​ប្រែ​សម្រួលៈ​បំណង​/​ព្រុច​សែ​ល​(ST)៖​ប៉ូលិស​នៅ​ក្រុង​ព្រុច​សែល​កាលពី​ថ្ងៃអាទិត្យ​ទី​២៣​មករា​បាន​បាញ់​ទឹក​និង​ឧស្ម័ន​ហៀរ​ទឹកភ្នែក​ដើម្បី​បំបែកហ្វូង​បាតុកម្ម​នៅ​ក្បែរ​ទីស្នាក់ការ​របស់​សហភាព​អឺរ៉ុប​បន្ទាប់​​ពី​ការជួបជុំ​តវ៉ា​មួយ​ដែល​មាន​អ្នកចួលរួម​ប្រមាណ​៥០.០០០​នាក់​ដើម្បី​ប្រឆាំង​នឹង​ការ​រឹតត្បិត​ប្រឆាំង​កូវី​ដ​១៩​បាន​ប្រែជា​ហិង្សា​។​

​ទោះជា​បែ​ល​ហ្សិ​ចបាន​ប្រកាស​បន្ធូរបន្ថយ​ការ​រឹតត្បិត​ប្រឆាំង​នឹង​វីរុស​កូរ៉ូណា​បន្តិច​កាលពី​ថ្ងៃ​សុក្រ​ចំ​ពេល​ចំនួន​ឆ្លង​កើនឡើង​ខ្ពស់បំផុត រដ្ឋាភិបាល​ក៏​បាន​បញ្ជាក់ថា ប្រជាជន​ត្រូវតែ​ចាក់​វ៉ាក់សាំង​កូវី​ដ​១៩​ដូស​ជំរុញ​ក្រោយ​ចាក់​ដូសទី​២​បាន​៥​ខែ ដើម្បី​រក្សា​បាន​កាត​វ៉ាក់សាំង​ដែល​អនុញ្ញាត​អោយ​ពួកគេ​ចូល​បារ​ឬ​រោងភាពយន្ត​។​

​កាត​វ៉ាក់សាំង ដែល​ត្រូវតែមាន​សំរាប់​អ្នក​ចង់​ចូល​ភោជនីយដ្ឋាន សារមន្ទីរ​ឬ​ទី​សាធារណៈ​ដទៃ​ទៀត បាន​បង្ក​ការប្រឆាំង​ជាខ្លាំង​ក្នុងចំណោម​ប្រជាជន​បែ​ល​ហ្សិ​ច​ខ្លះ​។​

​ទិដ្ឋភាព​កាលពី​ថ្ងៃអាទិត្យ​បាន​រំលឹក​អំពី​ការប៉ះទង្គិច​កាលពី​ខែ​វិច្ឆិកា​ឆ្នាំមុន នៅ​ពេល​អ្នក​ប្រឆាំង​តវ៉ា​ប្រមាណ​៣៥.០០០​នាក់​បាន​ចូលរួម​ក្នុង​បាតុកម្ម​ដែល​បាន​ចាប់ផ្តើម​ដោយ​សន្តិវិធី តែ​ក្រោយមក​បាន​​ប្រែជា​ហិង្សា ដោយ​វិថី​ខ្លះ​ក្នុង​រដ្ឋធានី​បែ​ល​ហ្សិ​ច​ពោរពេញ​ដោយ​ឧស្ម័ន​ហៀរ​ទឹកភ្នែក​។​

​សាក្សី​ម្នាក់​បាន​និយាយថា អាគារ​ដាក់​សេវា​ទូត​អឺរ៉ុប​និង​ហាង​សាំង​វិច​មួយ​ត្រូវបាន​បាតុករ​ទម្លុះ​ចូល​។​បាតុករ​ខ្លះ​បាន​ដុត​ផាវ​កាំជ្រួច​នៅ​ពេល​ប៉ូលិស​រុលចូល​ក្នុង​ឧទ្យាន​ក្បែរ​នោះ​ដោយ​បាញ់​ទឹក​និង​គ្រាប់​​បែកផ្សែង​។​

​បាតុករ​ម្នាក់​បាន​ឡើង​លើ​វេទិកា​និង​ប្រាប់​ទៅ​អ្នក​ដទៃ​ទៀត​អោយ​លើកដៃ និង​ថា​អ្នក​ប្រឆាំង​តវ៉ា​នឹង​មិន​បោះបង់​ការតវ៉ា​ទាមទារ​ទេ​។​

