ដោយៈ មុនី​រ័ត្ន / ភ្នំពេញៈ ថ្លែង​សារ​ពី​ខេត្តកំពត បុត្រា​ច្បង​របស់​សម្តេចក្រុមព្រះ នរោត្តម រណឫទ្ធិ គឺ​ព្រះអង្គម្ចាស់ នរោត្តម ចក្រាវុធ ក្នុងនាម​ជា​អ្នក​បន្តវេន និង​ជា​ព្រះប្រធាន​ស្តីទី គណបក្ស​ហ្វ៊ុនស៊ិនប៉ិច បាន​ប្តេជ្ញា​យ៉ាង​មុះ​មុត ក្នុងការ​ការពារ​ថែរក្សា គណបក្ស​ហ្វ៊ុនស៊ិនប៉ិច ឱ្យបាន​គង់វង្ស​។ ព្រះអង្គ​មានជំនឿថា គណបក្ស​ហ្វ៊ុនស៊ិនប៉ិច នឹង​ទទួលបាន​គាំទ្រ​សារជាថ្មី ក្នុងការ​បោះឆ្នោត​ជ្រើសតាំង ក្រុមប្រឹក្សាឃុំ សង្កាត់ ឆ្នាំ​២០២២ និង​ការបោះឆ្នោត ជ្រើសតាំង តំណាងរាស្ត្រ នា​ឆ្នាំ​២០២៣ ខាងមុខនេះ ។​

​ការប្តេជ្ញា​របស់​ព្រះអង្គម្ចាស់ នរោត្តម ចក្រាវុធ បានធ្វើ​ឡើង នាឱកាស​យាងចុះ​ជួប សំណេះសំណាល ជាមួយ​ថ្នាក់ដឹកនាំ ថ្នាក់​ខេត្ត ស្រុក ឃុំ នៅ​ទីស្នាក់ការ​បក្ស​ខេត្តកំពត ក្នុង​ឃុំ​ព្រៃ​ឃ្មុំ ស្រុក​ទឹកឈូ នៅ​ព្រឹក​ថ្ងៃ​ច័ន្ទ ទី​២៤ ខែមករា ឆ្នាំ​២០២២​។​

​ព្រះអង្គម្ចាស់ នរោត្តម ចក្រាវុធ បាន​មានបន្ទូល​បញ្ជាក់ថាៈ គណបក្ស​ហ្វ៊ុនស៊ិនប៉ិច ប្រកាស​ស្វាគមន៍ និង​បើកទ្វា​ចំហរ ចំពោះ​អ្នករាជានិយម អ្នក​ជាតិនិយម មក​រួបរួម សាមគ្គី​គ្នា ជាមួយ​មហា​គ្រួសារ ក្រោម​ដំបូល​គណបក្ស​ហ្វ៊ុនស៊ិនប៉ិច​។​

​សូមបញ្ជាក់ថា ការប្តេជ្ញា​របស់​ព្រះអង្គម្ចាស់ នរោត្តម ចក្រាវុធ ក្នុងការ​ការពារ​ថែរក្សា គណបក្ស​ហ្វ៊ុនស៊ិនប៉ិច ឱ្យបាន​គង់វង្ស គឺ​បាន​ធ្វើឡើង បន្ទាប់ពី​ក្រុម​លោក សាយ ហាក់ លោក ហេង ចន្ថា និង​លោក ផាន់ សិទ្ធី រួមទាំង​មនុស្ស មួយចំនួនទៀត គ្រោង​នឹង​រៀបចំ ធ្វើ​សមាជ នាពេល​ខាង​នេះ ដើម្បី​យាង​សម្តេច​រាជបុត្រី ព្រះអនុជ នរោត្តម អរុណរស្មី អនុប្រធាន​ទី​១ គណបក្ស ជា​ព្រះប្រធាន​គណបក្ស ហ្វ៊ុនស៊ិនប៉ិច​។​

​សូមជម្រាបថា ក្រុម​លោក សាយ ហាក់ លោក ហេង ចន្ថា និង​លោក ផាន់ សិទ្ធី បាន​បើក​កិច្ចប្រជុំ​វិសាមញ្ញ គណៈកម្មាធិការ​នាយក គណបក្ស​ហ្វ៊ុនស៊ិនប៉ិច កាលពី​ថ្ងៃទី​២៣ ខែធ្នូ ឆ្នាំ​២០២១ ក​កន្លងមកនេះ ដោយបាន​សម្រេច​ជា​ឯកច្ឆន្ទ យាង​សម្តេច​រាជបុត្រី ព្រះអនុជ នរោត្តម អរុណរស្មី អនុប្រធាន​ទី​១ គណបក្ស ជា​ព្រះប្រធាន​គណបក្ស ហ្វ៊ុនស៊ិនប៉ិច​។​

​ទាក់ទង​ករណី​ជម្លោះផ្ទៃក្នុង គណបក្ស​ហ្វ៊ុនស៊ិនប៉ិច​នេះ សម្តេច​ក្រឡាហោម ស ខេង កាលពី​ថ្ងៃទី​២០ ខែមករា ឆ្នាំ​២០២២ បានធ្វើ​លិខិត​ទូលថ្វាយ ព្រះអង្គម្ចាស់ នរោត្តម ចក្រាវុធ ថាៈ ក្រសួងមហាផ្ទៃ បានទទួល​រួចហើយ នូវ​សេចក្ដីសម្រេច​លេខ​០៤៥ ហស​ប ចុះ​ថ្ងៃទី​១៦ ខែធ្នូ ឆ្នាំ​២០២០ របស់​គណបក្ស​ហ្វ៊ុនស៊ិនប៉ិច តែងតាំង​ព្រះអង្គម្ចាស់ នរោត្តម ចក្រាវុធ ជា​អនុប្រធាន គណបក្ស​ហ្វ៊ុនស៊ិនប៉ិច ស្របតាម​ប្រការ ៥៩ ថ្មី នៃ​លក្ខន្តិកៈ គណបក្ស​។ ដូច្នេះ ក្រសួងមហាផ្ទៃ ស្នើឱ្យ​ព្រះអង្គម្ចាស់ ត្រូវធ្វើ​ការសម្របសម្រួល​ផ្ទៃក្នុង គណបក្ស ដើម្បី​រៀបចំ សមាជ​ជ្រើសរើស ក្បាលម៉ាស៊ីន​ដឹកនាំ គណបក្ស ឱ្យស្រប​តាម ខ្លឹមសារ ប្រការ ១៦ ប្រការ​១៧​ថ្មី ប្រការ​១៩ ប្រការ​២០ ប្រការ​២៤ និង​ប្រការ​៣៥ នៃ​លក្ខន្តិកៈ​គណបក្ស តម្កល់ទុក​នៅ​ក្រសួងមហាផ្ទៃ ព្រមទាំង​បញ្ញត្តិ​មាត្រា ១៨ ថ្មី នៃ ច្បាប់​ស្តីពី​គណបក្សនយោបាយ ផងដែរ​៕/V​