូ​អន្តរជាតិ មួយចំនួនទៀត ដើម្បី​រួមគ្នា​ផ្តល់ជូន នូវ​លំនៅឋាន ប្រកបដោយ​គុណភាព ការអភិវឌ្ឍ​តំបន់ រស់នៅ​បែប​បៃតង ប្រកបដោយ​ជីវភាព​សេដ្ឋកិច្ច សំបូរបែប ហើយ​លោក​ក៏​សូម​ថ្លែង អំណរគុណ ចំពោះ​កិច្ច​ខំប្រឹងប្រែង របស់​សហការី​យើង​ទាំងអស់ និង​ជូន​ចំពោះ​ក្រុមហ៊ុន ដៃគូ សហការ​ជាតិ អន្តរជាតិ ដែល​ផ្តល់នូវ​ជំនឿ​ទុកចិត្ត កិច្ចសហការ កាន់តែ​ធំ​ជា​បន្តបន្ទាប់ គាំទ្រ​យ៉ាង​ពេញទំហឹង ទៅ​សកម្មភាព​អាជីវកម្ម​នានា​របស់​យើង​។

​លោក Zhigang Wang នាយក​ប្រតិបត្តិ ACCI Group ក៏បាន​ធ្វើការ​កោត សរសើរ និង​វាយតម្លៃ​ខ្ពស់ ចំពោះ​ភាព​រីកចំរើន​របស់ គម្រោង​ភូមិ​ខ្មែរ​មរតក វិស័យ​អចលន ទ្រព្យ ទៅលើ​ការ​បោះទុន វិនិយោគ ដែលជា​ការជឿទុកចិត្ត ដោយសារ​មាន​ភាពច្បាស់ លាស់ មាន​ថ្នាក់ដឹកនាំ ប្រកបដោយ​ភាពជោគជ័យ មាន​ទំនួល​ខុសត្រូវ​ខ្ពស់ ក្នុង​វិស័យ អចលនទ្រព្យ ដើម្បី​ធ្វើជា​ដៃគូ​វិនិយោគ ជា​បន្តទៅទៀត​។​

​សូមបញ្ជាក់​ផងដែរ​ថាៈ គម្រោង​អចលនទ្រព្យ ភូមិ​មរតក និង មរតក​មានជ័យ មិន​ត្រឹមតែ ធ្វើការ​វិនិយោគ ទៅលើ​វិស័យ​អ​ចនទ្រ​ព្យ ប៉ុណ្ណោះ​ទេ តែ​ក៏បាន ចូលរួម​នៅក្នុង​ការងារ​សង្គម ដូចជា​បាន​ស្ថាបនា​ផ្លូវ និង​ផ្ដល់​អំណោយ ដល់​ប្រជាពលរដ្ឋ ជា​ហូរហែរ​ជាច្រើន​គ្រួសារ ផងដែរ ហើយ​នៅពេល​បច្ចុប្បន្ននេះ គម្រោង​បាន​នឹង​កំពុងធ្វើការ​ពង្រីក​ទីតាំង​បន្ថែមទៀត នៅ​ស្រុក​ស្វាយជ្រំ ដែលមាន​ដី​ជាង ២០០ ហិកតា ដើម្បី​ចូលរួម​អភិវឌ្ឍន៍ ជាមួយ រាជរដ្ឋាភិបាល ក៏ដូចជា​អាជ្ញាធរ​ដែនដី បង្កើតបានជា​តំបន់​អាជីវកម្ម​ផ្សេងៗ និង​ធ្វើ​ឲ្យ​តំបន់ ខាងលិច ក្រុង​ស្វាយរៀង ហើយ​ក៏មាន​គ្រោង​នៅ​ខេត្តកំពង់ធំ ខេត្តកំពត ដើម្បី​អភិវឌ្ឍន៍ ឲ្យ​ក្លាយទៅជា​តំបន់​រស់នៅ​មួយ ដែលមាន​ភាព​អ៊ូអរ ស៊ីវីល័យ ទាក់ទាញ​និង​មាន​ដី ផ្ទះ តូប​ផ្សារ តម្លៃ​សមរម្យ ហើយ​ក្នុងការ​អភិវឌ្ឍ គម្រោង​អចលនទ្រព្យ ភូមិ​មរតក ក៏​មិន​ភ្លេច អំពី​វប្បធម៌ អរិយធម៌ សាសនា នោះដែរ ៕/V​