ដោយៈ​ប​.​ខុន​/​ភ្នំពេញៈ​រដ្ឋបាល​ខណ្ឌ​ឬ​ស្សី​កែវ​បាន​ចុះ​ធ្វើការ​ណែនាំ​ដល់​អ្នកធ្វើអាជីវកម្ម​នេសាទ​ត្រី​ស​ម្រ​ប់​ធ្វើ​ប្រហុក​ត្រៀម​អូស​ផែ​របស់ខ្លួន​ចេញ​ទៅរក​គោលដៅ​ដែល​បានកំណត់ វិញ​ពេល​ចប់​រដូវ​នេសាទ​ត្រី​ប្រហុក​និង​កាប់​សម្អាត​ព្រៃត្រែង​ដុះ​តាម​ច្រាំងទន្លេ ឯ​អ្នក​ចិញ្ចឹម​ត្រី​តាម​បែ​មាន​១០២​គ្រួសារ មាន​បែ​ចំនួន​១៧០​និង​ផ្ទះ​បណ្តែត​ទឹក​ចំនួន​២៤ ស្ថិតនៅលើ​ទីតាំង​ដែល រដ្ឋបាល​រាជធានី​ភ្នំពេញ​បានកំណត់​នៅ​ព្រំប្រទល់​រវាង​ខណ្ឌ​ព្រែក​ព្នៅ​និង​ខេត្តកណ្តាល​ជា​បណ្តោះអាសន្ន​ត្រឹម​ដំណាច់​ខែធ្នូ​ឆ្នាំ​២០២៤​។​

​លោក ឯក ឃុន​ឌឿ​ន អភិបាលខណ្ឌ​ឬ​ស្សី​កែវ បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​២៤​ខែមករា​ឆ្នាំ​២០២២​ថា នៅតាម​ច្រាំង​ទន្លេសាប​ក្នុងភូមិ​សាស្ត្រ​ខណ្ឌ​ឬ​ស្សី​កែវ ពេលនេះ​មិនឃើញ​មាន​សំណង់​លើ​ច្រាំង​និង​លើ​ផ្ទៃ​ទឹក​កើត​ឡើងវិញ​ទេ ពេលនេះ​ក្រុមការងារ​របស់​ខណ្ឌ​កំពុងតែ​កាប់​សម្អាត​ព្រៃត្រែង​ដុះ​តាម​ច្រាំងទន្លេ​និង​ធ្វើ​ការណែនាំ​ដល់​អ្នក ធ្វើ​អាជីវកម្ម​នេសាទ​តាម​គន្លង​ដាយ​ឱ្យ​ត្រៀម​អូស​ផែ​ដាយ​ចេញទៅ​កន្លែង​បានកំណត់​វិញ បន្ទាប់ពី​ចប់​រដូវ​ធ្វើ​នេសាទ​ត្រី​ប្រហុក​។​

លោក​អភិបាលខណ្ឌ​បានបញ្ជាក់​ថា​ពេល​ចប់​រដូវ​នេសាទ​ត្រី​ប្រហុក​ផែ​ដាយ​ទាំងអស់​ត្រូវតែ​ចាកចេញ មិន​ឱ្យមក​អែប​ច្រាំង​ដូច​មុន​ទៀតឡើយ​។ ទូក​នេសាទ​គ្រួសារ ក៏​មិន​ឱ្យមាន​ដំបូល​សម្រាប់​ស្នាក់​នៅតាម​មាត់ទន្លេ​លើ​ផ្ទៃ​ទឹក​ទៀត​ដែរ​។​

​លោក ងិន ឌី នាយ​ខណ្ឌ​រដ្ឋបាល​ជល​ផលរាជ​ធានី​ភ្នំពេញ​បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​២៤​ខែមករា​ថា រដូវ​នេសាទ​ត្រី​ប្រហុក​មិនទាន់​ចប់​នៅឡើយ​ទេ គឺ​នៅ សល់​មួយ​ខ្នើត​ទៀត​ផែ​ដាយ​ធ្វើ​អាជីវកម្ម​នេសាទ​ត្រី​ប្រហុក​ត្រូវ​អូស​ត្រឡប់​ទៅ​កន្លែង​កំណត់​នៅ​ព្រំប្រទល់​រាជធានី​ភ្នំពេញ​និង​ខេត្តកណ្តាល​វិញ​ពេល​ចប់​រដូវ​នេសាទ​ដែលជា​កន្លែង អាជ្ញាធរ​បានអនុញ្ញាត​ឱ្យ​ផ្ទះ​បណ្តែត​ទឹក​មាន​បែរ​ចិញ្ចឹម​ត្រី​នៅ​ជា​បណ្តោះអាសន្ន​។​

​តាម​របាយការណ៍​រប​ស់​មន្ទីរ​កសិកម្ម រុក្ខាប្រមាញ់​និង​នេសាទ​រាជធានី​ភ្នំពេញ​ស្តី​ការធ្វើ​សម្រង់​ស្ថិតិ​អ្នក​ចិញ្ចឹម​ត្រី​ក្នុង​បែ​តា​មដង​ទន្លេ​នៅក្នុង​ភូមិសាស្ត្រ​រាជធានី​ភ្នំពេញ ខែមករា​ឆ្នាំ​២០២២ បានបង្ហាញ​ឱ្យឃើញថា​មាន​ចំនួន​អ្នក​ចិញ្ចឹម​ត្រី​សរុប ១០២​គ្រួសារ បែ​ចិញ្ចឹម​ត្រី​សរុប​ចំនួន​១៧០​បែ និង ផ្ទះ​បណ្តែត​ទឹក​ចំនួន​២៤ ស្ថិតនៅលើ​ទីតាំង​ដែល រដ្ឋបាល​រាជធានី​ភ្នំពេញ​បានកំណត់​នៅ​ព្រំប្រទល់​រវាង​ខណ្ឌ​ព្រែក​ព្នៅ​និង​ខេត្តកណ្តាល​ជា​បណ្តោះអាសន្ន​ត្រឹម​ដំណាច់​ខែធ្នូ​ឆ្នាំ​២០២៤៕​