​បាតុករ​ម្នាក់​ដែល​បាន​អះអាងថា​បាន​ចាក់​វ៉ាក់សាំង​ការពារកូ​វីដ​ដោយ​ខ្លួនឯង បាន​និយាយថា​« ខ្ញុំ​ខឹង​ការ​ដែល​រដ្ឋាភិបាល​សម្លុត​គំរាម​។​គេ​កំពុង​គំរាម​អោយ​គ្រប់​គ្នា​ចេញ​ទៅ​ចាក់​វ៉ាក់សាំង​»​។​

​សូមបញ្ជាក់​ថា បែ​ល​ហ្សិ​ច​កំពុងស្ថិត​កណ្តាល​ការផ្ទុះកូ​វីដ​ក្នុងសហគមន៍​នៅរលក​ទី​៥ ដោយ​ចំនួន​ឆ្លង​ឡើង​ដល់​កំពូល​និង​ចុះ​មក​វិញ​មិន​រំពឹង​ថា​នឹង​ទៅ​ដល់​នៅ​ប៉ុន្មាន​សប្តាហ៍​ទៀត​ទេ​។​

​បាតុកម្ម​នេះ​អំពាវនាវ​អោយ​បញ្ចប់​ការប្រើ​ច្បាប់​តឹងរ៉ឹង​ប្រឆាំង​កូវី​ដ​១៩​នៅ​ពេល​ប្រទេស​កំពុង​ប្រឈម​ដោះស្រាយ​ជាមួយ​នឹង​កំណើន​នៃ​ការឆ្លង​វីរុស​អូ​មី​ក្រុង ដែល​បាន​ឆ្លង​ហួស​៦០.០០០​នាក់​កាលពី​​ថ្ងៃ​២៣​មករា​ទោះជា​ប្រជាជន​បែ​ល​ហ្សិ​ច​ប្រមាណ​៨៩​ភាគរយ​បាន​ចាក់​វ៉ាក់សាំង​២​ដូសពេញ​លេញ និង​៦៧​ភាគរយ​បាន​ចាក់ដូស​ជំរុញ​។​

​ប៉ូលិស​ក្រុង​ព្រុច​សែល​កាលពី​ថ្ងៃអាទិត្យ​បាន​ចាប់ខ្លួន​បាតុករ​ហិង្សា​៧០​នាក់ ហើយ​មនុស្ស​១៥​នាក់​រួម​មាន​ប៉ូលិស​៣​នាក់​ត្រូវបាន​នាំ​ទៅ​កាន់​ពេទ្យ​ដោយសារ​របួស​ពី​ការប៉ះទង្គិច​។​

​បាតុកម្ម​នេះ​កើតឡើង​ក្រោយ​មាន​ការតវ៉ា​ប្រឆាំង​ស្រដៀង​គ្នា​នៅក្នុង​រដ្ឋធានី​នៃ​ប្រទេស​អឺរ៉ុប​ដទៃ​ទៀត​កាលពី​ថ្ងៃ​សៅរ៍ ប្រឆាំង​នឹង​លិខិត​ឬ​កាត​វ៉ាក់សាំង​និង​ការ​តំរូវ​ដទៃទៀត​ដែល​បណ្តា​រដ្ឋាភិបាល​អឺរ៉ុប​​ដាក់​ប្រើ​ដើម្បី​ទប់​កំណើន​នៃ​ការឆ្លង​ប្រចាំថ្ងៃ​និង​ចំនួន​អ្នកជំងឺ​ចូល​ដេកពេទ្យ​៕

​បែ​ល​ហ្សិ​ចបាន​ជួប​កំណើន​នៃ​ការ​ឆ្លងកូវី​ដ​១៩​ប្រចាំ​ថ្ងៃ​រហូតដល់​ជាង​៦០.០០០​នាក់​នៅ​មួយ​សប្តាហ៍​មក​នេះ

បាតុកម្មប្រែជាហិង្សានាំអោយបាតុករនិងប៉ូលិសរបួសជាងដប់នាក់កាលពីថ្ងៃអាទិត្យ