​ដោយៈ​ជា សីហៈ​/​ភ្នំពេញៈ ពិធី​បិទ​កិច្ចប្រជុំ​បូកសរុប​ការងារ​វិស័យ​ជលផល​ប្រចាំឆ្នាំ​២០២១ និង​លើក​ទិសដៅ​អនុវត្ត​បន្ត​ឆ្នាំ​២០២២ ត្រូវបាន​រៀបចំឡើង​នៅ​ថ្ងៃទី ២៤ ខែ មករា ឆ្នាំ ២០២២ ក្រោម​អធិបតីភាព​លោក រដ្ឋមន្ត្រី វេ​ង សាខុន ។

​តាម​របាយការណ៍​សមិទ្ធ​ផល​សម្រេចបាន​ក្នុង​ឆ្នាំ​២០២១ ជាពិសេស​លទ្ធផល​នៃ​ការអនុវត្ត​បទបញ្ជា​ដ៏​ខ្ពង់ខ្ពស់​របស់​សម្តេច​តេ​ជោ ហ៊ុន សែន នាយករដ្ឋមន្ត្រី កាលពី​ថ្ងៃទី​២៨ ខែវិច្ឆិកា ២០២១ ឱ្យ​ទប់ស្កាត់ បង្ក្រាប​ការទន្ទ្រាន​ឈូសឆាយ និង​ដក ហូត​ដីព្រៃ​លិច​ទឹក​ជុំវិញ​បឹង​ទន្លេសាប​។ ជាក់ស្តែង​គិត​ត្រឹម​ថ្ងៃទី​២៣ ខែមករា​នេះ​មាន​ប្រជា​ពល រដ្ឋ ១៤.៤៩០​គ្រួសារ បាន​ស្ម័គ្រចិត្ត​ប្រគល់​ដី​ជូន​រដ្ឋ​វិញ​ក្នុង​ទំហំ ៦០ ៣៦០,៤​ហ​.​ត បាន​ដាំ​កូនឈើ​ព្រៃ​លិច​ទឹក​ចំរុះ​បាន​ចំនួន ៣៤.៩១១​ដើម ឬ​ស្សី​ចំនួន ៧.៦៨៩​ដើម កូន​ត្នោត​ចំនួន ៣៣៩​ដើម និង​កប់​គ្រាប់ត្នោត​ចំនួន ២០៥.៣៨៥​គ្រាប់​។

​យោង​លើ​របាយការណ៍​បានបង្ហាញ​ឱ្យឃើញថា ក្នុង​ឆ្នាំ​២០២១ ការងារ​សម្រេចបាន មាន ផល​វារីវប្បកម្ម​បាន ៣៤៨.៣៥០​តោន ផលិត​កូន​ត្រី​ពូជ​បាន ៣២៤​លាន​ក្បាល ចិញ្ចឹម​ក្រពើ​បាន ២៩២.១០០​ក្បាល បង្កើត​បណ្តុំ​វា​រី​វប្បករ​ចំនួន ៣២៦​កន្លែង មាន​សមាជិក​ចំនួន ១១.០០០​នាក់​។

​របាយការណ៍​ដដែល​បាន​បន្តថា កន្លែង​អភិរក្ស​សរុប​ចំនួន ៦៨២​កន្លែង បោះបង្គោល​បេតុង​ព្រំប្រទល់​កន្លែង​អភិរក្ស​ចំនួន ១៨៥ ដើម បង្គោល​ឈើ​ចំនួន ២.៧៥០​ដើម ទម្លាក់​ប្រអប់​បេតុង​ចំនួន ២៥០ នៅ​តំបន់ឆ្នេរ បាន​ការពារ​តំបន់​ផ្កាថ្ម និង​ស្មៅ​សមុទ្រ​ទំហំ ៧.០០០​ហ​.​ត ដាំ​ព្រៃ​លិច​ទឹក​ចំនួន ១៥០​ហ​.​ត និង​សាងសង់​ស្នាក់ការ​ល្បាត​ចំនួន ៤​ខ្នង​។

​ប្រភព​ដដែល​បន្តថា សហគមន៍​នេសាទ​សរុប​ចំនួន ៥១៦ នៅក្នុង​នោះ​ទឹកសាប ៤៧៥ និង សមុទ្រ ៤១ មាន​សមាជិក​សរុប​ចំនួន ១៤៧.៥១៨​គ្រួសារ ស្មើនឹង ៣៣២.១៦៨​នាក់ ចុះបញ្ជី​សហគមន៍​នេសាទ​ចំនួន ៤៣៥ និង​បានផ្តល់​ថវិកា​គាំទ្រ​ដល់​សហគមន៍​ចំនួន ១៥០ ចំនួន ៤​លាន​រៀល​នៅក្នុង​មួយ​សហគមន៍ ដាក់​ស្លាក​សញ្ញា​កន្លែង​អភិរក្ស​សហគមន៍​ចំនួន ១១០​ស្លាក ទម្លាក់​ប្រអប់​បេតុង​ចំនួន​១៥០ និង​បោះបង្គោល​ការពារ​ស្មៅ​សមុទ្រ​ក្នុង​កន្លែង​សហគមន៍​ចំនួន ២០០​ដើម​។

​ការនាំចេញ​ផល​នេសាទ​បាន​ចំនួន ៣.៤៦៩​តោន ដោយ​ការប្រមូល​ចំណូល អនុវត្តបាន​ចំនួន ៦២១.៩១២.៩៧៦ រៀល​។ ផល​នេសាទ​សរុប​សម្រេចបាន​ចំនួន ៨៥៦.៤០០​តោន ក្នុងនេះ ផល​នេសាទ​ទឹកសាប​សម្រេចបាន​ចំនួន ៣៨៣.០៥០​តោន សមុទ្រ​ចំនួន ១២៥.០០០​តោន និង​ផល​វារីវប្បកម្ម​សម្រេច​បាន​ចំនួន ៣៤៨.៣៥០​តោន ដែល​គិត​សរុប​ជា​ប្រាក់​ស្មើនឹង ១.៧១២.៨០០.០០០​ដុល្លារ​។​