​ប្រែ​សម្រួលៈ​បំណង​/​តៃ​ប៉ិះ​(ST)៖ តៃវ៉ាន់​កាលពី​ថ្ងៃអាទិត្យ​ទី​២៣​មករា​បាន​អះអាង​ថា​យន្តហោះ​ចម្បាំង​ចិន​ក្នុង​ចំនួន​យ៉ាងច្រើន​បំផុត​ចាប់តាំងពី​ខែ​តុលា​ឆ្នាំមុន បាន​ហោះចូល​ក្នុង​ដែនអាកាស​របស់ខ្លួន​​ដោយ​បង្ខំ​អោយ​អាជ្ញាធរ​ក្រុង​តៃប៉ិះ​បញ្ចេញ​យន្តហោះ​ប្រដេញ​ទៅ​ស្ទាក់​ផ្លូវ​និង​ព្រមាន​អោយ​យន្តហោះ​ទាំង​៣៩​គ្រឿង​ចេញ​ឆ្ងាយ​ទៅវិញ​។​

​ទោះជា​យ៉ាងណា ចិន​តែង​ចាត់ទុក​កោះ​តៃវ៉ាន់ រួម​ទាំង​ច្រក​សមុទ្រ​តៃវ៉ាន់​ជា​ផ្នែក​មួយ​នៃ​ទឹកដី​របស់​ខ្លួន​ដែល​នឹង​ត្រូវ​តែ​បង្រួបបង្រួម​ជាមួយ​មហា​ចិនដីគោក​វិញ​នៅ​ថ្ងៃ​ណាមួយ​ហើយ​អាច​ប្រើ​កម្លាំង​​យោធា​ក្នុងករណី​ចាំបាច់​។​

​អស់​ពេល​ជាង​មួយ​ឆ្នាំ​មកហើយ អាជ្ញាធរ​ក្រុង​តៃប៉ិះ​(​តៃវ៉ាន់​)​បាន​តវ៉ា​អំពី​បេសកកម្ម​ដោយ​កងទ័ពអាកាស​ចិន​នៅក្បែរ​កោះ​ប្រជាធិបតេយ្យ​មួយ​នេះ ដោយ​ភាគច្រើន​នៅ​ប៉ែក​និរតី​នៃ​តំបន់​កំណត់​អ​ត្ត​​សញ្ញាណ​ការពារ​ដែនអាកាស​របស់​តៃវ៉ាន់​ហៅថា​ADIZ​នៅជាប់​នឹង​កោះ​ប្រា​តា​ស​(Pratas)​ដែល​តៃវ៉ាន់​គ្រប់គ្រង​។​

​ក្រសួង​យោធា​តៃវ៉ាន់​បាន​និយាយថា បេសកកម្ម​ចុងក្រោយរ​បស់​កងទ័ពអាកាស​ចិន រួម​មាន​យន្តហោះ​ប្រយុទ្ធ​៣៤​គ្រឿង យន្តហោះ​សង្គ្រាម​អេឡិចត្រូនិច​៤​គ្រឿង​និង​យន្តហោះ​ទម្លាក់​គ្រាប់បែក​មួយ​គ្រឿង​។​​ពួក​វា​បាន​ហោះ​នៅក្នុង​តំបន់​មួយ​ឆ្ពោះ​ទៅ​ទិសឦសាន​នៃ​កោះ​ប្រា​តាស ហើយ​តៃវ៉ាន់​បាន​បញ្ជូន​យន្តហោះ​ប្រដេញ​ទៅ​ព្រមាន​យន្តហោះ​ចិន​នៅ​ពេល​ប្រព័ន្ធ​កាំជ្រួច​ក៏​ត្រូវបាន​ដាក់​ត្រៀមខ្លួន​និង​តាមដាន​​យន្តហោះ​ចិន​ទាំងនេះ​។​

​នៅ​មិនទាន់​មាន​ការនិយាយ​យ៉ាង​ណា​ពី​ចិន​នៅ​ឡើយ​ទេ ដែល​កន្លង​មក​តែង​បាន​និយាយថា ការហោះ​ដូច្នេះ​ជា​ការហ្វឹកហាត់​ក្នុង​បំណង​ការពារ​អធិបតេយ្យភាព​របស់​ខ្លួន​៕

​តៃវ៉ាន់​អះអាងថា​បាន​បញ្ជូន​យន្តហោះ​ប្រយុទ្ធ​ទៅ​ព្រមាន​យន្តហោះ​ចិន​អោយ​ចេញ​ឆ្ងាយ​ពី​ដែនអាកាស​របស់ខ្លួន​