​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ កាលពី​ថ្ងៃ​ចន្ទ​ទី​២៤​មករា​ទាហាន​នៅ​ប្រទេស​បួ​គី​ណាហ្វា​សូ​(Burkina Faso)​បាន​ប្រកាស​តាម​កញ្ចក់​ទូរទស្សន៍​រដ្ឋ​ថា​ពួកគេ​បាន​ដណ្តើម​អំណាច​នៅ​​ក្នុងប្រទេស​អាហ្វ្រិក​ខាង​លិច​មួយ​នេះ បន្ទាប់​ពី​មាន​ការបះបោរ​ជុំវិញ​បរាជ័យ​របស់​ប្រធានាធិបតី​ស៊ីវិល​ក្នុង​ការទប់ស្កាត់​ការបះបោរ​អ៊ីស្លាម​។​

​មន្ត្រី​ជាន់ខ្ពស់​ម្នាក់​បាន​ប្រកាស​ពី​ការព្យួរ​រដ្ឋធម្មនុញ្ញ ការរំលាយ​រដ្ឋាភិបាល​និង​សភា និង​ការបិទ​ព្រំដែន​របស់​ប្រទេស​ចាប់ពី​ពាក់កណ្តាល​អធ្រាត្រ​ថ្ងៃ​ចន្ទ នេះ​យោង​តាម​ការអាន​ពី​សេចក្តី​ថ្លែងការណ៍​​ដែល​ចុះហត្ថលេខា​ដោយ​វរសេនីយ៍ឯក ប៉ូល​-​ហង់​រី សាន់​ដាវ​ហ្គោ ដា​មី​បា (Paul-Henri Sandaogo Damiba)​។​

​លោក​បាន​និយាយថា ចលនា​ស្នេហា​ជាតិ​ថ្មី​សម្រាប់​ការអភិរក្ស​និង​ការស្ដារ​ឡើង​វិញ (MPSR)​នឹង​បង្កើត “​សណ្តាប់ធ្នាប់​ធម្មនុញ្ញ​” ឡើងវិញ​ក្នុង​រយៈពេល “​សម​ហេតុផល​”​ដោយ​បន្ថែម​ថា​បម្រាម​គោចរ​រាល់​​រាត្រី​នៅ​ទូទាំង​ប្រទេស​នឹង​ត្រូវ​អនុវត្ត​។​

​មនុស្ស​រាប់រយ​នាក់​បាន​ប្រមូលផ្តុំ​គ្នា​ដើម្បី​អបអរសាទរ​រដ្ឋប្រហា​រ​យោធា​នៅ​ទីក្រុង​អៅ​ហ្គា​ឌូ​ហ្គួ (Ouagadougou) ដោយ​ស្វាគមន៍​ទាហាន​ជា​មួយ​ការ​ចុច​ស៊ី​ផ្លេ​ឡាន​និង​គ្រវី​ទង់ជាតិ​។​

​កាលពី​ព្រឹក​ថ្ងៃ​ចន្ទ មហាអំណាច​អាហ្វ្រិក​និង​លោក​ខាងលិច​បាន​បរិហា​រ​នូវ​អ្វី​ដែល​ពួកគេ​ហៅថា “​រដ្ឋប្រហារ​” ហើយ​សហភាព​អឺរ៉ុប​បានទាមទារ​ឱ្យ​ដោះលែង “​ជាបន្ទាន់​” នូវ​ប្រធានាធិបតី រ៉ូច ម៉ាក គ្រី​ស្ទាន កាបូ​រ៉េ (Roch Marc Christian Kabore)​។​

​សហរដ្ឋ​អាម៉េរិក​ក៏​បាន​អំពាវនាវ​ឱ្យ​ដោះលែង​លោក​កាបូ​រ៉េ​និង​ជំរុញ “​សមាជិក​នៃ​កងកម្លាំង​សន្តិសុខ​ឱ្យ​គោរព​រដ្ឋធម្មនុញ្ញ​របស់​បួ​គី​ណាហ្វា​សូនិងការ​ដឹកនាំ​រប​ស់​ស៊ីវិល​” ផងដែរ​។​

​ប្រមុខ​អង្គការ​សហប្រជាជាតិ លោក អង់​តូ​នីញ៉ូ គូថេ​រ៉េស បាន​និយាយ​នៅក្នុង​សេចក្តីថ្លែងការណ៍​មួយ​ថា លោក​”​ថ្កោលទោស​យ៉ាង​ដាច់អហង្ការ​ចំពោះ​ការប៉ុនប៉ង​ចូល​កាន់កាប់​រដ្ឋាភិបាល​ដោយ​កម្លាំង​​ប្រដាប់អាវុធ​” ដោយ​ហៅ​ព្រឹត្តិការណ៍​នេះ​ថា​ជា “​រដ្ឋប្រហារ​”​។​

​បន្ទាប់​ពី​មាន​របាយការណ៍​ផ្ទុយ​គ្នា​ជុំវិញ​កន្លែង​លាក់​ខ្លួន​របស់​លោក​កាបូ​រ៉េ ប្រធាន​គោលនយោបាយ​ការបរទេស​របស់​សហ​ភាព​អឺរ៉ុប​លោក យ៉ូ​សេប បូរែ​ល (Josep Borrell)​បាន​និយាយ​នៅក្នុង​សេច​​ក្តី​ថ្លែង​ការណ៍មួយ​ថា “​ឥឡូវ​នេះ​យើង​ដឹង​ថា​ប្រធានាធិបតី​កាបូ​រ៉េ​កំពុង​ស្ថិត​នៅក្រោម​ការគ្រប់គ្រង​របស់​យោធា​”​។​

​លោក​បាន​ហៅ​ស្ថានភាព​នេះ​ថា​គួរ​ព្រួយបារម្ភ​ជាខ្លាំង​៕

​បួ​គី​ណាហ្វា​សូបាន​ឆ្លងកាត់​ការ​ធ្វើ​រដ្ឋប្រហារ​ច្រើន​រាប់មិនអស់ ។ កាលពី​ថ្ងៃ​ចន្ទ​ទី​២៤​មករា​ទាហាន​បាន​ប្រកាស​តាម​កញ្ចក់​ទូរទស្សន៍​រដ្ឋ​ថា​ពួកគេ​បាន​ដណ្តើម​អំណាច​នៅក្នុង​ប្រទេស​អាហ្វ្រិក​ខាងលិច​​មួយ​នេះ​