​ប្រែ​សម្រួលៈ​បំណង​/​បាងកក (BLOOMBERG,​បាងកក​ប៉ុស្តិ៍​)៖​ថៃ​កំពុង​បង្កើន​ការចាក់​វ៉ាក់សាំង​ដូស​ជំរុញ​ទី​៤​អោយ​អ្នកស្រុក​នៅ​តំបន់​ទេសចរណ៍​របស់​ខ្លួន​នៅ​ពេល​ជា​ប្រជាជាតិ​មួយ​នេះ​នឹង​ពង្រីក​​ការបើក​ព្រំដែន​នៅ​ខែ​ក្រោយ​។​

​អាជ្ញាធរ​កំពុងផ្តល់​វ៉ាក់សាំង​អា​ស្ត្រា​ហ្សេ​នីកា​( AstraZeneca)​និង​ហ្វាយ​ហ្សឺ​( Pfizer)​ដល់​អ្នក​រស់នៅ​ក្រុង​បាងកក កោះ​ភូ​កេត និង​ខេត្ត​ក្រា​ប៊ី​(Krabi)​ព្រម​ទាំង​ខេត្ត​ដទៃទៀត​ដើម្បី​ចាក់អោយ​​អ្នក​ដែល​បាន​ចាក់​ដូសទី​៣​រួច​ហើយ​យ៉ាងតិច​កាលពី​កាលពី​៣​ខែ​មុន​។​

​តាមពិត​ប្រជាជាតិ​អាស៊ីអាគ្នេយ៍​មួយ​នេះ​បាន​ចាក់​វ៉ាក់សាំង​កូវី​ដ​១៩​ដូសទី​៤​បាន​ជាង​៨០០.០០០​ដូស ភាគ​ច្រើន​លើ​បុគ្គលិក​សុខាភិបាល​និង​ក្រុម​មនុស្ស​ប្រឈម​គ្រោះថ្នាក់​ខ្ពស់​។​

​ថៃ​ស្ថិត​ចំណោម​ប្រទេស​ក្នុង​តារាង​ខ្លី​មួយ​រួម​មានឈី​លី​និង​អ៊ីស្រាអែល​ដែល​សុំ​ចាក់​ដូសទី​៤​ដល់​ប្រជាជន​ខ្លួន​។​ពួក​មន្ត្រី​ថៃ​បាន​និយាយថា ការចាក់​ដូ​សទី​៤​នឹង​ជួយ​កិច្ចខិតខំ​របស់​រដ្ឋាភិបាល​ក្នុងកា​រទប់​​ស្កាត់​ការឆ្លង​រាលដាល​ជំងឺ​កូវី​ដ​១៩​ក្នុង​សហគមន៍​និង​បើក​វិស័យ​ទេសចរ​របស់ខ្លួន​ឡើងវិញ​។​

​សូមបញ្ជាក់​ថា​ចាប់តាំងពី​ថ្ងៃ​០១​កុម្ភៈ ថៃ​នឹង​បន្ត​កម្មវិធី​ទទួល​ទេសចរ​បរទេស​ដោយ​មិនចាំបាច់​ធ្វើ​ចត្តា​ឡីស័​ក​ឡើងវិញ​ដែល​វា​បាន​ជួយ​នាំ​ទេសចរ​ចូល​ថៃ​បាន​ប្រមាណ​៣៥០.០០០​នាក់​ក្នុង​រយៈពេល​២​ខែ មុន​កម្មវិធី​នេះ​ត្រូវបាន​ផ្អាក​ជា​បណ្តោះអាសន្ន​ដោយសារ​បារម្ភ​អំពី​ការឆ្លង​រាលដាល​វីរុស​អូ​មី​ក្រុង​។​

​ប្រមាណ​១៧​ភាគរយ​ក្នុងចំណោម​ប្រជាជន​ថៃ​ជិត​៧០​លាន​នាក់​បាន​ចាក់​ដូសទី​៣​នៅពេល​៦៩​លាន​នាក់​បាន​ចាក់​២​ដូស​។​

​ថៃ​នៅ​ថ្ងៃ​ចន្ទ​នេះ​បាន​រាយការណ៍​ចំនួន​ឆ្លងកូវី​ដ​ថ្មី​ចំនួន​៧.១៣៩​នាក់ និង​អ្នកជំងឺ​១៣​នាក់​បាន​ស្លាប់​នៅ​២៤​ម៉ោង​កន្លងទៅ​។​

​ក្នុងចំណោម​អ្នក​ឆ្លង​ថ្មី ៦.៩២៤​នាក់​ជា​ប្រជាជន​ថៃ​ទូទៅ និង​ក្រុង​បាងកក​មាន​អ្នក​ឆ្លង​ថ្មី​ច្រើនជាងគេ​គឺ ១.១៣០​នាក់ ។​មាន​ករណី​នាំចូល​ចំនួន​១៩៥​នាក់ ក្នុងនេះ​៣៦​នាក់​មក​ពី​រុស្ស៊ី និង​១០​នាក់​ទៅ​​ពី​កម្ពុជា នេះ​បើ​តាម​ការចុះផ្សាយ​របស់​សារព័ត៌មាន​បាងកក​ប៉ុស្តិ៍​។​

​សូមបញ្ជាក់​ថា ចាប់តាំងពី​ជំងឺឆ្លង​នេះ​មាន​នៅ​ថៃ​កាលពីដើមឆ្នាំ​២០២០​មក អាជ្ញាធរ​បាន​រកឃើញ​អ្នក​ឆ្លង​២.៣៨៤.៦៣៩​នាក់ ជាង​២,២៨​លាន​នាក់​ជាសះស្បើយ និង​២២.០៤៥​នាក់​បាន​ស្លាប់​ដោយកូវី​ដ​១៩​។​

​ទូទាំង​ពិភពលោក​មាន​អ្នក​ឆ្លងកូវី​ដ​១៩​ជាង​៣៥២​លាន​នាក់ និង​៥,៦១​លាន​នាក់​ស្លាប់ ដោយ​អាម៉េរិក​នាំមុខ​គេ​ទាំង​ចំនួន​ឆ្លង​(៧១,៩២​លាន​នាក់​)​និង​ស្លាប់​ដោយកូវី​ដ​១៩​មាន​ចំនួន​៨៨៩.១៩៧​នាក់​៕

ប្រជាជនថៃចាក់វ៉ាក់សាំងកូវីដ១៩នៅកោះភូកេតកាលពីឆ្នាំមុន