​ដោយៈ សុខ​សុ​ភ័​ណ្ឌ / កំពង់ស្ពឺៈ អភិបាលខេត្ត​កំពង់ស្ពឺ លោក វ៉ី សំណាង បាន​ថ្លែងថា ក្នុងនាម​ជា​ថ្នាក់ដឹកនាំ​ខេត្ត ពិត​ជាមាន​មោទនភាព ចំពោះ​កូនក្មួយ ដែលជា​កូន ជា​ចៅ​របស់ អ្នក​ខេត្តកំពង់ស្ពឺ ដែល​ធ្វើ​បានល្អ ក្នុង​ការប្រឡង​សញ្ញាបត្រ​មធ្យមសិក្សា​ទុតិយភូមិ សម្រាប់ ឆ្នាំ​សិក្សា ២០២០-២០២១ រហូតដល់​ទៅជិត បី ពាន់​នាក់ លើ​ចំនួន​បេក្ខជន​ប្រឡង​ជាង បួន​ពាន់​នាក់ ហើយ​ទន្ទឹមនឹង​ការប្រឡង​ជាប់​ច្រើន កូន ក្មួយ អាច​ដណ្តើមបាន​និទ្ទេស A សម្រាប់​មុខមាត់​ខេត្ត មុខមាត់​គ្រួសារ រហូតដល់​ទៅ ៣៣ នាក់​។​

​លោក​អភិបាលខេត្ត​កំពង់ស្ពឺ បាន​ថ្លែង​ដូច្នេះ នៅក្នុង​ឱកាស​ដែល​លោក បាន​អញ្ជើញ ប្រគល់​ម៉ូតូ ដោយផ្ទាល់ ដល់​ក្មួយៗ ជ័យលាភី និទ្ទេស A នា​ព្រឹក​ថ្ងៃទី​២៤ ខែមករា ឆ្នាំ​២០២២ នៅ​សាលាខេត្ត​កំពង់ស្ពឺ ។

​លោក វ៉ី សំណាង បាន​ថ្លែងថាៈ ទោះ​ស្ថិតក្នុង​ដំណាក់កាល​ដ៏​លំបាក នៃ​ការរីក​រាលដាល ជំងឺ​កូ​វីដ​-១៩ ក៏ដោយ ក៏​ក្មួយៗ នៅតែ​បន្ត​ការខិតខំ​ប្រឹងប្រែង​រៀនសូត្រ មិន​បណ្តែត បណ្តោយ​ខ្លួន​ដែរ​។ ថ្វី​ត្បិត​សាលា​បាន​បិទ ហើយ​តម្រូវឱ្យ​ក្មួយៗ រៀន​តាម​ប្រព័ន្ធ​ហ្សូ​ម (Zoom) ដែល​ពិបាក​ក្នុងការ​ទំនាក់ទំនង សួរ​សំណួរ ផ្តល់​ចំលើយ មិន​ដូច​រៀន​ក្នុង សាលា តែ​ក្មួយៗ មិន​បោះបង់ នៅតែ​បន្ត​រៀន រហូត​បាន​លទ្ធផល គួរ​ជាទី​មោទនៈ នៅថ្ងៃនេះ ។ ក្មួយៗ ពិតជា​មិន​ធ្វើឱ្យ​គ្រួសារ​ក្មួយៗ អស់សង្ឃឹម​នោះទេ ពិសេស​រដ្ឋបាលខេត្ត ពិត​ជាមាន​មោទនភាព ដោយសារ​ក្មួយៗ កូនចៅ​អ្នក​កំពង់ស្ពឺ ពិតជា​ឈាមជ័រ អ្នកប្រាជ្ញ ប្រាកដ​មែន ហើយក៏​អរគុណ ដល់​លោកគ្រូ អ្នកគ្រូ ដែល​បាន​លះបង់ កម្លាំងកាយ​ចិត្ត មិន​គិតពី​ការនឿយហត់ បង្រៀន​ពួកគេ​បានល្អ​។​

​ដូចដែល​អ្វី ដែល​អ៊ុំ​បាន​សន្យា នៅពេល​បើក​កញ្ចប់​វិញ្ញាសា​ប្រឡង​ថា អ៊ុំ​នឹង​ជូន​កាដូ ម៉ូតូ​មួយគ្រឿង ដល់​កូនក្មួយ​ណា ដែល​អាច​ដណ្តើមបាន​និទ្ទេស A ឥឡូវនេះ គឺ​ក្មួយ​ធ្វើ បាន​រហូត​ទៅដល់ ៣៣ នាក់ ។ ថ្ងៃនេះ អ៊ុំ​ជូន​ម៉ូតូ​ដល់​ក្មួយ​ម្នាក់​មួយគ្រឿង សម្រាប់​ជិះ មក​សិក្សា​បន្តទៀត ហើយ​ក្នុងនាម​អ៊ុំ​និង​ក្នុងនាម​រដ្ឋបាលខេត្ត ក៏​សុំឱ្យ​ក្មួយៗ ខិតខំ​បន្ថែម ទៀត លើ​មុខជំនាញ នៅ​ថ្នាក់​ឧ​ត្ត​មសិ​ក្សា ដើម្បី​យកចំណេះ​វិជ្ជា មក​ចូលរួម​អភិវឌ្ឍន៍​គ្រួសារ សហគមន៍ និង​សង្គមជាតិ​យើង ពិសេស​ដើម្បី​អនាគត​ខ្លួនឯង​៕/V​