​​ដោយៈ ស​រិ​ទ្ធ / តាកែវៈ បុរស​ចំណាស់​ម្នាក់ ជា​សមាជិក​ក្រុមប្រឹក្សាឃុំ​គុ​ស បាន​ស្លាប់ នៅ​កន្លែងកើតហេតុ នៅពេល​បុរស​នោះ បាន​ជិះ​ម៉ូតូ បត់​ឆ្លងផ្លូវ ហើយ​ត្រូវ​រថយន្ត បើក​បុក​ពេញទំហឹង រួច​រថយន្ត​បង្កហេតុ បាន​បើក​គេចខ្លួន បាត់ស្រមោល​។​

​ហេតុការណ៍​នេះ បានកើត​ឡើង នៅវេលា​ម៉ោងជាង ៥ រសៀល ថ្ងៃទី​២៣ ខែមករា ឆ្នាំ​២០២២ ស្ថិតនៅលើ​ផ្លូវជាតិ​លេខ​៣ ត្រង់​ចន្លោះ​គីឡូម៉ែត្រ លេខ ៩១-៩២ ក្នុងភូមិ​យាយ​ឡ ឃុំ​ត្រាំកក់ ស្រុក​ត្រាំកក់ ខេត្តតាកែវ ។​

​សមត្ថកិច្ច បានឱ្យដឹងថាៈ បុរស​ចំណាស់​ម្នាក់​នោះ ឈ្មោះ អ៊ុំ ស៊ាន់ អាយុ ៧២ ឆ្នាំ ជា​សមាជិក ក្រុមប្រឹក្សាឃុំ​គុ​ស មាន​លំនៅ នៅ​ភូមិ​យាយ​ឡ ឃុំ​ត្រាំកក់ ស្រុក​ត្រាំកក់ ខេត្តតាកែវ ។​

​សមត្ថកិច្ច បាន​បន្ត​ឱ្យដឹងទៀតថាៈ ដំបូង ម៉ូតូ​រងគ្រោះ ម៉ាក​ហុងដា ឌ្រី​ម សេ​១២៥ ពណ៌​ខ្មៅ ពាក់​ស្លាក​លេខ ភ្នំពេញ 1A-0988 បើកបរ​ដោយ ឈ្មោះ អ៊ុំ ស៊ាន់ ។ នៅពេល​បើក​មក ពី​ទិសខាងកើត និង​លុះ​បើកបរ មកដល់​ចំណុច​ខាងលើ បុរស​នេះ ក៏បាន​បត់​ម៉ូតូ​ទៅខាង​ឆ្វេង ឆ្លងផ្លូវ ដើម្បី​ចូល​ផ្ទះ ក៏​ស្រាប់​តែមាន​រថយន្ត​មួយគ្រឿង មិន​ស្គាល់​អត្តសញ្ញាណ មកពី​ក្រោយ បាន​បុក​ម៉ូតូ​របស់គាត់ ចំ​ពី​ចំហៀង ខាងឆ្វេង ពេញ​មួយ​ទំហឹង​តែម្តង រួចហើយ​បាន​បើកបរ គេចខ្លួន ទៅ​ទិស​ខាងលិច បាត់ទៅ​។​

​ក្រោយ​កើតហេតុ កម្លាំង​ជំនាញ​ចរាចរណ៍​ផ្លូវគោក ស្រុក​ត្រាំកក់ បាន​ចុះ​ត្រួតពិនិត្យ កសាង​សំណុំរឿង ទៅតាម​នីតិវិធី និង​បានប្រគល់​សព ជូន​ដល់​សាច់ញាតិ យកទៅ​ធ្វើបុណ្យ តាម​ប្រពៃណី រីឯ​វត្ថុតាង​ម៉ូតូ​ខាងលើ រង​ការខូចខាត​ធ្ងន់ ហើយ​ត្រូវបាន​យកមក​រក្សាទុក នៅ​ប៉ុស្តិ៍នគរបាល​រដ្ឋបាល​ត្រាំកក់​៕/V