​ប្រែ​សម្រួលៈ​បំណង​/​អា​ប៊ូ​ដា​ប៊ី​(​អេ​ភី​,​ដេល្លី​ម៉េល​)៖ ប្រទេស​អារ៉ាប់​រួម​អេ​មី​រ៉េត កាលពី​ថ្ងៃ​ចន្ទ​ទី​២៤​មករា​បាន​ស្ទាក់​កំទេច​កាំ​ជ្រួច​២​គ្រាប់​ដែល​ត្រូវ​បាន​បាញ់​សំដៅ​ទីក្រុង​អា​ប៊ូ​ដា​ប៊ី​កាលពីដើមថ្ងៃ​ចន្ទ នេះ​បើ​តាម​ការផ្សាយ​របស់​ទីភ្នាក់ងារ​សារព័ត៌មាន​គ្រប់គ្រង​ដោយ​រដ្ឋ WAM​។​

​វា​ជា​ការវាយប្រហារ​លើកចុងក្រោយ​មួយ​ក្នុងចំណោម​ការវាយប្រហា​រ​ដូច្នេះ​ជា​បន្តបន្ទាប់​លើ​រដ្ឋធានី​របស់​របស់​អារ៉ាប់​រួម​អេ​មី​រ៉េត​។​

​ទីភ្នាក់ងារ​សារព័ត៌មាន WAM​បាន​និយាយថា អំបែង​កាំជ្រួច​បាន​ធ្លាក់​លើ​រដ្ឋធានី​តែ​មិន​បង្ក​គ្រោះថ្នាក់​ទេ​។​

​ទីភ្នាក់ងារ​សារព័ត៌មាន​ខាងលើ​បាន​ស្រង់​សម្តី​ក្រសួង​ការពារជាតិ​អារ៉ាប់​រួម​អេ​មី​រ៉េត ដែល​បាន​និយាយថា «​អេ​មី​រ៉េត​ត្រៀមខ្លួន​ដោះស្រាយ​ជាមួយនឹង​ការ​គំរាម​ណាមួយ និង​ថា​ខ្លួន​នឹង​ចាត់​គ្រប់​វិធាន​​ការ​ដើម្បី​ការពារ​រដ្ឋ​ឈូង​សមុទ្រ​មួយ​នេះ​ពី​ការវាយប្រហារ​គ្រប់​ប្រភេទ​ទាំងអស់​»​។​

​វីដេអូ​បង្ហោះ​ក្នុង​បណ្តាញ​សង្គម​បង្ហាញ​មេឃ​លើ​រដ្ឋធានី​អា​ប៊ូ​ដា​ប៊ី​ឡើង​ភ្លឺ​នៅមុន​ព្រឹក​ព្រហាម​ថ្ងៃ​ចន្ទ​ជាមួយនឹង​ចំណុច​នៃ​ពន្លឺ​មើល​ទៅ​ដូច​ជា​កាំជ្រួច​ស្ទាក់​កំទេច​នៅក្នុង​មេឃ​។​

​ការបាញ់​កាំជ្រួច​នេះ​ក៏​បាន​រំខាន​ចរាចរណ៍​ផ្លូវអាកាស​នៅ​អាកាសយានដ្ឋាន​ក្រុង​អា​ប៊ូ​ដា​ប៊ី ដែល​ជា​ផ្ទះ​របស់​ក្រុមហ៊ុន​អាកាសចរណ៍​ចម្ងាយ​ឆ្ងាយ​អេ​ធី​ហាត​(Etihad)​អស់​ពេល​ប្រមាណ​១​ម៉ោង​ផង​ដែរ​។​

​នៅ​មិនទាន់​មាន​ការប្រកាស​ទ​ទួល​ខុស​ត្រូវ​ចំពោះ​ការវាយប្រហារ​នេះ​នៅឡើយ​ទេ​។​ទោះជា​យ៉ាងណា ការវាយប្រហារ​នោះ​កើត​ឡើង​មួយ​សប្តាហ៍​ក្រោយ​ពួក​ឧទ្ទាម​ហូ​ធី​(Houthi)​របស់​ប្រទេស​យេ​ម៉ែន​បាន​​ប្រកាស​អះអាង​ការវាយប្រហារ​មួយ​លើ​រដ្ឋធានី​អា​ប៊ូ​ដា​ប៊ី​ដែល​បាន​សម្លាប់​មនុស្ស​៣​នាក់​និង​របួស​៦​នាក់​ទៀត​។​

​នៅ​ប៉ុន្មាន​ថ្ងៃ​មកនេះ ក្រុមចំរុះ​ដឹកនាំ​ដោយ​អា​រ៉ាប៊ីសាអូឌីត​ដែល​អារ៉ា​ប់​រួម​អេ​មី​រ៉េត​គាំទ្រ បាន​ធ្វើ​ការវាយប្រហារ​តាម​ផ្លូវអាកាស​បន្តបន្ទាប់​លើ​គោលដៅ​នានា​នៅយេ​ម៉ែន​ដោយ​បណ្តាល​អោយ​ប្រទេស​​ក្រីក្រ​បំផុត​មួយ​នេះ​ដាច់​អ៊ីនធឺណិត​និង​សម្លាប់​មនុស្ស​ជាង​៨០​នាក់​នៅ​គុក​មួយ​។​

​ពួក​ហូ​ធី​គំរាម​សងសឹក​លើ​អារ៉ាប់​រួម​អេ​មី​រ៉េត និង​អា​រ៉ាប៊ីសាអូឌីត ចំពោះ​ការវាយប្រហារ​តាម​ផ្លូវអាកាស​ទាំងនេះ​។​កាលពី​ថ្ងៃអាទិត្យ ក្រុម​ចំរុះ​នេះ​បាន​និយាយថា កាំជ្រួច​ផ្លោង​មួយ​របស់​ពួក​ហូ​ធី​បាន​ធ្លាក់​​នៅ​តំបន់​ឧស្សាហកម្ម​មួយ​ក្នុង​ទីក្រុង​ជី​ហ្សា​ន់ ក្នុងប្រទេស​អា​រ៉ាប៊ីសាអូឌីត​ដោយ​បណ្តា​លអោយ​របួស​មនុស្សម្នា​ក់​៕