​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ យោងតាម​កូនស្រី​របស់​លោក​បាន​ឱ្យ​ដឹងថា អតីត​នាយករដ្ឋមន្ត្រី​កាន់​អំណាច​យូរ​បំផុត​របស់​ម៉ាឡេស៊ី លោក មហា​ធៀ មហា​ម៉ា​ត អាយុ ៩៦​ឆ្នាំ​បាន​ទាក់ទង​​ជាមួយ​ក្រុម​គ្រួសារ​របស់​គាត់​ខណៈ​គាត់​កំពុងស្ថិត​នៅ​ក្នុង​មន្ទីរពេទ្យ​។​

​លោកស្រី ដា​ទីន ប៉ាឌូ​កា ម៉ា​រី​ណា មហា​ធៀ (Datin Paduka Marina Mahathir)​បាន​និយាយ​នៅក្នុង​សេចក្តីថ្លែងការណ៍​មួយ​កាលពី​ថ្ងៃអាទិត្យ​ទី​២៣ មករា​ថា​”​យើង​ក្នុងនាម​ជា​គ្រួសារ​បាន​ទាក់​​ទង​ជាមួយ​គាត់​”​។​

​លោកស្រី​បាន​និយាយថា “​តាងនាម​ឱ្យ​លោកស្រី​បណ្ឌិត ស៊ី​ទី ហា​ស្មា ម៉ូដ អា​លី (Siti Hasmah Mohd Ali) ក្រុមគ្រួសារ​សូម​អរគុណ​អ្នក​ទាំងអស់​គ្នា​មិន​ថា​ក្នុងប្រទេស​ឬ​ក្រៅប្រទេស​ដែល​បាន​បន់​​ស្រ​ន់​…​ឱ្យ​លោក​បណ្ឌិត​មហាធៀ​ឆាប់​ជា​សះស្បើយ​។ យើង​ក៏​សង្ឃឹម​ដែរ​ថា​សាធារណជន​នឹង​មិន​អើពើ​នឹង​ពាក្យ​ចចាមអារ៉ាម​ដែល​ផ្សព្វផ្សាយ​ដោយ​ប្រភព​ដែល​មិន​បាន​បញ្ជាក់​” ដោយ​បន្ថែម​ថា​វិទ្យាស្ថាន​ជាតិ​​បេះដូង (IJN)​ឬ​ក្រុម​គ្រួសារ​នឹង​ចេញ​សេចក្តីថ្លែងការណ៍​យូរៗ​ម្តង​។ លោកស្រី​បណ្ឌិត ស៊ី​ទី ហា​ស្មា ម៉ូដ អា​លី គឺជា​ភរិយា​របស់​លោក​បណ្ឌិត​មហា​ធៀ និង​ជា​ម្តាយ​របស់​លោកស្រី​ម៉ា​រី​ណា​។​

​រដ្ឋ​បុរស​វ័យ​ចំណាស់​រូបនេះ​ត្រូវបាន​បញ្ជូន​ចូល​មន្ទីរពេទ្យ IJN កាលពី​ថ្ងៃ​សៅរ៍​ជា​លើក​ទី​បី​ក្នុង​រយៈពេល​ត្រឹមតែ​ជាង​មួយខែ​។​

​កាសែត​ប្រចាំថ្ងៃ​របស់​ម៉ាឡេស៊ី Utusan កាលពី​ថ្ងៃអាទិត្យ​ក៏បាន​ដកស្រង់ “​ប្រភព​ជិតស្និទ្ធ​បំផុត​” ដែល​មិន​បញ្ចេញ​ឈ្មោះ ដោយ​និយាយ​ផងដែរ​ថា ស្ថានភាព​របស់​អតីត​មេដឹកនាំ​រូប​នេះ​មាន​ភាពនឹងនរ ហើយ​ថា គាត់​បាន​ដឹងខ្លួន​ឡើង​វិញ​និង​អាច​និយាយបាន​។​

​នៅក្នុង​ការវិវត្តន៍​ដាច់ដោយឡែក​មួយ ស្តេច​ម៉ាឡេស៊ី ស៊ុល​តង់ អាប់​ឌុល​ឡា អា​ម៉ា​ដ សា (Sultan Abdullah Ahmad Shah) ត្រូវបាន​បញ្ជូន​ចូល​មន្ទីរពេទ្យ IJN កាលពី​ថ្ងៃ​សៅរ៍​ផងដែរ​ដើម្បី​​ពិនិត្យ​និង​ព្យាបាល​ជង្គង់​និង​ក​ជើង​របស់​ទ្រង់​។​

​រាជវាំង​បាន​និយាយ​នៅក្នុង​សេចក្តីថ្លែងការណ៍​មួយ​កាលពី​ថ្ងៃអាទិត្យ​ថា ព្រះមហាក្សត្រ​នឹង​គង់នៅ​មន្ទីរពេទ្យ​រយៈពេល​ពីរ​បី​ថ្ងៃ​បន្ទាប់ពី​ការស្កែន​នៅ​ខែ​កញ្ញា​ឆ្នាំ ២០២០​បាន​បង្ហាញ​ពី​ការរង​របួស​ទាក់​​ទង​នឹង​កីឡា​៕

​លោក​មហា​ធៀ (​ឆ្វេង​) និង ព្រះមហាក្សត្រ​ម៉ាឡេស៊ី កំពុងស្ថិត​នៅ​មន្ទីរពេទ្យ IJN ដូចគ្នា​